Կարլ Մարքսի հուշարձան (Թրիեր)

Կարլ Մարքսի հուշարձանը տեղադրվել է Գերմանիայի Դաշնային Հանրապետության Թրիեր քաղաքի Սիմեոնշտիֆտպլաց հրապարակում 2018 թվականի մայիսի 5-ին՝ մեծ փիլիսոփայի ծննդյան 200-ամյակի օրը։ Գերմանիան քանդակագործ Ու Վեյշանի բրոնզե արձանը նվեր է ստացել Չինաստանի Ժողովրդական Հանրապետությունից։

Museum Silhouette.svg
Կարլ Մարքսի հուշարձան
Karl-Marx-Statue in Trier.jpg
Տեսակարձան և հուշարձան
ԵրկիրFlag of Germany.svg Գերմանիա
ՎայրQ16294686?
Բարձրություն5,5 մետր
Շինանյութբրոնզ, բետոն և բազալտ
Հիմնադրված է2018
Իրադարձություններunveiling?
HS Disambig.svg Անվան այլ կիրառումների համար տե՛ս՝ Կարլ Մարքսի հուշարձան (այլ կիրառումներ)

Քանդակն իրենից ներկայացնում է Կարլ Մարքսի կերպարը հասուն տարիքում, որը, ձախ ձեռքին գիրքն առած, քայլում է առաջ։ Փիլիսոփայի վճռական հայացքը ուղղված է հեռուն, կզակը փոքր-ինչ առաջ է քաշվել, ճակատը կնճիռների մեջ է։ Արձանը տեղադրված է բազալտային սալաքարերով պատված աստիճանավոր պատվանդանի վրա։ Հատակագիծը բաղկացած է հնգանկյունից։ Արձանի բարձրությունը 5.5 մետր է, ինչը խորհրդանշում է Մարքսի ծննդյան օրը՝ մայիսի 5-ը։

Քանդակագործ Ու Վեյշանն իր ստեղծագործության ոճը սահմանել է որպես «արևմտյան ռեալիզմի» համադրություն, որը գերակշռում էր Մարքսի ժամանակներում՝ «չինական իմպրեսիոնիզմի» հետ մեկտեղ։ Նրա խոսքով՝ ինքը ձգտում էր ոչ միայն ճշգրտորեն վերակերտել կոմունիզմի հիմնադրի արտաքին տեսքը, այլև պատկերել նրա հոգևոր աշխարհը[1]։ Առաջ շարժվելը խորհրդանշում է Մարքսի գաղափարների նշանակությունը և դեպի ապագա ուղղվածությունը։ Փիլիսոփայի երկար վերարկուն և նրա երկար մազերը անձնավորում են իմաստությունը։ Ձախ ձեռքին վերցրած գիրքը մարմնացնում է մարդկության կրթությունը։ Պատվանդանի հինգ անկյունները, որոնց վրա վեր է խոյանում հուշարձանը, խորհրդանշում են այն հինգ քաղաքները, որոնց հետ Կարլ Մարքսը հատուկ կապ է ունեցել՝ Թրիերը, Բեռլինը, Համբուրգը (որտեղ ապրել է նրա հրատարակիչ Օտտո Մեյսները), Փարիզը և Լոնդոնը[2]։

Չինաստանի Ժողովրդական Հանրապետությունից նման նվեր ստանալու թույլատրելիության հարցը բուռն վեճեր է առաջացրել Թրիերի քաղաքային խորհրդում, դրական որոշումն ընդունվել է 2017 թվականի մարտին։ Չինական կողմի ցանկությունն էր հուշարձանը տեղադրել այն տան դիմաց, որտեղ ծնվել է Կարլ Մարքսը, սակայն քաղաքային խորհրդի կողմից առաջարկվել է Թրիերի գլխավոր տեսարժան վայրերից մեկի՝ հին հռոմեական դարպասներից մեկի՝ Պորտ-Նիգրայի մոտ գտնվող նախկին ավտոկայանատեղին[3]։ Հասարակական կարծիքը հանգստացնելու համար հուշարձանի կառուցմանը նախորդել է նույն տեղում բնական մեծությամբ փայտե մոդելի տեղադրումը[4]։

Չինաստանի Ժողովրդական Հանրապետությունն իր վրա է վերցրել հուշարձանի և պատվանդանի (92 500 եվրո) պատրաստման, ինչպես նաև Չինաստանից Թրիեր տեղափոխելու ծախսերը։ Թրիեր քաղաքը վճարել է հողաշինարարական աշխատանքները, հիմքը, բարեկարգումն ու լուսավորությունը, ընդհանուր առմամբ՝ 39 000 եվրո[5]։

Հուշարձանի հարևանությամբ գտնվող հետիոտնային անցման ճանապարհի լուսացույցի տղամարդն ունի Կարլ Մարքսի կերպարը և ճանաչելի մորուքը[6]։

ԾանոթագրություններԽմբագրել