Ռեգինա Պաչինի

Ռեգինա Պաչինի
Բնօրինակ անուն	պորտ.՝ Regina Isabel Luisa Pacini Quintero de Alvear
Ի ծնե անուն	պորտ.՝ Regina Isabel Luisa Pacini Quintero
Ծնվել է	հունվարի 6, 1871; Լիսաբոն, Պորտուգալիա
Երկիր	Արգենտինա, Պորտուգալիայի թագավորություն և Պորտուգալիա
Մահացել է	սեպտեմբերի 18, 1965 (94 տարեկան); Բուենոս Այրես, Արգենտինա
Գերեզման	Ռեկոլետա գերեզմանատուն
Մասնագիտություն	օպերային երգչուհի
Երգչաձայն	սոպրանո
Գործիքներ	վոկալ
Ամուսին	Marcelo Torcuato de Alvear?
Պարգևներ	Պատվավոր Լեգեոնի շքանշան
	Regina Pacini Վիքիպահեստում

Ռեգինա Պաչինի (Regina Isabel Luisa Pacini Quintero հունվարի 6, 1871(1871-01-06)^[1], Լիսաբոն, Պորտուգալիա - սեպտեմբերի 18, 1965(1965-09-18)^[1], Բուենոս Այրես, Արգենտինա), օպերային անվանի երգչուհի, քնարական սոպրանո, եղել է Արգենտինայի Հանրապետության առաջին տիկին, հայտնի մարդասեր, բարերար

Կենսագրություն

Ռեգինա Պաչինին ծնվել է 1871 թվականի հունվարի 6-ին, Պորտուգալիայի մայրաքաղաք Լիսաբոնում։ Հայրը օպերային երգիչ, ծագումով իտալացի Պիետրո Պաչինին^[2] էր, որն այդ ժամանակ ղեկավարում էր Լիսաբոնի Սան Կառլոս թատրոնը, մայրը՝ իսպանուհի Ֆելիսա Քինտերոն։ Ռեգինան երաժշտական կրթություն ստացել է Փարիզում, Մաթիլդա Մարկեզիի հետ, որը հետագայում դարձավ օպերային համբավավոր երգչուհի։ Պաչինիի առաջնելույթը տեղի է ունեցել 1888 թվականին. Լիսաբոնի թատրոնում նա հանդես է եկել Բելլինիի «Սոնամբուլա» օպերայում՝ կատարելով Ամինայի դերերգը։ Հաջողությունն ուղեկցել է երգչուհուն ինչպես այդ, այնպես էլ հետագա ելույթների ժամանակ. Լիսաբոնի թատրոնի բեմում նա շարունակել է հանդես գալ մինչև 1904 թվականը։ 1889 թվականին հյուրախաղային ելույթներ է ունեցել Միլանում, Պալերմոյում, Լոնդոնում։ Դրանից տասը տարի անց հյուրախաղերի է մեկնել Լատինական Ամերիկա, մեծ հաջողությամբ ելույթներ ունեցել Ուրուգվայի մայրաքաղաք Մոնտեվիդեոյի Teatro Solís-ում և Արգենտինայի մայրաքաղաք Բուենոս Այրեսի Teatro Politeama-ում, որտեղ էլ հենց ծանոթացել է իր ապագա ամուսնու՝ Արգենտինայի Հանրապետության ապագա նախագահ Մարսելո Տորկվատո դե Ալվեարի հետ, ով հետևել է նրա ելույթներին աշխարհի տարբեր թատրոններում, մի քանի տարի «հետապնդել» արտիստուհուն, մինչև որ ստացել է նրա համաձայնությունը։ Լոնդոնի նշանավոր Քովենթ Գարդենում Ռեգինան եղել է հանճարեղ Էնրիկո Կարուզոյի խաղընկերը:Քսաներորդ դարասկզբին էլ երգել է իտալական մի շարք թատրոններում (Հռոմում , Ֆլորենցիայում, Նեապոլի Սան Կառլո, Միլանի համբավավոր Լա Սկալա օպերային թատրոններում^[3])): Հիշարժան ելույթներ է ունեցել նաև Մադրիդի արքայական, Վարշավայի և Սանկտ Պետերբուրգի օպերային թատրոններում։ 1907 թվականին, երբ հասել էր իր արտիստական կարիերայի գագաթնակետին, Ռեգինան ամուսնացել է Մարսելո Տորկվատո դե Ալվաորի հետ, թողել է բեմը և իրեն նվիրել բարեգործության՝ թե՛ ժամանակակիցների և թե՛ հետնորդների հիշողության մեջ մնալով որպես լավագույն առաջին տիկին և մեծ մարդասեր-բարերար։ Առաջին համաշխարհային պատերազմի տարիներին ամուսնական զույգը, ապրելով Փարիզում, աչքի է ընկել բարեգործություններով և արժանացել ֆրանսիական կառավարական բարձրագույն պարգևի՝ «Պատվո լեգեոն» շքանշանի։ 1938 թվականին Ալվեարը Բուենոս Այրեսում, Միլանի Casa Verdi-ի նմանությամբ, հիմնադրել է Casa del Teatro-ն՝ չորսուկես տասնյակ սենյակներ ունեցող հարազատ մի օջախ դերասանների և ընդհանրապես թատրոնի մարդկանց համար։ Casa del Teatro-ում մի մասնաբաժին հատկացվել էր Ռեգինային, որոշ սենյակներ էլ տրամադրվել էին երկու ոչ մեծ թանգարաններին։

Վախճանը

Ռեգինա Պաչինին մահացել է 94 տարեկան հասակում՝ 1965 թվականի սեպտեմբերի 18-ն։ Նա իր ամբողջ կարողությունը կտակել է ի նպաստ բարեգործական նախագծերի իրականացման։ Ի հիշատակ տաղանդավոր արտիստուհու և մեծ մարդասեր-բարերարի՝ նրա անունով են կոչել Արգենտինայի Ռիո Ներո պրովինցիայի քաղաքներից մեկը՝ Վիլլա Ռեգինան, ինչպես նաև՝ բանուկ փողոցներ արգենտինական մի շարք քաղաքներում^[4]։

Գրականություն

Ana Maria Cabrera, Regina y Marcelo: un duetto de amor. Editorial Sudamericana, 2001. 9500720043
Ovidio Lagos, La pasión de un aristócrata : Regina Pacini y Marcelo T. de Alvear Emecé Editores, 1993. 9500413043