Կարլեն Վարժապետյան

Կարլեն Պողոսի Վարժապետյան (Կարապետ Վարժապետյան, մայիսի 10, 1942(1942-05-10), Հալեպ, Սիրիա - հուլիսի 16, 1984(1984-07-16), Երևան, Հայկական ԽՍՀ, ԽՍՀՄ), բեմադրիչ։ ՀԽՍՀ վաստակավոր արտիստ (հետմահու, 1984)։

Կարլեն Պողոսի Վարժապետյան
Ծնվել է	1942 մայիսի 10
Ծննդավայր	Հալեպ, Սիրիա
Մահացել է	հուլիսի 16, 1984(1984-07-16) (տարիքը 42)
Մահվան վայր	Երևան
Ազգություն	հայ
Կրթություն	Անդրանիկ Մարգարյանի անվան դպրոց և Երևանի պետական գեղարվեստա-թատերական ինստիտուտ
Մասնագիտություն	բեմադրիչ
Պարգևներ և մրցանակներ	ՀԽՍՀ վաստակավոր արտիստ

Կենսագրություն

Ծնողները՝ Պողոս Վարժապետյանը և Աննա Վարժապետյանը, Հալեպ են գաղթել Արևմտյան Հայաստանի Բալու քաղաքից։ 1946 թվականին հայրենդարձել են։ Ստալինյան բռնաճնշումների արդյունքում՝ 1949 թվականին ընտանիքով աքսորվել են Սիբիրի Ալթայի երկրամաս Տյագուն գյուղ։ 1956 թվականին վերադարձել է Հայաստան։

1959 թվականին ավարտել է Երևանի Չկալովի անվան միջնակարգ երեկոյան դպրոցը և որպես հյուսն աշխատել Երևանի պահածոների գործարանում։ 1961 թվականին ընդունվել է Երևանի գեղարվեստա-թատերական ինստիտուտի դերասանական բաժին։ 1962 թվականին ծառայել է Բելառուսի Մինսկ քաղաքում։ Ծառայության ընթացքում աչքի է ընկել դերասանական և ռեժիսորական տաղանդով։ Հաջողությամբ բեմականացրել է ռուս և ժամանակակից դրամատուրգների ստեղծագործությունները։ 1965 թվականին, հայրենական պատերազմում հաղթանակի 20-ամյակի կապակցությամբ, ներկայացրել է Սալինսկու «Թմբկահարուհին» բեմադրությունը, որից հետո պարգևատրվել է «Հայրենական Մեծ պատերազմի 20-ամյակի» շքանշանով։ 1965-1970 թվականներին սովորել է Երևանի գեղարվեստա-թատերական ինստիտուտի ռեժիսորական բաժնում։

Կարլեն Վարժապետյանի անվանական աստղը Նվիրյալների արահետում

Աշխատել է ռադիոթատրոնում, կույրերի միության թատերական խմբակում, ԼՈՒՍԱՇԽ-ում, Երևանի մանկավարժական ինստիտուտում։ 1978 թվականին եղել է գեղարվեստա-թատերական ինստիտուտի ավարտական կուրսի Հակոբ Պարոնյանի «Պաղտասար ախպար» ներկայացման ռեժիսորը։ 1977 թվականից եղել է ԽՍՀ ռադիո-հեռուստատեսության պետական կոմիտեի դրամատիկական հաղորդումների գլխավոր խմբագրության ռեժիսոր։

Հեռուստաներկայացումներ

Բեմադրած հեռուստաներկայացումներից են՝

• Անտոն Չեխովի «Քեռի Վանյա»
• Եղիշե Չարենցի «Երկիր Նաիրի»
• Հրանտ Մաթևոսյանի «Մեծամոր», «Չեզոք գոտի»
• Վիլյամ Շեքսպիրի «Ռոմեո և Ջուլիետ»
• Հ. Վարդանյանի «Կիբոսա. 7-րդ դար»
• Գրիգոր Զոհրապի «Փոստալ»
• Շահան Շահնուրի «Պճեղ մը անուշ սիրտ»
• Վիլյամ Սարոյանի «Խեղճուկրակ արաբը»

Հեռուստատեսագրման ժապավենների սղության և սակավության պատճառով մեզ չեն հասել այդ տարիներին բեմադրած դրամատիկական հաղորդումների գլխավոր խմբագրության շատ աշխատանքներ։

Ռադիոբեմադրություններ

Ստեղծել է նաև բազմաթիվ ռադիոբեմադրություններ՝

• «Էգլեթիերների ընտանիքը»
• «Պանը»
• «Սիզիփոսի քարը»
• «Անձրև վաճառողը»
• «Դոն Կիխոտ»

Մրցանակներ

• «Հայրենական Մեծ պատերազմի 20-ամյակի» շքանշան, 1965
• «Երկիր Նաիրի» բեմադրության համար, Ռիգայի ԽՍՀՄ հանրապետությունների հեռուստահաղորդումների համամիութենական փառատոն, 1982
• ՀԽՍՀ վաստակավոր արտիստ, 1984, հետմահու