Մարի Քոլիեր
Մարի Էլիզաբեթ Քոլիեր (անգլ.՝ Marie Elizabeth Collier, ապրիլի 16, 1927[1], Բալլարատ - դեկտեմբերի 8, 1971[1], Լոնդոն, Միացյալ Թագավորություն), ավստրալիացի օպերային սոպրանո[2]։
Մարի Քոլիեր | |
---|---|
Ծնվել է | ապրիլի 16, 1927[1] Բալլարատ |
Երկիր | Ավստրալիա |
Մահացել է | դեկտեմբերի 8, 1971[1] (44 տարեկան) Լոնդոն, Միացյալ Թագավորություն |
Մասնագիտություն | օպերային երգչուհի |
Երգչաձայն | սոպրանո |
Գործիքներ | վոկալ |
Կրթություն | Camberwell High School? |
Ծնվել է Ավստրալիայի Վիկտորիա նահանգի Բալարատ քաղաքում, երկաթուղային կայարանի աշխատակից Թոմաս Ռոբինսոն Քոլիերի (1894–1962) և վերջինիս կնոջ՝ Աննի Մարիի ընտանիքում[2]։ 1941-1943 թվականներին հաճախել է Մելբուռնի արևելյան արվարձանում գտնվող Քեմբերվել ավագ դպրոցը[2][3]։ Դաստակի կոտրվածքի պատճառով ստիպված է եղել թողնել դաշնամուրն ու սկսել երգել[2]։ Առաջին անգամ հանրությանը ներկայացել է 1952 թվականի մարտին՝ Մելբուռնի ազգային օպերային թատրոնում կատարելով Սանտուցայի դերերգը «Գեղջկական ասպետություն» օպերայից[2]։ Նույն թվականի դեկտեմբերի 10-ին ամուսնացել է ինժեներ Վիկտոր Բենջամին Վորմերգի հետ[2] և ունեցել դուստր և երեք որդի։ Ավստրալիայում հայտնիություն է ձեռք բերել 1953–54 թվականներին՝ Ջան Կարլո Մենոտտիի «Հյուպատոսը» օպերայից կատարելով Մագդա Սորելի դերը[2], որով Մելբուռնում, Սիդնեյում և գավառներում հանդես է եկել յոթանասունհինգ անգամ։
1955 թվականին ուսանել է Միլանում, որտեղ նրան լսել է լորդ Հերվուդը[2], որից հետո նրան պայմանագիր է առաջարկվել որպես կանոնավոր անդամ հանդես գալու Կովենտ գարդեն արքունական թատրոնում։ Այնտեղ դեբյուտը կատարել է 1956 թվականին «Կախարդական սրինգ» օպերայից առաջին տիկնոջ դերերգով։ 1962 թվականի մայիսին Քովենտրի քաղաքում Մայքլ Տիպետի «Պրիամ արքա» օպերայի պրեմիերայի ժամանակ մարմնավորել է Հեկաբե թագուհուն։ Կովենտ գարդենում 1963 թվականի դեկտեմբերի 2-ին տեղի ունեցած Շոստակովիչի «Կատերինա Իզմայլովա» օպերայի պրեմիերային[4] և 1964 թվականի փետրվարի 12-ին Սադլերս Վելզ թատրոնում տեղի ունեցած Յանաչեկի «Մակրոպուլոսի միջոցները» օպերայի պրեմիերայի ժամանակ հանդես է եկել գլխավոր դերերում[5]։
Հետագա համերգաշրջանների ընթացքում Կովենտ գարդենում կերտել է նաև Մուսետային «Բոհեմ» օպերայից, Ջուլիետային «Հոֆմանի հեքիաթները» օպերայից, Լիուին «Տուրանդոտ» օպերայից, Ֆլորային «Տրավիատա» օպերայից, Բատերֆլային «Մադամ Բատերֆլայ» օպերայից և 1963 թվականին բեմադրված «Տոսկա» օպերայի գլխավոր հերոսուհուն։ 1960 թվականի մայիսին նրա կատարմամբ Մուսետայի դերերգի մասին Էվան Սենիորն ասել է․ «Դա այդ դերի ամենազարմանալի և տպավորիչ դերակատարումն ու լիարժեք երգեցողությունն էր, որ ես երբևէ տեսել կամ լսել էի»[2]։
Կովենտ գարդենում Տոսկայի դերակատարի ամենահանրահայտ փոխարինողն էր․ երբ Մարիա Կալասը չեղարկել է նախատեսված չորս կատարումներից երեքը, Քոլիերը փոխարինել է նրան և արժանացել մեծ գնահատանքի[6]։
1967 թվականին Մետրոպոլիտեն օպերայում Մարվին Դավիդ Լևիի «Սուգը դառնում է էլեկտրա» օպերայի համաշխարհային պրեմիերայի ժամանակ մարմնավորել է Քրիստին Մանոնին[7]։ Մետրոպոլիտեն օպերայում կերտած նրա դերերից էին նաև Մուսետան, Տոսկան և Սանտուցան[8]։
1968 թվականին մասնակցել է Ավստրալիայում առաջին օպերային հեռարձակմանը[9]։
Սըր Գեորգ Շոլթիի դիրիժորությամբ Շտրաուսի «Էլեկտրա» օպերայի հանրահայտ ձայնագրության մեջ հանդես է եկել Քրիսոթեմիսի դերակատարմամբ, որտեղ Բիրգիտ Նիլսոնը կատարում էր գլխավոր դերը[10]։
Վախճանվել է Լոնդոնում 44 տարեկան հասակում՝ պատուհանից պատահաբար ցած ընկելու հետևանքով[2]։ Դրանից կարճ ժամանակ առաջ ընտրվել էր Կովենտ գարդենում Բեռլիոզի «Տրոյացիներ» օպերայում Կասսանդրայի դերը կատարելու համար։
Ծանոթագրություններ
խմբագրել- ↑ 1,0 1,1 1,2 1,3 1,4 Discogs — 2000.
- ↑ 2,00 2,01 2,02 2,03 2,04 2,05 2,06 2,07 2,08 2,09 Radic, Thérèse (1993). «Biography – Marie Elizabeth Collier». Australian Dictionary of Biography. Australian National University. Վերցված է 2014 թ․ օգոստոսի 13-ին.
- ↑ http://www.chessmoves.com/mariecollier.htm Արխիվացված 7 Հունվար 2012 Wayback Machine
- ↑ The Musical Times, Vol. 104 No. 1450 (December 1963), p. 878
- ↑ The Musical Times, Vol. 105, No. 1451 (January 1964), p. 78
- ↑ "How we made: Franco Zeffirelli and John Tooley on Tosca (1964)" by Anna Timms, The Guardian, 24 July 2012
- ↑ "Restoring Luster to a Dark Melodrama" by Anthony Tommasini, The New York Times, 13 October 1998]
- ↑ http://archives.metoperafamily.org/archives
- ↑ «LISTSERV 15.5 - OPERA-L Archives». Արխիվացված է օրիգինալից 2011 թ․ հուլիսի 25-ին. Վերցված է 2016 թ․ դեկտեմբերի 18-ին.
- ↑ Strauss: Elektra
Արտաքին հղումներ
խմբագրել- Marie Collier Collection in the Performing Arts Collection, the Arts Centre, Melbourne (magazine and newspaper clippings, photographs, programmes, scrapbooks etc.)
- "Marie Collier in Tosca, 1963 picture, at National Library of Australia