Էլեոնորա Մանդալյան

Էլեոնորա Մանդալյան (անգլ.՝ Eleonora Mandalian, օգոստոսի 6, 1939(1939-08-06), Մոսկվա, ԽՍՀՄ), գրող, քանդակագործ, նկարիչ, լրագրող, մանկավարժ։

Էլեոնորա Մանդալյան
Ծնվել է	օգոստոսի 6, 1939(1939-08-06) (84 տարեկան)
Ծննդավայր	Մոսկվա, ԽՍՀՄ
Մասնագիտություն	մանկագիր, լրագրող, գրող և սցենարիստ
Լեզու	ռուսերեն
Քաղաքացիություն	ԽՍՀՄ և  ԱՄՆ
Կրթություն	Երևանի թատրոնի և կինոյի պետական ինստիտուտ
Eleonora Mandalian Վիքիպահեստում

Կենսագրություն

Էլեոնորա Մանդալյանը ծնվել է Մոսկվայում։ Սովորել է տեղի № 47 միջնակարգ դպրոցում։

1959 թվականին տեղափոխվել է Երևան՝ պայմանավորված ամուսնությամբ։ 1964 թվականին ավարտել է Երևանի գեղարվեստի ակադեմիայի (նախկինում՝ Արվեստի և թատրոնի ինստիտուտ) քանդակագործության ֆակուլտետը։ Աշխատել է «Հայֆիլմ» կինոընկերությունում՝ որպես կինոյի նկարիչ, ապա՝ նկարիչ-մուլտիպլիկատոր։

Մանդալյանի քանդակները կանոնավոր կերպով ցուցադրվել են Հայաստանի նկարիչների միության ցուցահանդեսներում։ Զուգահեռ Երևանի № 71 դպրոցում 20 տարի շարունակ դասավանդել է կերամիկական և կիրառական արվեստի փորձարարական դասընթացներ՝ օգտագործելով իր սեփական մեթոդիկան և ծրագիրը։ Ռուսաստանի մանկավարժական գիտությունների ակադեմիայում պաշտպանել է թեկնածուական ատենախոսություն մանկավարժության ոլորտում։

1964 թվականից մինչ օրս զբաղվում է լրագրությամբ։ 1990 թվականին ամուսնու և երկու որդիների հետ տեղափոխվել է Մոսկվա։ Աշխատել է ԽՍՀՄ Պետկինոյում («Սիրին» ընկերություն)՝ որպես սցենարիստ, ապա՝ Ռուսաստանի կրթության ակադեմիայի գեղարվեստական կրթության և մշակութաբանության ինստիտուտում՝ որպես ավագ գիտաշխատող։

1994 թվականից առ այսօր ընտանիքի հետ ապրում է ԱՄՆ-ում՝ Լոս Անջելեսում։ Աշխատել է որպես «Պանոմարա» ալմանախի խմբագիր և վարել «Անճանաչելի» խորագիրը կրող սյունակը, այնուհետև եղել է Կենսաբանական իմիջների ինստիտուտի համակարգչային դիզայները։

Ստեղծագործություններ

Մանդալյանն ունի ավելի քան երեք տասնյակ հրատարակված գիրք գիտական ֆանտաստիկայի և ֆենտեզի ժանրում՝ հեղինակային ժողովածուներ, մասնակցություն ալմանախներին։ Խորհրդային տարիներին տպագրվել է «Մանկական գրականություն», «Երիտասարդ գվարդիա», «Խորհրդային գրող․ Օլիմպոս», «Խորհրդային գրող» հրատարակչություններում, «Որոնող», «Գիտություն և կրոն», «Գրական Հայաստան» ամսագրերում։

Երևանում պարբերաբար տպագրվել է «Կոմունիստ» կենտրոնական թերթում (արվեստի և մանկավարժության մասին հոդվածներ), «Լիտերատուրնայա Արմենիա» ամսագրում (գեղարվեստական ստեղծագործություններ), «Ծիծեռնակ» և «Պիոներ» մանկական ամսագրերում (նկարազարդումներ, հոդվածներ), «Ոզնի» կատակերգական ամսագրում (ծաղրանկարներ)։

Ամերիկայում բնակվելու տարիներին Էլեոնորա Մանդալյանը ավելի քան հազար հոդված է գրել ռուսալեզու թերթերի ու ամսագրերի համար։ Դրանց թվում են՝ «Փաստեր և փաստարկներ», «Կոմսոմոլսկայա պրավդա», հայկական ամսագիր «Նոյան տապան» (Մոսկվա), «Նոր ռուսական խոսք» (Նյու Յորք), «Պանորամա» (Լոս Անջելոս), «Նոր Լույսի ներքո» (Նյու Յորք)։ Տպագրվել է նաև մի շարք ամսագրերում՝ «Seagull» (Բալթիմոր), «Մտահորիզոն» (Բոստոն) և «Նոր ոճ» (Անգլիա)։

2012 թվականին ԱՄՆ-ում հրատարակվել է Էլեոնորա Մանդալյանի «Չարի անատոմիան» գիտաֆանտաստիկ վեպը։

2016-2017 թվականներին Մանդալյանի ստեղծագործությունների ամբողջական ժողովածուն թողարկվել է էլեկտրոնային և աուդիո գրքերով, որոնք վաճառքի են հանվել բոլոր խոշոր ինտերնետ-խանութներում, այդ թվում՝ «Amazon», «Google Play», «LitRes»։

Ձեռքբերումներ

• Մանկավարժական գիտությունների թեկնածու
• ԽՍՀՄ Գրողների միության անդամ
• ԽՍՀՄ ժուռնալիստների միության անդամ
• ԽՍՀՄ նկարիչների միության անդամ
• Ռուսաստանի գրողների միության անդամ
• 74-րդ համարը Հայաստանի ընտրյալ անձանց ցուցակում
• «Տարվա գրող 2014» և «Տարվա գրող 2016» մրցանակների դափնեկիր՝ համապատասխան ալմանախների հրատարակմամբ

Արտաքին հղումներ

• Էլեոնորա Մանդալյանի հեղինակային էջը Чайка ամսագրի կայքում
• Էլեոնորա Մանդալյանը Проза.ру կայքում
• Էլեոնորա Մանդալյան - Google+

Վիքիպահեստն ունի նյութեր, որոնք վերաբերում են «Էլեոնորա Մանդալյան» հոդվածին։