Լոնվի
Լոնվի կամ Լոնգվի[4] ( ֆր.՝ Longwy (արտասվում է [lɔ̃wi] ), քաղաք և համայնք Ֆրանսիայի Լոթարինգիա երկրամասի Մյորտ է Մոզել դեպարտամենտում։ Նույնանուն կանտոնի վարչական կենտրոնն է և միակ քաղաքը։ Համբավվել է իր հախճապակիով[5] և մետաղագործությամբ։ 19-րդ և 20-րդ դարերում Ֆրանսիայի կարևորագույն մետալուրգիական կենտրոնն էր, արտադրում էր երկրի թուջի և պողպատի հիմնական մասը։
| Բնակավայր | |||||
|---|---|---|---|---|---|
| Լոնվի | |||||
| ֆր.՝ Longwy[1] | |||||
| |||||
 | |||||
| Երկիր |  Ֆրանսիա | ||||
| Մակերես | 5,34 կմ² | ||||
| ԲԾՄ | 254 մետր | ||||
| Բնակչություն | ▲15 191 մարդ (հունվարի 1, 2021)[2] | ||||
| Ժամային գոտի | UTC+1 և UTC+2 | ||||
| Փոստային դասիչ | 54400[3] | ||||
| Պաշտոնական կայք | mairie-longwy.fr(ֆր.) | ||||
| |||||
Աշխարհագրություն խմբագրել
Լոնվին ընկած է Շիեր գետի ափին, Մեց քաղաքից 55 կմ դեպի հյուսիս-արևմուտք, Նանսի քաղաքից 100 կմ դեպի հյուսիս, Լյուքսեմբուրգի և Բելգիայի հետ Ֆրանսիայի ունեցած պետական սահմանների մոտ։ Հարևան համայնքներն են՝ հյուսիսում՝ Մոն-Սեն-Մարտենը, հյուսիս-արևելքում՝ Լոնլավիլն ու Սոլնը, արևելքում՝ Էրսերանժը, հարավ-արևելքում՝ Մեքսին, հարավում՝ Ռեոնը, հարավ-արևմուտքում՝ Լեքսին, արևմուտքում ՝ Կոն է Ռոմենը։
Պատմություն խմբագրել
Քաղաքը հիմնադրվել է Տիտելբերգի բարձունքում՝ որպես հին հռոմեական կաստրում, որի տեղում 7-րդ դարում կառուցված Լոնկաստր բերդամրոցը հանդիսացել է կոմսության կենտրոնը։ 9-րդ դարում ամրոցի շուրջը բերդապարսպով շրջապատված քաղաք է ձևավորվել, իսկ 11-րդ դարում առաջացել է նոր քաղաքը՝ Նյովիլը։ Լոնգվին երկար ժամանակ եղել է Լոթարինգիայի դքսության կազմում։ 1292 թվականին այն վաճառվել է դը Բար կոմսերին։ 1368 թվականին քաղաքը կոմսի կողմից վաճառվել է Լյուքսեմբուրգի դուքսին՝ պարտքերի դիմաց, սակայն 1378 թվականին այն վերադարձվել է դը Բար կոմսերին։
1480 թվականին՝ դը Բար տոհմի դուքս Ռենե I Անժուեցու և նրա այրու՝ Իզաբել I Լոթարինգցու մահից հետո, Լոնվին Բարերի դքսության հետ միավորվեց Լոթարինգիայի դքսությանը։ 1648 թվականին ֆրանսիացիները գրավեցին Լոնվին և իրենց տիրապետության տակ պահեցին մինչև 1660 թվականը, երբ այն Լոթարինգիայի դուքս Կարլ IV- ի կողմից վերադարձվեց Լոթարինգիային։ 1670 թվականին ֆրանսիացիները կրկին հարձակվեցին և գրավեցին Լոնվին, որը 1678 թվականի օգոստոսի 19-ին Նիմվեգենյան պայմանագրով միացվեց Ֆրանսիայի թագավորությանը։
Ֆրանսիայի կողմից վերջնականապես բռնակցվելուց հետո քաղաքը վերածվեց ամրոցի։ Լյուդովիկոս XIV- ի հրամանով ռազմական նշանավոր ինժեներ Վոբանը կառուցեց նոր քաղաք՝ ամրոցով։ Ֆրանսիական հեղափոխության ժամանակ՝ 1792 թվականի օգոստոսի 13-ին, Բրաունշվայգի դուքս Կառլ Վիլհելմ Ֆերդինանդը գրավեց քաղաքը, ավելի ճիշտ՝ այն հանձնվեց բնակիչների ճնշման ներքո, ովքեր վախենում էին, որ քաղաքը կարող է ռմբակոծության ենթարկվել։ Վալմիի ճակատամարտից հետո քաղաքը վերադարձվեց Ֆրանսիային, և պրուսական բանակը 1792 թվականի հոկտեմբերի 22-ին լքեց քաղաքը առանց կռվի։
Քաղաքը կրկին պաշարվել է 1815 թվականի հուլիսին՝ Հեսսեն-Հոմբուրգի իշխանի զորքերի կողմից։
Լոնվին առանցքային դեր է խաղացել Առաջին համաշխարհային պատերազմում։ Պատերազմից հետո՝ 1919 թվականի սեպտեմբերի 20-ին քաղաքը պարգևատրվել է Արմավենու ճյուղով Մարտական խաչով և Պատվո Լեգեոնի շքանշանով։
19-րդ դարի վերջից Լոնվիում սկսել էր արագ թափով զարգանալ մետաղագործական գործարանների ցանցը, որտեղ աշխատում էր բնակիչների ճնշող մեծամասնությունը։ Շուրջ հարյուր տարի Լոնգվին ֆրանսիական մետալուրգիայի կենտրոնն էր։ 1980-ական թվականներին մետաղաձուլական գործարանները փակվեցին։
Երկրորդ համաշխարհային պատերազմի ժամանակ՝ 1940 թվականի մայիսի 10-13-ը այստեղ մարտեր են տեղի ունեցել։
Ժողովրդագրություն խմբագրել
Համայնքի բնակչության թվաքանակը 2010 թվականին եղել է 14420։
| 1962 | 1968 | 1975 | 1982 | 1990 | 1999 | 2010 |
|---|---|---|---|---|---|---|
| 21 929 | 21 076 | 20 131 | 17 338 | 15 439 | 14 515 | 14 420 |
Ծանոթագրություններ խմբագրել
- ↑ Code officiel géographique
- ↑ Populations légales 2021 — The National Institute of Statistics and Economic Studies, 2023.
- ↑ Base officielle des codes postaux — La Poste, 2018.
- ↑ «Топокарты Генштаба в редакции 1991 г.». Արխիվացված օրիգինալից 2015 թ․ դեկտեմբերի 23-ին. Վերցված է 2015 թ․ դեկտեմբերի 23-ին.
- ↑ http://www.lemonde.fr/economie/article/2015/01/06/les-emaux-de-longwy-sont-a-vendre_4550197_3234.html
Արտաքին հղումներ խմբագրել
- Քաղաքի պաշտոնական կայքը(Ֆրանսերեն)
- Longwy Metropolitan տուրիզմի վարչություն(Ֆրանսերեն)
- Ազգային վիճակագրության ինստիտուտ(Ֆրանսերեն) :
 | Վիքիպահեստն ունի նյութեր, որոնք վերաբերում են «Լոնվի» հոդվածին։ |