Գրիգոր Մուշեղյան

Գրիգոր Պետրոսի Մուշեղյան (հունվարի 10, 1900(1900-01-10), Վաղարշապատ, Երևանի նահանգ, Կովկասի փոխարքայություն, Ռուսական կայսրություն - հունիսի 7, 1971(1971-06-07), Երևան, Հայկական ԽՍՀ, ԽՍՀՄ), հայ ֆիզիոլոգ։ Բժշկական գիտությունների թեկնածու (1937), դոցենտ (1940), ՀԽՍՀ գիտության վաստակավոր գործիչ (1967)։ ԽՄԿԿ անդամ 1940 թվականից։

Գրիգոր Պետրոսի Մուշեղյան
Ծնվել է	հունվարի 10, 1900(1900-01-10)
Ծննդավայր	Վաղարշապատ, Երևանի նահանգ, Կովկասի փոխարքայություն, Ռուսական կայսրություն
Մահացել է	հունիսի 7, 1971(1971-06-07) (71 տարեկան)
Մահվան վայր	Երևան, Հայկական ԽՍՀ, ԽՍՀՄ
Կրթություն	Երևանի պետական համալսարան
Գիտական աստիճան	բժշկական գիտությունների թեկնածու
Մասնագիտություն	գիտնական
Աշխատավայր	Երևանի պետական համալսարան
Կուսակցություն	ԽՄԿԿ
Պարգևներ և մրցանակներ

Տիգրան Մուշեղյանի եղբայրը։

Կենսագրություն

1927 թվականին ավարտել է Երևանի համալսարանի բժշկական ֆակուլտետը և աշխատել նույն ֆակուլտետի ֆիզիոլոգիայի ամբիոնում։ Եղել է Երևանի բժշկական ինստիտուտի մարդու և կենդանիների ֆիզիոլոգիայի ամբիոնի (1936-1970), համատեղության կարգով նաև համալսարանի (1937-1949), անասնաբուծական-անասնաբուժական ինստիտուտի հայկական բաժնի ֆիզիոլոգիայի ամբիոնների (1932-1936) վարիչ, ՀԽՍՀ ԳԱ ֆիզիոլոգիայի ինստիտուտի տնօրեն (1944-1950)։ Աշխատել է Լևոն Օրբելու, Ալեքսեյ Ուխտոմսկու, Ս․ Սևերինի լաբորատորիաներում։

Գիտական աշխատանքները վերաբերում են մարսողական համակարգի, ուղեղիկի, սիմպաթիկ նյարդային համակարգի ֆիզիոլոգիայի հարցերին, ինչպես նաև ՀԽՍՀ հանքային ջրերի բուժիչ ազդեցության մեխանիզմների ուսումնասիրությանը։

Պարգևներ

Պարգևատրվել է Աշխատանքային կարմիր դրոշի շքանշանով։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 8, էջ 82)։