Գրիշա Սահակյան

Վիքիպեդիայում կան հոդվածներ Սահակյան ազգանունով այլ մարդկանց մասին։

Գրիշա Հարությունի Սահակյան (հոկտեմբերի 30, 1947(1947-10-30) - օգոստոսի 25, 2010(2010-08-25)), հայ բեմանկարիչ։ ՀՀ մշակույթի վաստակավոր գործիչ (2006)։

Գրիշա Հարությունի Սահակյան
Ծնվել է	հոկտեմբերի 30, 1947(1947-10-30)
Վախճանվել է	օգոստոսի 25, 2010(2010-08-25) (62 տարեկան)
Կրթություն	Փանոս Թերլեմեզյանի անվան գեղարվեստի պետական քոլեջ և Երևանի պետական գեղարվեստա-թատերական ինստիտուտ
Մասնագիտություն	նկարիչ
Պարգևներ	Հայաստանի Հանրապետության մշակույթի վաստակավոր գործիչ
Անդամակցություն	Հայաստանի նկարիչների միություն և Հայաստանի թատերական գործիչների միություն
Հայր	Հարություն Սահակյան

Գեղանկարիչ, բեմանկարիչ Հարություն Սահակյանի որդին։

Կենսագրություն

Գրիշա Սահակյանը ծնվել է Լենինականում։ Սովորել է Սերգեյ Մերկուրովի անվան նկարչական դպրոցում, 1961-1965 թվականներին՝ Երևանի Փանոս Թերլեմեզյանի անվան գեղարվեստի ուսումնարանում, 1967-1974 թվականներին՝ Երևանի գեղարվեստա-թատերական ինստիտուտում։ Ուման հետ համատեղ 1967-1979 թվականներին եղել է ինստիտուտի ուսումնական թատրոնի գլխավոր նկարիչը։ 1973-1979 թվականներին նշանակվել է Արտաշատի Ամո Խարազյանի անվան, 1979 թվականից՝ Երևանի Հակոբ Պարոնյանի անվան երաժշտական կոմեդիայի պետական թատրոնի գլխավոր նկարիչ։

1970-ականներին ձևավորումներ է արել Ստեփանակերտի պետական թատրոնում։ 1984 թվականից եղել է Հայաստանի նկարիչների և թատերական գործիչների միությունների անդամ։ 1986 թվականին նշանակվել է Երևանի Պատանի հանդիսատեսի թատրոնի գլխավոր նկարիչ։ Երկար տարիներ դասավանդել է Երևանի թատրոնի և կինոյի պետական ինստիտուտում` ղեկավարելով բեմանկարչության բաժինը, 2000 թվականից` պրոֆեսոր։

1980-ականներին ձևավորել է մի քանի տասնյակ հեռուստաներկայացումներ։ Ձևավորած ներկայացումներից են`

• Ժիրայր Անանյան - «Տաքսի, տաքսի»
• Մ. Դարվաշ - «Միայն քեզ եմ սիրում»
• Է. ԴեՖիլիպո - «Չեմ վճարի»
• Ա. Պապայան - «Արևը ձեզ հետ»
• Գ. Տեր-Գրիգորյան - «Զգուշացեք, նա դեռ կա»
• Ա. Այվազյան, Հ. Պարոնյան - «Ատամնաբույժն արևելյան»
• Ա. Պապայան - «Մեծ հարսանիք»
• Ժ. Հարությունյան - «Բախտավոր մարդիկ»
• Վ. Սոլոգուբ - «Քնքուշ սրտից պատուհաս»
• Ժ. Անանյան - «Տեր, մի թող մեզ անտեր»
• Գ. Սունդուկյան - «Խաթաբալա»
• Դ. Ֆսաֆաս - «Պահանջվում է ստախոս»
• Է. ԴեՖիլիպո - «Ֆիլումենա Մարտուրանո»

Նկարչական ձևավորումներ է արել Հայաստանի բոլոր թատրոններում՝

• Երևանի Ալեքսանդր Սպենդիարյանի անվան օպերայի և բալետի ակադեմիական թատրոնում`
• «Անուշ»
• «Արշակ Երկրորդ»

Նկարչական ձևավորումներ է իրականացրել նաև Մոսկվայում, Վիլնյուսում, Մախաչկալայում, Դոնի Ռոստովում, Կաստրամայում և այլուր։

Նրա մի շարք նկարներ տեղ են գտել աշխարհի տարբեր պատկերասրահներում և մասնավոր հավաքածուներում։

Անհատական ցուցահանդեսներ

Ունեցել է անհատական ցուցահանդեսներ՝

• Երևանում (1968, 1971, 1985)
• Մոսկվայում (1988, 1998)
• Փարիզում, Լոնդոնում (1990)
• Վարշավայում (1991)
• Դոնի-Ռոստովում (1992)
• Կաստրամայում (1998)
• Բուլղարիայում (1999)

Մրցանակներ և կոչումներ

• ՀԹԳՄ «Արտավազդ» մրցանակ լավագույն բեմանկարչական աշխատանքի համար, 2006,2010
• Հայաստանի Հանրապետության մշակույթի վաստակավոր գործիչ, 2006