Միքայել Կոստանյան
Միքայել Անդրեասի Կոստանյան (1921, Սիսիան, Հայաստան - 1979), հայ մանկավարժ, ԽՄԿԿ անդամ (1944), Երկրորդ համաշխարհային պատերազմի Արևելյան ճակատի («Հայրենական մեծ պատերազմ», 1941-1945) մասնակից։
| Միքայել Կոստանյան | |
|---|---|
| Ծնվել է | 1921 |
| Ծննդավայր | Սիսիան, Հայաստան |
| Մահացել է | 1979 |
| Քաղաքացիություն |  ԽՍՀՄ |
| Կրթություն | Հայկական պետական մանկավարժական համալսարան |
| Մասնագիտություն | մանկավարժ |
| Կուսակցություն | ԽՄԿԿ |
| Պարգևներ և մրցանակներ |  |
Կենսագրություն խմբագրել
Միքայել Կոստանյանը ծնվել է 1921 թվականին, Սիսիանում։ 1941 թվականին ավարտել է տեղի միջնակարգ դպրոցը և նշանակվել ուսուցչական աշխատանքի։ 1941 թվականի դեկտեմբերին Միքայելը զորակոչվել է կարմիր բանակի շարքերը, նշանակվել 89-րդ հայկական դիվիզիայի կապի վաշտում և մարտական մկրտությունը ստացել է Կովկասյան լեռներում։ Մարտական ուղին անցել է Գրոզնի, Մալգոբեկ, Կուբան, Թամանի թերակղզի, Կերչ, Սևաստոպոլ, Օդերի Ֆրանկֆուրտ, Բեռլին քաղաքները ազատագրելու ճանապարհով։ 1944 թվականին ընդունվել է կուսակցության շարքերը։ Օդերի արևմտյան ափի հետ կապ պաշտպանելու համար Կոստանյանը մեծ դժվարությամբ կատարել է առաջադրանքը, արիություն է դրսևորել նաև Բեռլինի գրավման օրերին, որի համար պարգևատրվել է Կարմիր աստղի շքանշանով և մի շարք մեդալներով[1]։
Պատերազմից հետո Միքայելը վերադարձել է հայրենի գյուղ, ուսուցիչ է աշխատել տեղի միջնակարգ դպրոցում։ Միևնույն ժամանակ ավարտել է Երևանի հեռակա մանկավարժական ինստիտուտի պատմության ֆակուլտետը։ 1948-1963 թվականներին տնօրեն և պատմության ուսուցիչ է աշխատել Սառնակունքի միջնակարգ դպրոցում։ 1963 թվականին Կոստանյանը ընտրվել է կոլտնտեսության նախագահ։ Սակայն նրա կոչումը մանկավարժությունն էր։ 1966 թվականին, իր խնդրանքով, նա կրկին վերադարձել է միջնակարգ դպրոցի տնօրենի պաշտոնին, և շարունակել է իր գիտելիքները և հարուստ կենսափորձը նվիրել մատաղ սերնդի դաստիարակության գործին[1]։
Երկարատև և անբասիր աշխատանքի համար Կոստանյանը պարգևատրվել է գովասանագրով, պատվոգրերով և մեդալներով[1]։
Միքայել Կոստանյանը մահացել է 1979 թվականին։
Պարգևներ խմբագրել
- Կարմիր աստղի շքանշան