Տելեկոմ Արմենիա

Թիմ Տելեկոմ Արմենիա (Team Telecom Armenia), հեռահողորդակցության ոլորտի հայկական ընկերություն, որը հիմնադրել են Հայկ և Ալեքսանդր Եսայան եղբայրները, 2020 թվականի ապրիլի 20-ին։ Հիմնադրման պահին ընկերությունն ունեցել է «Օլնեթ» անվանումը, «Թիմ» է վերանվանվել նույն թվականի մայիսի 15-ին։ Ընկերությունը Հայաստանի տարածքում տրամադրում է ինտերնետի, թվային հեռուստատեսության, բջջային և ֆիքսված հեռախոսակապի ծառայություններ։ «Վեոն Արմենիա» ընկերությունը գնելուց հետո Տելեկոմ Արմենիան հանդես է գալիս «Beeline» ապրանքանիշի ներքո։

Տելեկոմ Արմենիա
Տեսակ	փակ բաժնետիրական ընկերություն
Հիմնադրված է	ապրիլի 20, 2020
Վայր	Երևան, Հայաստան
Երկիր	Հայաստան
Տնօրեն	Հայկ Եսայան
Արդյունաբերություն	բջջային կապ
Արտադրանք	Բջջային կապ, ֆիքսված կապ, Ինտերնետ IPTV

«Տելեկոմ Արմենիան» տրամադրում է GSM 900/1800, 3G (UMTS) և 4G (LTE) ստանդարտ շարժական կապի, ամրակցված հեռախոսակապի և IPTV ծառայություններ, ինչպես նաև ապահովում է ինտերնետ հասանելիություն 25GS-PON, FTTH, ADSL, FTTB և VDSL տեխնոլոգիաներով։

Ընկերության գլխամասային գրասենյակը գտնվում է Երևան քաղաքի Ազատության պողոտայի 24/1 հասցեով։

Գործունեություն

«Թիմ» ընկերությունը 2020 թվականի հուլիսի 9-ին Հեռուստատեսության և ռադիոյի հանձնաժողովի կողմից ստացել է ՀՀ տարածքում հեռուստառադիոծրագրերի կաբելային (մալուխային) հեռարձակման լիցենզիա։

«Վեոն Արմենիա»-ի գնում

2020 թվականի հունիսի սկզբին «Թիմ» ընկերությունը ցանկություն հայտնեց գնելու «Բիլայն» ապրանքանիշի ներկայացուցիչ «ՎԵՈՆ Արմենիա» ընկերությունը։ Հուլիսի 10-ին հանրային ծառայությունները կարգավորող հնձնաժողովը համաձայնություն է տվել «Վեոն Արմենիա» ընկերության բաժնետոմսերը «Թիմ» ՍՊԸ-ին օտարելու։