Մարշալ Բաղրամյան (մետրոյի կայարան)

«Մարշալ Բաղրամյան» (նախկին անվանումը՝ «Սարալանջի»), Երևանի մետրոպոլիտենի կայարան, որը բացվել է 1981 թվականի մարտի 7-ին։ Կայարանը գտնվում է Երևանի Արաբկիր վարչական շրջանում և դուրս է գալիս Մարշալ Բաղրամյան պողոտա՝ ՀՀ վարչապետի նստավայրի, ՀՀ Ազգային ժողովի շենքի և Սիրահարների զբոսայգու հարևանությամբ^[1]։

Մինչև 1983 թվականը կայարանը կրել է «Սարալանջի» անվանումը։ 1983 թվականին անվանակոչվել է հայ մեծանուն զորահրամանատար, Խորհրդային Միության կրկնակի հերոս, ԽՍՀՄ մարշալ Հովհաննես Բաղրամյանի պատվին^[1]։

Կայարանի ճարտարապետներն են ՀԽՍՀ վաստակավոր ճարտարապետ Սպարտակ Կնտեղցյանը^[2] և ՀՀ վաստակավոր ճարտարապետ Ալբերտ Զուրաբյանը^[1]։ Կայարանի գլխավոր կոնստրուկտորն է Իլյա Մանուչարյանը^[3]։