Արփենիկ Հակոբյան
- Վիքիպեդիայում կան հոդվածներ Հակոբյան ազգանունով այլ մարդկանց մասին։
Արփենիկ Վիգենի Հակոբյան (1987, սեպտեմբերի 24, Երևան, Հայաստան), թավջութակահար[1][2], բելգիական «Արաքս» երաժշտական խմբի անդամ։
Արփենիկ Հակոբյան | |
---|---|
Ծնվել է | 1987, սեպտեմբերի 24 Երևան, Հայաստան |
Երկիր | Հայաստան |
Մասնագիտություն | թավջութակահար, բելգիական «Արաքս» երաժշտական խմբի անդամ |
Կենսագրություն
խմբագրելԱրփենիկ Հակոբյանը ծնվել է 1987 թվականի սեպտեմբերի 24-ին Երևանում[3]։ 1995 թվականին ընդունվել է Երևանի Սարգիս Ասլամազյանի անվան երաժշտական դպրոցը և սովորել թավջութակի ու դաշնամուրի դասարաններում։ Երաժշտական կրթությունը շարունակել է 1999 թվականին՝ Պյոտր Չայկովսկու անվան միջնակարգ մասնագիտական դպրոցի Մեդեա Աբրահամյանի թավջութակի դասարանում, որտեղ ստացել է տաղանդաշատ պատանիների կրթաթոշակ։ 2003 թվականին ընդունվել է Երևանի թատրոնի և կինոյի պետական ինստիտուտի դերասանական ֆակուլտետ՝ Արմեն Էլբակյանի արվեստանոց։ Հետագայում՝ 2005 թվականից կրթությունը շարունակել է ԱՄՆ-ում և Եվրոպայում։ 2009 թվականից սովորել է Անտվերպենի թագավորական կոնսերվատորիայում՝ Բելգիայի պետական նվագախմբի մենակատար Օ.Լեկայի դասարանում, իսկ 2012 թվականից՝ Գենտի կոնսերվատորիայում՝ գերմանացի պրոֆեսոր Յ.Էրմերթի թավջութակի դասարանում։ Արփենիկը 2013 թվականին որպես երաժիշտ-կատարող ավարտել է բակալավրիատը և շարունակել կրթությունը նույն կոնսերվատորիայի մագիստրատուրայում։
Արփենիկ Հակոբյանի համագործակցել է մի շարք երաժիշտների և երգիչների հետ, որոնցից են Խաչիկ Սահակյանը, Վարդան Առաքելյանը, Արման Ջալալյանը, Գոռ Սուջյանը, Տիգրան Պետրոսյանը, Անի Սահակյանը, Արման Փահլևանյանը, Արթուր Սողոյանը, Տիգրան Տեր-Ստեփանյանը, ինչպես նաև «Դորիանս», «Նուզ» խմբերը։ 2010 թվականից դարձել է բելգիական «Արաքս» երաժշտական խմբի անդամ։
Միջոցառումներ
խմբագրելԱրփենիկ Հակոբյանը 2008 թվականին ԱՄՆ-ի Թենեսի նահանգում մասնակցել է «Սեուաննի» ամառային դասական երաժշտական փառատոնին՝ որպես կամերային կատարող և մենակատար, իսկ Բերն քաղաքում՝ «Էմ Էս Էյ» երգչախմբային և նվագախմբային նախագծին։
2009 թվականին նա ԱՄՆ-ի Հարավային Կարոլինա նահանգում մասնակցել է «ՅուԷսՍի» աշխարհի ջազ սիմֆոնիայի նախագծին, Ս.Զեկոպսենի ղեկավարությամբ, որպես մենակատար-թավջութակահար և Ֆրանսիայի Ռուբէ քաղաքում եղել է Ալբեկի փողային նվագախմբի սիմֆոնիկ նախագծի առաջատար թավջութակահարը։
2008 թվականից Արփենիկը մասնակցել է տարբեր համերգների, նախագծերի, վարպետության դասերի՝ Գլեն Հյուզի, Դերեկ Շերինյանի, Սերժ Թանկյանի, Ալան Մունիերի, Լուիս Կլաբերի, Մարիա Կլիգելի, Նատալի Գութմանի, Միշա Մայսկիի մասնակցությամբ։
Ծանոթագրություններ
խմբագրել- ↑ Mediamax. «Արփենիկ Հակոբյան. "Ոչ թե ես եմ ընտրել այս ոլորտը, այլ այն է ընտրել ինձ"». Bravo.am. Վերցված է 2020 թ․ մարտի 24-ին.
- ↑ «Պրեմիերա. Արփենիկ Հակոբյան - Land of mine». style.news.am. Վերցված է 2020 թ․ մարտի 24-ին.
- ↑ «Zarkfoundation - Արփենիկ Հակոբյան». zarkfoundation.com.