Մարիա Գրոզդևա

Մարիա Զդրավկովա Գրոզդևա (բուլղար․՝ Мария Здравкова Гроздева, հունիսի 23, 1972(1972-06-23), Սոֆիա, Բուլղարիա), բուլղարացի հրաձիգ։ Վեց անգամ մասնակցել է Օլիմպիական խաղերի, որոնցից երկուսում դարձել է չեմպիոն։ Եվրոպայի բազմակի չեմպիոն։ Բոլոր մարզաձևերում ամենաշատ մեդալներն ունեցող բուլղարիացի մարզիկներից մեկն է։

Մարիա Գրոզդևա
Անձնական տեղեկություն
Սեռ՝	իգական
Ամբողջական անուն՝	բուլղար․՝ Мария Здравкова Гроздева
Բնօրինակ անուն՝	Мария Здравкова Гроздева
Ազգություն՝	բուլղարացի
Մասնագիտացում՝	հրաձիգ
Երկիր՝	Բուլղարիա
Ծննդյան ամսաթիվ՝	հունիսի 23, 1972 (51 տարեկան)
Ծննդավայր՝	Սոֆիա, Բուլղարիա
Մարզիչ(ներ)՝	Վալերի Գրիգորով
163 սմ
Քաշ՝	63 կգ
Պարգևներ Օլիմպիական խաղեր Բրոնզ Բարսելոնա 1992 Օդաճնշիչ ատր., 10 մետր Բրոնզ Ատլանտա 1996 Օդաճնշիչ ատր., 10 մետր Ոսկի Սիդնեյ 2000 Ատրճանակ, 25 մետր Ոսկի Աթենք 2004 Ատրճանակ, 25 մետր Բրոնզ Աթենք 2004 Օդաճնշիչ ատր., 10 մետր Եվրոպայի առաջնություն Արծաթ Բուդապեշտ 1992 Օդաճնշիչ ատր., 10 մետր Արծաթ Բռնո 1993 Ատրճանակ, 25 մետր Ոսկի Ստրասբուրգ 1994 Օդաճնշիչ ատր., 10 մետր Ոսկի Վանտաա 1995 Օդաճնշիչ ատր., 10 մետր Արծաթ Ցյուրիխ 1995 Ատրճանակ, 25 մետր Ոսկի Կոուվոլա 1997 Ատրճանակ, 25 մետր Ոսկի Բորդո 1999 Ատրճանակ, 25 մետր Արծաթ Մյունխեն 2000 Օդաճնշիչ ատր., 10 մետր Ոսկի Պլզեն 2003 Ատրճանակ, 25 մետր Բրոնզ Գրանադա 2007 Ատրճանակ, 25 մետր Ոսկի Օսիեկ 2009 Ատրճանակ, 25 մետր Ոսկի Պրահա 2009 Օդաճնշիչ ատր., 10 մետր

Կարիերա

Մարի Գրոզդևան մարզական հրաձգությամբ սկսել է զբաղվել 11 տարեկան հասակից մարզիչ Վալենտին Անդրեևի մոտ։ Տասնչորս տարեկանում նա կատարել է սպորտի վարպետի նորմատիվը հրաձգությունից։ Մարիա Գրոզդևայի մարզական կարիերայի մեծ մասում նրա մարզիչը եղել է Վալերի Գրիգորովը, ում հետ նա ամուսնացել է։ Նրանք ունեն երեք երեխա։

Ամառային օլիմպիական խաղերին Մարիա Գրոզդևան առաջին անգամ մասնակցել է 1992 թվականին Բարսելոնայում և օդաճնշիչ ատրճանակով հրաձգության մրցությունում զբաղեցրել է երրորդ տեղը՝ արժանանալով բրոնզե մեդալի։ Չորս տարի անց նա կրկնել է իր այդ հաջողությունը Ատլանտայում անցկացված Օլիմպիական խաղերի ժամանակ։

2000 թվականի Սիդնեյում անցկացված Օլիմպիական խաղերի ժամանակ Մարիա Գրոզդևան չեմպիոն է դարձել ատրճանակից հրաձգության մրցությունում (25 մետր), իսկ 2004 թվականին Աթենքում պաշտպանել է չեմպիոնի տիտղոսը՝ միաժամանակ սահմանելով օլիմպիական նոր ռեկորդ և դառնալով առաջին մարզուհին, ով երկու անգամ անընդմեջ չեմպիոն է դարձել տվյալ մարզաձևում։ Ոսկե մեդալից բացի Մարիա Գրոզդևան 2004 թվականին վաստակել է Օլիմպիական խաղերի իր երրորդ բրոնզե մեդալը։ 2004 թվականի Օլիմպիական խաղերի բացման արարողության ժամանակ Մարիա Գրոզդևան եղել է Բուլղարիայի հավաքականի դրոշակակիրը։

2008 թվականին Պեկինում անցկացված Օլիմպիական խաղերի ժամանակ Մարիա Գրոզդևան փորձել է երկրորդ անգամ պաշտպանել ատրճանակից հրաձգության չեմպիոնի իր տիտղոսը, սակայն զբաղեցրել է միայն հինգերորդ տեղը, իսկ օդաճնշիչ ատրճանակի հրաձգության ժամանակ չի ընդգրկվել անգամ տասը լավագույն մարզիկների շարքում։ 2012 թվականին Լոնդոնի Օլիմպիական խաղերի ժամանակ երկու մարզաձևերում էլ չի անցել եզրափակիչ, թեև սովորական ատրճանակից հրաձգության ժամանակ եղել է իններոդը՝ ընդամենը մեկ հորիզոնականով զիջելով եզրափակիչ անցնողներին։

Իր կարիերայի ընթացքում Մարիա Գրոզդևան յոթ անգամ դարձել է Եվրոպայի չեմպիոն (1994, 1995, 1997, 1999, 2003, 2009), չորս անգամ արժանացել է արծաթե մեդալի (1992, 1993, 1995, 2000) և մեկ անգամ վաստակել է բրոնզե մեդալ (2007), իսկ աշխարհի առաջնություններում որ մի անգամ մրցանակային տեղ չի զբաղեցրել։ Աշխարհի առաջնությունների ժամանակ բուլղարացի մարզուհին միայն երկու անգամ է հասել եզրափակիչ. 1994 թվականին նա օդաճնշիչ ատրճանակով հրաձգության ժամանակ զբաղեցրել է յոթերորդ տեղը, իսկ 2002 թվականին սովորական ատրճանակից հրաձգության ժամանակ եղել է չորրորդը։

Ելույթներն Օլիմպիական խաղերում

Խաղեր	Ատրճանակ 25 մետր	Օդաճնշ․ ատրճ. 10 մետր
Բարսելոնա-1992	18	3
Ատլանտա-1996	21	3
Սիդնեյ-2000	1	38
Աթենք-2004	1	3
Պեկին-2008	5	11
Լոնդոն-2012	9	24

Արտաքին հղումներ

• Մարիա Գրոզդևայի էջը ISSF կայքում

Վիքիպահեստն ունի նյութեր, որոնք վերաբերում են «Մարիա Գրոզդևա» հոդվածին։