Միջնադարյան տեխնիկա
Միջնադարյան տեխնիկա, բնութագրում է մարդկության տեխնոլոգիական մակարդակը աշխարհագրական մեծ հայտնագործությունների նախօրյակին։
Չնայած Միջնադարի՝ որպես լճացման և ճգնաժամի դարաշրջանի վատ համբավին, հենց այդ շրջանում է կատարելագործվել ջրային տրանսպորտը (կարակկա), որը թույլ է տվել կատարել շուրջերկրյա նավարկություններ։ Հեռավոր նավարկությունները հնարավոր են դարձել կողմնորոշիչ սարքերի՝ աստրոլաբի և կողմնացույցի շնորհիվ։ Ժամանակը որոշելու համար X դարից սկսած սկսել են օգտագործվել մեխանիկական ժամացույցներ, որոնք տեղադրվել են եվրոպական քաղաքների ռատուշաների աշտարակների վրա[1]։ Ռոջեր Բեկոնը հայտնագործել է ակնոցը (XIII դ.): Զարգացել են նաև տեղեկատվական տեխնոլոգիաները. հայտնագործվել է թուղթը, որի վրա թանաքի և փետուրների օգնությամբ նշաններ են գրվել։
Գոթական տաճարները բարձրությամբ գերազանցել են Հին Եգիպտոսի բուրգերին։ Քեոփսի բուրգն ունեցել է 46 մետր բարձրություն և համարվել աշխարհի յոթ հրաշալիքներից մեկը, սակայն XIV դարի սկզբին կառուցված Լինկոլնի տաճարը 15 մետրով գերազանցել է Քեոփսի բուրգին։ Լայն տարածում են գտել ինչպես ջրաղացները, այնպես էլ հողմաղացները։ Եթե ջրաղացը հայտնի էր դեռ Վիտրուվիոսին, ապա հողմաղացներն Իրանում հայտնվել են VII դարում։ Եթե սկզբում աղացները օգտագործվում էին հացահատիկն աղալու համար, ապա հետագայում պտտվող լիսեռը սկսել է կիրառվել մանուֆակտուրային արտադրության տարբեր տեսակներում, այդ թվում և մահուդի արտադրության, հանքաքարի մանրացման, թղթի պատրաստման, փայտի սղոցման կամ դարբնոցների հնոցները[2] շարժման մեջ դնելու համար։ Կատարելագործվել է գյուղատնտեսական տեխնիկան, հայտնագործվել են անվավոր գութանը[3] և լուծը (IX դ,)։ Անտիկ անվակառքերին փոխարինելու է եկել միջնադարյան հեծելազորը, որն անհնար կլիներ առանց խթանի գյուտի։
XIV-XV դարերում հայտնագործվել են հողափոր մեքենան, ամբարձիչը։
Միջնադարում է ստեղծվել նաև հրազենը, նոր բարձրունքների է հասել մետաղամշակությունը։ Տարածում են ստացել պողպատե երկար սրերը (Դամասկոսի պողպատ)։ Միջնադարի վերջին մետալուրգիական վառարանին փոխարինում է դոմնային վառարանը (XIV դ.), որը թույլ է տվել հասնել 1200 С աստիճան ջերմության և հալել թուջ, ինչն անհրաժեշտ է եղել թնդանոթների և նրանց արկերի ձուլման համար։