Սասուն Պասկևիչյան

Սասուն Թադևոսի Պասկևիչյան (հոկտեմբերի 5, 1939(1939-10-05), Երևան, Հայկական ԽՍՀ, ԽՍՀՄ), հայ կոմպոզիտոր, բանաստեղծ, լրագրող, Հայաստանի Հանրապետության ժողովրդական արտիստ (2014)։

Սասուն Թադևոսի Պասկևիչյան
Ծնվել է	հոկտեմբերի 5, 1939(1939-10-05) (84 տարեկան)
Ծննդավայր	Երևան, (Հայաստան)
Քաղաքացիություն	Հայկական ԽՍՀ
Կրթություն	ՀԱՊՀ
Մասնագիտություն	բանաստեղծ
Պարգևներ և մրցանակներ	Հայաստանի ժողովրդական արտիստ

Կենսագրություն

1957-1962 թվականներին սովորել է Երևանի պոլիտեխնիկական ինստիտուտի շինարարական ֆակուլտետում։ 1963 թվականին եղել է ՀԽՍՀ կոմունալ մինիստրության նախագծա-կոնստրուկտորական բյուրոյի գեոդեզիական բաժնի պետ, ապա՝ «Հայկոմուննախագիծ» ինստիտուտի «Ստորգետնյա կոմունիկացիաների ինվենտարիզացիա» բաժնի պետ։ Աշխատել է Հայաստանի հաղորդակցության ճանապարհների նախարարության նախագծա-կոնստրուկտորական բյուրոյում, նախ՝ լաբորատորիայի վարիչ, ապա՝ հետազոտական խմբի պետ։ 1975-1977 թվականներին աշխատել է Երևանի մետաղահատ հաստոցների փորձարարական գիտահետազոտական հիմնարկում՝ որպես կապիտալ շինարարության բաժնի պետ, 1977-1980 թվականներին` Հայաստանի ռադիոյի և հեռուստատեսության պետական կոմիտեում` որպես էստրադային սիմֆոնիկ նվագախմբի տնօրեն։

1958 թվականից սկսել է ստեղծագործել, ստեղծել է բազմաթիվ երգեր, որոնք կատարել են ժամանակի լավագույն երգիչները՝ Հովհաննես Բադալյանը, Օֆելյա Համբարձումյանը, Ռուբեն Մաթևոսյանը, Ֆլորա Մարտիրոսյանը, Պապին Պողոսյանը, Բելլա Դարբինյանը, Ռաիսա Մկրտչյանը, Լոլա Խոմյանցը, Արտաշես Ավետյանը, Գեորգի Մինասյանը և այլք։

1980-2004 թվականներին ապրել է Լոս Անջելեսում։ Մինչև 1988 թվականը զբաղվել է լրագրությամբ՝ «Սևան» երկշաբաթաթերթի խմբագրի տեղակալ, «Ասպարեզ», «Նոր օր», «Մասիս», «Հայ կյանք», «Նոր կյանք» պարբերականների թղթակից։ 1988 թվականին Լոս Անջելեսում հիմնադրել է «Հայաստան» հեռուստատեսությունը և մշակութային կենտրոնը, որը գործել է մինչև 2004 թվականը։ Համագործակցել է Հայկական միացյալ ֆոնդի և Հայաստան համահայկական հիմնադրամի հետ։

Երգեր

• «Դու հեռացար»
• «Հայր իմ»
• «Ներիր ինձ, մայրիկ»
• «Ամեն տեսակ երգ երգեցի»
• «Մինչև էգուց»
• «Դու երկու տառ»
• «Աշուղ Սայաթ-Նովի նման»
• «Կարոտի պահին»
• «Նարինե»
• «Մայրս»
• «Արագիլները»
• «Ես չգիտեմ, թե ինչու»
• «Մեր լեզուն»

Ձայնասկավառակներ

• «Հայր իմ», 1978 թ.
• «Կարոտ», 1980 թ.
• «Մայրս լիներ»
• «Դու հեռացար», 1982 թ.

Պարգևներ, պատվոգրեր

• Հայաստանի Հանրապետության ժողովրդական արտիստ (2014 թ.)։
• «Jean Golden Award of High Esteem» և «Bronze Halo Award» (1996 թ.)
• «Համո Սահյան» ոսկե հուշամեդալ (2010 թ.)
• ՀՀ սփյուռքի նախարարության պատվոգիր (2011 թ.)
• ՀՌԱԿ կուսակցության ոսկե հուշաշքանշան
• Հայ ժողովրդի երախտագիտությունը իր արժանավոր զավակին։

Արտաքին հղումներ

• Սասուն Պասկևիչյան