Հովսեփ Պողոսյան
- Վիքիպեդիայում կան հոդվածներ Պողոսյան ազգանունով այլ մարդկանց մասին։
Հովսեփ Համբարձումի Պողոսյան (Նոյեմբերի 28, 1887, գ․ Վերին Կարմիրաղբյուր (այժմ՝ Հայաստանի Տավուշի մարզում)-1938)), «պրոֆեսիոնալ հեղափոխական», կուսակցական և պետական գործիչ, ԽՄԿԿ անդամ (1906)։
| Հովսեփ Պողոսյան | |
|---|---|
| Ծնվել է | նոյեմբերի 28, 1887 |
| Մահացել է | 1938 |
| Կրթություն | Ներսիսյան դպրոց |
| Մասնագիտություն | հեղափոխական |
| Կուսակցություն | ԽՄԿԿ |
| Անդամություն | ԽՄԿԿ |
Կենսագրություն խմբագրել
Ավարտել է Թիֆլիսի Ներսիսյան դպրոցը (1907) և Մոսկվայի առևտրի ինստիտուտը (1914)։ Հեղափոխական գործունեության մեջ ներգրավվել է աշակերտական տարիներից։ Առաջին համաշխարհային պատերազմի ժամանակ ծառայել է բանակում, բոլշևիկյան աշխատանք է տարել և Ելիզավետպոլում և Կովկասյան ռազմաճակատի թուրքեստանյան 2-րդ կորպուսի զորամասերում։ Փետրվարյան հեղափոխությունից (1917) հետո ակտիվորեն մասնակցել է զինվորների դեպուտատների խորհուրդների և կոմիտեների գործունեությանը, ընտրվել գնդի կոմիտեի նախագահ, կորպուսային կոմիտեի անդամ։ 1917 թվականի հուլիսյան օրերին ձերբակալվել է, սակայն շուտով ազատվել հեղափոխական զորամասերի պահանջով։ Հոկտեմբերյան հեղափոխության հաղթանակից հետո Թիֆլիսում մասնակցել է աշխատավորական ցույցերի կազմակերպմանը։ 1917 թվականի վերջին Հյուսիսային Կովկասում, Եկատերինոդարում (Կրասնոդար) մասնակցել է սպիտակգվարդիականների դեմ մղված պատերազմին, 1918 թվականի մարտին Բոնչ-Բրուևիչի և մի քանի այլ ընկերների հետ կազմակերպել Եկատերինոդարի գրավումը։ 1918 թվականի վերջին եկել է Հայաստան։ Մասնակցել է Հայաստանի կոմունիստական կազմակերպությունների 1919 թվականի սեպտեմբերյան խորհրդակցությանը և 1920 թվականի հունվարյան կոնֆերանսին, ընտրվել Արմենկոմի անդամ, 1920 թվականի գարնանը արտաքսվել է Հայաստանից։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 9, էջ 371)։ 
|