Հարություն Շամշինյան

Հարություն Իսահակի Շամշինյան (փետրվարի 9, 1856(1856-02-09), Թիֆլիս, Կովկասի փոխարքայություն, Ռուսական կայսրություն - փետրվարի 1, 1914(1914-02-01), Թիֆլիս, Ռուսական կայսրություն), հայ նկարիչ։

Հարություն Շամշինյան
Ի ծնե	Հարություն Իսահակի Շամշինյան
Ծնվել է	փետրվարի 9, 1856
Ծննդավայր	Թիֆլիս
Վախճանվել է	փետրվարի 1, 1914
Մահվան վայր	Թիֆլիս
Ազգություն	հայ
Կրթություն	Սանկտ Պետերբուրգի գեղարվեստի ակադեմիա
Մասնագիտություն	նկարիչ
Աշակերտներ	Գարեգին Երիցյան

Կենսագրություն

1874-1877 թվականներին սովորել է Գեղարվեստը խրախուսող կովկասյան ընկերության նկարչական դպրոցում, 1877-1882 թվականներին՝ Սանկտ Պետերբուրգի գեղարվեստի ակադեմիայում։ 1883 թվականին կատարելագործվել է Փարիզում, Մյունխենում, Վենետիկում։

1884 թվականից հաստատվել է Թիֆլիսում, դասավանդել Ներսիսյան, Գայանյան և Սուրբ Նշան դպրոցներում, մշակել նկարչության դասավանդման ծրագրեր, կազմել և հրատարակել գծագրության ու հեռանկարի ձեռնարկ։

Շամշինյանի արվեստին (կենցաղային ժանրի կտավ, բնանկար, դիմանկար) բնորոշ է իրականության հավաստի վերարտադրումը («Հին Թիֆլիս», 1887, «Շեյթան բազար», 1890, «Սանահինի կամուրջը», 1899, «Լեռնցիների դադարը», 1902, «Նկարչի մոր դիմանկարը» և այլն։ Շամշինյանի հայ իրականության մեջ առաջիններից է, որ ստեղծել է օֆորտի տեխնիկայով գրաֆիկ, թերթեր (Պ. Պ. Չիստյակովի, Խ. Աբովյանի դիմանկարները, «Փոստատան բակում» բնանկարը)։

Անհատական ցուցահանդեսներ՝ Թիֆլիսում (1913), մահվան 40-րդ տարելիցին՝ Երևանում (1954)։ Շամշինյանի գործերից պահվում են Հայաստանի ազգային պատկերասրահում (նաև Շամշինյանի դիմանկարը, գործ՝ Մ. Վռուբելի, 1883), Թբիլիսիի պատմաազգագրական և թատերական թանգարաններում։

Գրականություն

• Շիշմանյան Ռ., Բնանկարն ու հայ նկարիչները, Երևան, 1958։

Արտաքին հղումներ

• Հարություն Շամշինյան Արխիվացված 2022-01-07 Wayback Machine