Կաբիր Բեդի

Կաբիր Բեդի (հինդի कबीर बेदी, հունվարի 16, 1946(1946-01-16), Լահոր, Փանջաբ, Բրիտանական Հնդկաստան, Բրիտանական կայսրություն), հնդիկ կինոդերասան և հեռուստահաղորդավար։ Բոլիվուդի առաջին դերասաններից է, ով աշխատել է Հոլիվուդում և հայտնի դարձել Եվրոպայում։

Կաբիր Բեդի
Ծնվել է	հունվարի 16, 1946(1946-01-16) (78 տարեկան)
Ծննդավայր	Լահոր, Փանջաբ, Բրիտանական Հնդկաստան, Բրիտանական կայսրություն
Կրթություն	Դելիի համալսարան և Շերվուդ քոլեջ
Քաղաքացիություն	Հնդկաստան
Մասնագիտություն	կինոդերասան, հեռուստատեսային դերասան և մոդել
Ծնողներ	հայր՝ Baba Bedi XVI?, մայր՝ Freda Bedi?
Ամուսին(ներ)	Նիկի Բեդի և Պրոտիմա Բեդի
Երեխա(ներ)	Pooja Bedi? և Adam Bedi?
Պարգևներ և մրցանակներ
kabirbedi.com

Կենսագրություն

Կաբիր Բեդիի ծնողները եղել են քաղաքական պայքարի ակտիվ մասնակիցներ, ովքեր պայքարում էին անգլիական գաղութարարներից Հնդկաստանի անկախության համար։ Նրա հայրը Օքսֆորդի շրջանավարտ Բաբա Պյարելալ Բեդին էր, ով հայտնի էր Բաբա Բեդի 16-րդ անունով և հանդիսանում էր միջազգային ճանաչում ստացած հոգևոր ուսուցիչ։ Բեդիները անմիջապես սերում էին սիկհերի կրոնական հիմնադիր Գուրու Նանակից։ Մայրը Դերբիշիրում ծնված Ֆրեդա Բեդին՝ բուդդիզմի մոլի հետևորդ էր։

Կաբիր Բեդին սովորել է տեղի դպրոցներից մեկում, իսկ հետո ընդունվել Նայնիտալի Շերվուդյան քոլեջ։ Այնուհետև տեղափոխվել է Դելի և պատմություն ուսումնասիրելու նպատակով ընդունվել Սուրբ Ստեփանոսի համալսարան։ Համալսարանն ավարտելուց հետո բնակություն է հաստատել Բոմբեյում։ Այնտեղ նրան հրավիրել են նկարահանվել «Will» ծխախոտի գովազդային հոլովակում, որը ցուցադրվում էր կինոթատրոններում ` կինոցուցադրությունների միջև ընկած ժամանակահատվածում։ Այդ ժամանակ նրան նկատել է թատերական ռեժիսորներից մեկը և հրավիրել թատրոնում աշխատելու։ Թատրոնում Կաբիր Բեդին հանդես էր գալիս ամենաբազմազան դերերով։ Նկատելով թատրոնում նրա հաջողությունները, շուտով նրան հրավիրում են կինոնկարահանման հրապարակ։ Կինոդեբյուտը կայացել է 1971 թվականին՝ «Իրարանցում» ֆիլմում։

1976 թվականին Կաբիր Բեդին հրավիրվել է նկարահանվելու իտալացի ռեժիսոր Սերջո Սոլիմայի «Սանդոկան` յոթ ծովերի վագրը» ֆիլմում։ Ֆիլմի հաջողությունից հետո, 1977 թվականին նա նկարահանվել է «Վագրը դեռ կենդանի է, Սանդոկանը վերադառնում է», իսկ 1996 թվականին՝ «Սանդոկանի վերադարձը» ֆիլմերում։

1982 թվականին նկարահանվել է Ֆրանց Վերֆելի «Մուսա լեռան քառասուն օրը» հայտնի վեպի մոտիվներով Ս. Մուրադյանի նկարահանած համանուն ֆիլմում ` կատարելով Գաբրիել Բագրատյանի դերը։ 1983 թվականին խաղացել է Ջեյմս Բոնդի մասին պատմող «Ութոտնուկը» ֆիլմում ` չարագործ Գոբինդի դերում։ Ֆիլմը նրան հայտնի դարձրեց Ամերիկայում։ Այնուհետև նկարահանվել է ամերիկյան հեռուստասերիալներում («Դինաստիա», «Նա գրել է սպանություն», «Մասնավոր խուզարկու Մագնումը», «Ճանապարհների ասպետը», «Լեռնցին», «Հանդուգն են և գեղեցիկ» և այլն)։ 1988 թվականին նկարահանվել է ավստրալիական «Վերադարձ Էդեմ» մինի-սերիալի ռեմեյքում ` «Վրեժի ծարավ» ֆիլմում, որտեղ նրա խաղընկերուհին հայտնի դերասանուհի Ռեքհան է։

Անձնական կյանքը

Կաբիր Բեդին ամուսնացել է երեք անգամ և ունի երեք երեխա։ Երկար ժամանակ սիրավեպ է ունեցել դերասանուհի Փարվին Բաբիի հետ։

2010 թվականին Իտալիայի հանրապետության նախագահի հրամանով պարգևատրվել է «Իտալիայի հանրապետությանը մատուցված ծառայությունների համար» շքանշանով։ 1982 թվականից հանդիսանում է ամերիկյան Կինոարվեստի և գիտության ակադեմիայի անդամ և արժանիներին ներկայացնում է «Օսկար» մրցանակի։

Մասնակի ֆիլմագրությունը

Թվական	Անվանում	Բնօրինակ անվանում	Կերպար
1971	Իրարանցում	Hulchul	Մահեշ Ջաթլեյ
1972	Կավատը	Rakhi Aur Hathkadi	Սուրաջ
1973	Խորթ եղբայրները	Kuchhe Dhaage	Ռուպա, Պանդիտ Տուլսիրամ
1974	Սիրո մեղեդին	Ishq Ishq Ishq	Դիվանա, Ռավիկանտ Վյաս
1976	Սանդոկան` յոթ ծովերի վագրը	Sandokan	Սանդոկան
1976	Կոբրա	Nagin	Ուդայ
1976	Սև ծովահենը	Il corsaro nero	ծովահեն Ներո
1976	Գնդակը	Bullet	Դուրգա Պրասադ
1977	Վագրը դեռ կենդանի է. Սանդոկանը վերադառնում է	La tigre è ancora viva: Sandokan alla riscossa!	Սանդոկան
1977	Դավաճանություն	Vishwasghaat	Ուդայ
1978	Բաղդադի գողը	The Thief of Baghdad	արքայազն Թաջ
1979	Աշանտի	Ashanti	Մալիկ
1979	Վերջին երդումը	Aakhri Kasam	Կիշան, Բադալ
1980	Մասնավոր խուզարկու Մագնումը	Magnum, P.I.	Մալքոլմ
1981	Դինաստիա	Dynasty	Ֆարուք Ահմեդ
1982	Էլեոնորա. Աշխարհի առաջին լեդին	Eleanor, First Lady of the World	-
1982	Ճանապարհների ասպետը	Knight Rider	Վասկուն
1982	Սատանայի սիրեցյալը	Satan's Mistress	Սպիրիտ
1982	Մուսա լեռան քառասուն օրը	Forty Days of Musa Dagh	Գաբրիել Բագրատյան
1983	Ութոտնուկը	Octopussy	Գոբինդա
1983	Գլխավոր հոսպիտալը	General Hospital	լորդ Ռամա
1984	Վարպետը	The Master	Կրուգեր
1984	Որսորդը	Hunter	Լեո Զուկոֆ
1984	Նա գրել է սպանություն	Murder, She Wrote	Վիկրամ Սինգհ
1985	Պատանդների չվերթը	Hostage Flight	Խատիբ Նասիֆ
1985	Ստինգրեյ	Stingray	Դաուսաու
1986	Արծվի թևեր	On Wings of Eagles	Մոհամադ
1986	Մեկ կյանք` ապրելու համար	One Life to Live	Կառլոս Դեմիտրի
1987	Հանդուգն են և գեղեցիկ	The Bold and the Beautiful	արքայազն Օմար Ռաշիդ
1987	Մոլլի Դոդի օրերն ու գիշերները	The Days and Nights of Molly Dodd	Բիրմանի
1988	Վերջնակետ	Terminal Entry	հրամանատար
1988	Գազանը	The Beast of War	Աքբար
1988	Վրեժի ծարավ	Khoon Bhari Maang	Սանջայ Վերմա
1991	Մթին ջունգլիների գաղտնիքները	I misteri della giungla nera	Կամմամուրի
1991	Սիրելին	Kurbaan	տեսուչ Սուրաջ Սինգհ
1991	Արդարադատությունն անզոր է	Beyond Justice	Մաուլետ
1991	Անապատի արքայազնը	Il principe del deserto	Մաուլետ Բենի-Զաիր
1992	Լեռնցին	Highlander	Կամիր
1992	Սիրո մեծությունը	Yalgaar	Ռաջ Պրատապ Սինգհալ
1992	Կաբարեի պարուհին	Dil Aashna Hai (...The Heart Knows)	Ռայ Բահադուր Դիգիվիջայ Սինգհ
1993	Զինակիրը	Kshatriya	Թհակուր Գանգա Սինգհ
1993	Փրկարարը	Yugandhar	Կոլ Կանիր
1994	Սալամ	Salaami	կապիտան
1994	Գոտեմարտ առյուծների հետ	Lie Down with Lions	Կաբիր
1994	Մահառաջայի դուստրը	The Maharaja's Daughter	Չանդրագուպտա
1995	Թոմ Կլենսիի օպերատիվ կենտրոնը	OP Center	Աբդուլ
1995	Ամենուր խուճապ է	Aatank Hi Aatank	ոստիկանության տեսուչ
1995	Ճակատագիր	Kismat	Ռաջան
1996	Սանդոկանի վերադարձը	Il ritorno di Sandokan	Սանդոկան
1997	Մենք հրեշտակներ ենք	Noi siamo angeli	Նապոլեոն
1997	Արդարադատության ասպետները	Team Knight Rider	Արիստոտել Դրագո
1997	Արգելված տարածք	Forbidden Territory: Stanley's Search for Livingstone	Խամիս Բին Աբդուլա
1998	Ընտանեկան բժիշկ	Un medico in famiglia	Կաբիր
1999	Կյանքն իտալական ձևով	Vivere	Ամիր Իբրահիմ
1999	Դատաստան	Kohram	Բրիգ Բեդի
2001	Կապիկների թագավորը	The Lost Empire	Ֆրիար Սանդ
2002	Այրվող սիրտը	Kranti	Մահենդրա Պրատապ Ռանա
2002	Իմ սիրտը պատկանում է քեզ	Maine Dil Tujhko Diya	միսթր Վարմա
2002	Անիտան ու ես	Anita & Me	Յուտի
2003	Հատուցում փնտրելիս	Talaash: The Hunt Begins	Չհոտի Պատհան
2003	Հիշողություններից	The Hero: Love Story of a Spy	միսթր Զաքարիա
2004	Սրբազան համայիլ	Rudraksh	Վեդ Պուջան
2004	Բախտի կամոք	Kismat	Ռաջ Մալյա
2004	Ճանապարհ` ետդարձով	A/R: Andata+ritorno	Տոլստոջ
2004	Ես քեզ հետ եմ	Main Hoon Na	Ամարջիտ Բակշի
2005	Թաջ Մահալ. Սիրո հավերժական պատմություն	Taj Mahal: An Eternal Love Story	Շահ Ջահան
2009	Երկնագույն անդունդ	Blue	կապիտան Ջագատ Մալհոտրա
2010	Օդային օձեր	Kites	Բոբ Գրովեր
2010	Չգիտեմ ինչու	Dunno Y Na Jaane Kyun	-
2011	Սեր` ի հեճուկս	Yaara O Dildaara	Կարամ Սինգհ Սանդհա
2011	Հանդիպեցինք մենք...	Miley - Naa Miley - Hum	Սիդհարթհ Մեհրա
2013	Բուդդա	Buddha: Rajaon ka Raja	Ասիտա Մունի
2015	Անարկալի	Anarkali	Ջաֆար Իմամ
2015	Սիրահարվածները	Dilwale	Դև Մալիկ
2016	Ձեր ուրախությունները	Teraa Surroor	Խան
2016	Մոհենջո Դարո	Mohenjo Daro	Մահամ

Ծանոթագրություններ

Վիքիպահեստն ունի նյութեր, որոնք վերաբերում են «Կաբիր Բեդի» հոդվածին։