Պախիֆրագմա խոշորատերև

Պախիֆրագմա խոշորատերև
Պախիֆրագմա խոշորատերև
Դասակարգում
Թագավորություն	Բույսեր (Plantae)
Տիպ/Բաժին	Անոթավոր բույսեր (Tracheophyta)
Ենթատիպ	Սերմնավոր բույսեր (Spermatophytes)
Կարգ	Կաղամբածաղկավորներ (Brassicales)
Ընտանիք	Կաղամբազգիներ (Brassicaceae)
Տրիբա	Thlaspideae
Ցեղ	†Pachyphragma
Տեսակ	Պախիֆրագմա խոշորատերև (P. macrophyllum)
Միջազգային անվանում
Pachyphragma macrophyllum N.Busch, 1908

Պախիֆրագմա խոշորատերև (լատին․՝ Pachyphragma macrophyllum), խաչածաղկավորների ընտանիքին պատկանող ծածկասերմ բույս։ Գրանցված է Հայաստանի Հանրապետության Կարմիր գրքում։

Նկարագրություն

Բազմամյա խոտաբույս է, որի բարձրությունը 18-45 սմ է։ Կոճղարմատը հաստացած է, հորիզոնական։ Արմատամերձ տերևների երկարությունը հասնում է մինչև 18 սմ-ի, կոթերն ունեն սրտաձև կամ սրտաձև-երիկամաձև տերևաթիթեղ։ Պսակաթերթերը սպիտակ են, 8-10 մմ երկարությամբ։ Ծաղկակոթերը պտուղների ժամանակ հորիզոնական թեքված են, ունեն 15-20 մմ երկարություն։ Պատիճակները լայն-հակասրտաձև են, 12-18 մմ լայնությամբ, շատ լայն թևերով և ուժեղ հաստացած միջնորմով։

Տարածվածություն

Հայաստանում հանդիպում է միայն Իջևանի ֆլորիստիկական շրջանում (Թեղուտ)։ Աճում է նաև Նախակովկասում, Արևմտյան, Հարավարևմտյան, Կենտրոնական Անդրկովկասում, Հյուսիսարևելյան Անատոլիայում։

Էկոլոգիա

Աճում է ստորին լեռնային գոտում՝ ծովի մակարդակից 700–1000 մ բարձրությունների վրա, անտառներում։ Ծաղկում է ապրիլ-մայիս ամիսներին, պտղակալում՝ հունիս-հուլիսին։

Պահպանություն

Կրիտիկական վիճակում գտնվող տեսակ է։ Հայտնի է մեկ պոպուլյացիա։ Տարածման և բնակության շրջանների մակերեսը 10 կմ²-ից պակաս է։ Հայաստանի Կարմիր գրքի առաջին հրատարակության մեջ ընդգրկված չէր։ Ընդգրկված չէ նաև CITES–ի և Բեռնի կոնվենցիաների հավելվածներում։

Պահպանության գործողություններ չեն իրականացվում։

Ծանոթագրություններ

Վիքիցեղերն ունի նյութեր, որոնք վերաբերում են «Պախիֆրագմա խոշորատերև» հոդվածին։

Վիքիպահեստն ունի նյութեր, որոնք վերաբերում են «Պախիֆրագմա խոշորատերև» հոդվածին։