Աշոտ Ադամյան (դերասան)
Անվան այլ կիրառումների համար տե՛ս՝ Աշոտ Ադամյան (այլ կիրառումներ)- Վիքիպեդիայում կան հոդվածներ Ադամյան ազգանունով այլ մարդկանց մասին։
Աշոտ Կառլոսի Ադամյան (փետրվարի 14, 1953[1], Երևան, Հայկական ԽՍՀ, ԽՍՀՄ), կինոյի և թատրոնի հայ դերասան, բեմադրիչ։
 | |
|---|---|
| Ծնվել է | փետրվարի 14, 1953[1] (71 տարեկան) |
| Ծննդավայր | Երևան, Հայկական ԽՍՀ, ԽՍՀՄ |
| Կրթություն | Հայկական պետական մանկավարժական համալսարան և Սցենարիստների և ռեժիսորների բարձրագույն դասընթացներ (1991) |
| Քաղաքացիություն |  Հայաստան |
| Մասնագիտություն | դերասան և կինոդերասան |
| Ակտիվ շրջան | 1980-ից սկսած |
| Ընտրանի | «Կտոր մը երկինք» «Հին օրերի երգը» «Տերը» |
| Անդամություն | Հայաստանի կինեմատոգրաֆիստների միություն |
| ashotadamyan.com | |
Կենսագրություն
խմբագրելԱշոտ Ադամյանը ծնվել է 1953 թվականի փետրվարի 14-ին Երևանում։ 1972 թվականին ավարտել է Երևանի Թամանյանի անվան շինարարական տեխնիկումի ճարտարապետական բաժինը։ Ուսումը շարունակել է Երևանի Խ.Աբովյանի անվան մանկավարժական ինստիտուտի ռեժիսորական բաժնում՝ 1975-1979 թվականներին սովորելով Հենրիկ Մալյանի արվեստանոցում։ 1987 թվականին ընդունվել է Մոսկվայի կինոռեժիսորների և սցենարիստների բարձրագույն կուրսեր (Ռոլան Բիկովի արվեստանոց), որն ավարտել է 1991 թվականին՝ ստանալով կինոբեմադրիչի մասնագիտություն[2]։
Վաղ հասակում նվագել է հայկական առաջին ռոք խմբերում՝ «Սարդեր», «Առաքյալներ», «1+2»[3]։
Աշոտ Ադամյանը ֆիլմերում սկսել է նկարահանվել ուսանողական տարիներից. նրա առաջին դերասանական աշխատանքներից են Ա. Մանարյանի «Եվս 5 օր» (1978) և Վ. Զաքարյանի «Խոնարհվիր գալիք օրվան» (1977) գեղարվեստական ֆիլմում։ Հետագայում խաղացել է ավելի քան 40 ֆիլմերում։ 1980 թվականին մասնակցել է Հենրիկ Մալյանի անվան թատրոնի հիմնադրմանը, այնտեղ աշխատել է որպես բեմադրող ռեժիսոր և դերասան, հետագայում՝ գեղարվեստական ղեկավար։ Բեմադրել է Դերենիկ Դեմիրճյանի «Քաջ Նազար», Անույի «Օրկեստր», Շտոկի «Աստվածային կատակերգություն» ներկայացումները։ 1982 թվականից Հայաստանի Կինեմատոգրաֆիստների միության, 1997 թվականից՝ «AMFA» հայ կինոգործիչների միջազգային կազմակերպության անդամ է։
1996 թվականին Աշոտ Ադամյանը ձայնագրել է իր առաջին՝ «Դլե մը կոնդե» երաժշտական ալբոմը, որում ներառված են հայկական ժողովրդական հին երգերի մշակումներ։ 1998 թվականին Լոս Անջելեսում բեմադրել է Արամունու «Պողոս քեռու այցը», 2005 թվականին Երևանում՝ Սլեյդի «Ամեն տարի նույն օրը» պիեսները։ 2002 թ. Վիեննայում մասնակցել է «Տրուբադուրներ» փառատոնին՝ ներկայացնելով «Հայկական ժողովրդական երգը մինչև Սայաթ-Նովա և նրանից հետո» ծրագիրը և Վիեննայի սիմֆոնիկ նվագախմբի հետ համատեղ կատարել է Սայաթ-Նովայի «Թամամ աշխարհ պտուտ եկա» երգի մշակումը։ 2003 թ․ Առաջին ալիքով (հետագայում՝ Շանթով) վարել է «Ո՞վ է ուզում դառնալ միլիոնատեր» հեռուստախաղը[4]։
2008 թվականին եղել է «Ոսկե Ծիրան» կինոփառատոնի ժյուրիի անդամ, Թեհրանում բեմադրել է Վիլյամ Սարոյանի 100-ամյակին նվիրված «Ուզենք, չուզենք, հայ ենք» ներկայացումը, անցկացրել է արվեստի դասընթացներ։ 2009 թվականին խաղացել է Հրանտ Մաթևոսյանի «Մեծամոր» մոնոներկայացման մեջ և արժանացել է ՀԹԳՄ «Արտավազդ» մրցանակի տղամարդու լավագույն դերակատարման համար։ Զբաղվում է հայկական ժողովրդական հեքիաթների մշակմամբ։ 2010 թվականին Դ. Մաթևոսյանի հետ համատեղ նկարահանել է «Մենք ենք…» ֆիլմը՝ նվիրված «Մենք ենք, մեր սարերը» ֆիլմի 40-ամյակն[3]։ 2012 թվականին «Շահխաթուն» ՀԿ-ի հետ սեփական սցենարով նկարահանել է «Ճեպանկարներ» կարճամետրաժ ֆիլմը։ 2012 թվականին Ջենովայի պոեզիայի փառատոնին ներկայացրել է իր «Դլը Մկոնդե» երաժշտական ալբոմից մի քանի երգ և հիացրել իտալացի հանդիսականին։ Ազգային կինոյի «Հայակ-2014» մրցանակաբաշխության ժամանակ «Անպոչ ճգնավոր» ֆիլմում երկրորդական դերի լավագույն դերակատարման համար ստացել է «Հայակ» մրցանակը։ Իսկ 2015 թվականի դեկտեմբերի 2-ին «Salento» միջազգային կինոփառատոնի տնօրեն Լուիջի Կամպանիլեն կինոյի և թատրոնի դերասան, բեմադրիչ Աշոտ Ադամյանին հանձնել է «Salento» միջազգային կինոփառատոնի դերասանական մրցանակը, որը տրվում է փառատոնը հյուրընկալող երկրի կինոասպարեզում և երկրից դուրս ավանդ ունեցած ակնառու դերասանի[5]։
Ֆիլմագրություն
խմբագրել| Տարի | Անվանում | Դեր
| |
|---|---|---|---|
| 1977 | ֆ | Խոնարհվիր գալիք օրվան | Նավաստի |
| 1978 | ֆ | Եվս հինգ օր | Հովիկ |
| 1980 | ֆ | Համր վկան | Կապիտան Դանիելյան |
| 1980 | ֆ | Կտոր մը երկինք | Թորիկ |
| 1981 | ֆ | Սիրո փոքրիկ սպասում | Հրաձգարանի աշխատակից |
| 1982 | ֆ | Մի կաթիլ մեղրը | Հերոսներ |
| 1982 | ֆ | Տերը | Վարորդ |
| 1982 | ֆ | Հին օրերի երգը | Օբերոն |
| 1983 | ֆ | Վերադարձի գինը | Հայկ Մայդերոսով |
| 1984 | ֆ | Մենք կրկին կհանդիպենք | Նաթանաել |
| 1984 | ֆ | Արահետ դեպի երկինք | Օդաչու |
| 1985 | ֆ | Ո՞ւր ես գնում, զինվոր | Հունան |
| 1991 | ֆ | Ժամկետը յոթ օր | Տղամարդ |
| 1993 | ֆ | Օրացույց | Գիդ-վարորդ |
| 2005 | ֆ | Արահետ | Տիգրան և Աշոտ |
| 2006 | ֆ | Սև-սպիտակ ծիածան | Պողիկտոս |
| 2007 | ֆ | Թշնամիներ | Յուսուֆ |
| 2009 | ֆ | Տաք երկիր, ցուրտ ձմեռ | գլխավոր դեր |
| 2009 | ֆ | Փախուստ | Սամվել (Քերոբ) |
| 2013 | ֆ | Լուսավորիչը | Հերոս |
| 2013 | ֆ | Անպոչ ճգնավոր | Տիրան |
| 2013 | ֆ | MUNDO INVISÍVEL | Հերոս |
| 2014 | ֆ | Փասիանի որսորդը | Հայր |
| 2015 | ֆ | Եվ յոթերորդ օրը… | Պապ |
| 2015 | ֆ | 28:94 Local Time | Տիգրան |
| 2015 | ֆ | Մարիամ | Նկարիչ |
Ծանոթագրություններ
խմբագրել- ↑ 1,0 1,1 https://www.adorocinema.com/personalidades/personalidade-16515/
- ↑ Адамян Ашот Карлович (ռուս.)
- ↑ 3,0 3,1 «Աշոտ Ադամյան».
- ↑ «ArmeniaNow.com - Independent Journalism From Today`s Armenia». archives.armenianow.com. Վերցված է 2020 թ․ ապրիլի 27-ին.
- ↑ «Սալենտո» միջազգային կինոփառատոնը՝ Երևանում(չաշխատող հղում)