Լատտե

Լատտե (իտալերեն՝ caffè latte [kaffelˈlatte] - ի կարճ տարբերակը - «կաթով սուրճ»), իտալական ըմպելիք է՝ կազմված կաթից և էսպրեսսո սուրճից։

Լատտե իտալերեն՝ caffè latte
Օսլոյում մատուցված Լատտե
Ծագման երկիր	Իտալիա
Տարածված երկրներ	Եվրոպա Հարավային Ամերիկա
Բաղադրամասեր	էսպրեսո, կաթ
Latte Վիքիպահեստում

Պատրաստումը

Իտալիայում լատտեն պատրաստվում է տնային պայմաններում և հիմնականում մատուցվում է նախաճաշի ժամանակ։ Լատտե պատրաստելու համար անհրաժեշտ է մեկ բաժակ տաքացված կաթ և մոկկո։

Իտալիայից դուրս լատտեն պատրաստվում է էսպրեսսոյից՝ նրան ավելացնելով տաք կաթի սերը։ Էսպրեսսոյի, կաթի և կաթի սերի չափաբաժինը համապատասխանում է 1:2:1 հարաբերակցությանը։

Ձևավորումը

Հիմնականում լատտեն մատուցվում է ապակյա բաժակով։ Կարելի է նաև լատտեի երեսի սերը ձևավորել տարբեր պատկերներով։ Այդ արվեստը կոչվում է լատտե-արտ։

Լատտեի տարբերությունը նման այլ ըմպելիքներից

Լատտե և լատտե մակիատո

Վերոնշյալ ըմպելիքների միջև տարբերությունն այն է, որ լատտե մակիատոյի դեպքում սուրճն է ավելացվում կաթին, ոչ թե կաթը սուրճին։ Լատտեի համն ավելի շատ նման է սուրճի համին, իսկ լատտե մակիատոն բուրում է կաթի պես։

Լատտե և կաթով սուրճ

Այս ըմպելիքների միջև հիմնական տարբերությունը կապված է պատրաստման և ձևավորման հետ։ Եվրոպայում կաթով սուրճը կարող է պատրաստվել ինչպես էսպրեսսոյի, այնպես էլ ամերիկանոյի միջոցով, իսկ լատտեն՝ միայն էսպրեսսոյով։ Հյուսիսային Ամերիկայում կաթով սուրճը պատրաստվում է սև սուրճով։ Լատտեն մատուցվում է ապակյա բաժակով, իսկ կաթով սուրճը՝ գավաթով։

Լատտե և կապուչինո

Լատտեն մատուցվում է բաժակով, և, համապատասխանաբար, ունի ավելի մեծ ծավալ, իսկ կապուչինոն՝ գավաթով։ Դրանով հանդերձ՝ այս ըմպելիքների մեջ էսպրեսսոյի քանակը նույնն է, իսկ կաթի չափաբաժինը կապուչինոյում քիչ է, դրա համար էլ նրա ծավալն ավելի փոքր է։ Տարբերությունն այն է, որ կապուչինոյում կաթի սերն ավելի քիչ չափաբաժին է կազմում։