Բարեկամություն (մետրոյի կայարան)

«Բարեկամություն» կայարան

Երևանի մետրոպոլիտեն

Բացման թվական	1981 թ. մարտի 7
Շրջան	Արաբկիր
Ճարտարապետներ	Ֆենիքս Դարբինյան^[1]
Ելք դեպի փողոցներ	Մարշալ Բաղրամյան պողոտա, Կիևյան, Կալենցի, Կասյան, Հրաչյա Քոչարի փողոցներ (մոտ է Կոմիտասի պողոտային)
Վերերկրյա տրանսպորտ	ավտոբուսներ №1, №37, №45, տրոլեյբուս №9

Երևանի մետրոպոլիտեն

պայմանական նշաններ

«Բարեկամություն», Երևանի մետրոպոլիտենի կայարան, որը բացվել է 1981 թ. մարտի 7-ին։ «Բարեկամությունն» այժմ վերջին կայարանն է, սակայն կառուցվում են «Աջափնյակ» և «Նազարբեկյան» կայարանները, որոնք կշարունակեն գիծը։

Կայարանը գտնվում է Երևանի կենտրոնում՝ Արաբկիր թաղամասի Բարեկամության հրապարակում, և դուրս է գալիս Կիևյան, Կալենցի փողոցների, Բաղրամյանի և Կոմիտասի պողոտաների վրա^[1]։ Ապագայում կայարանը կդառնա տեղափոխային №1 և №2 (կառուցվող) գծերի միջև։

Կայարանի ճարտարապետն է Հայաստանի վաստակավոր ճարտարապետ Ֆենիքս Դարբինյանը, իսկ «Ժողովուրդների բարեկամություն» խորաքանդակի հեղինակը՝ քանդակագործ, ՀԽՍՀ ժողովրդական նկարիչ Ղուկաս Չուբարյանը^[1]։ Կայարանի գլխավոր կոնստրուկտորն է Գերասիմ Գևորգյանը^[2]։

Կայարանի նկարագրություն

Նախասրահը հատակը սալապատված է Փամբակի և Լենինաբադի (Տաջիկստան) բաց գույնի գրանիտով։ Պատերը պատված են Արմավիրի կարմիր տուֆով, իսկ առաստաղը պատրաստված է սակմիդրան ձայնամեկուսիչ նյութից պատրաստված 30×30 սմ չափսի սալիկներով^[2]։

Ստորգետնյա սյունազարդ կայարանի դահլիճի լայնությունը 14-19 մետր է, իսկ երկարությունը` 100 մետր։ Թաղային ծածկերով երեք մասի բաժանված կայարանի կենտրոնական հատվածում գտնվում է Ղուկաս Չուբարյանի խորաքանդակը։ Հատակը գրանիտե է, նրա երկու կողմերում 115 մետր երկարությամբ և 20 սմ լայնությամբ հղկված բազալտե սև շերտ է, որը գնացք նստելիս և իջնելիս ուղևորներին պաշտպանում է սայթաքելուց։ Սրահի պատերը երեսպատված են Աղվերանի բաց գույնի մարմարով^[2]։