Զմեինի (կղզի)

Անվան այլ կիրառումների համար տե՛ս՝ Զմեինի (այլ կիրառումներ)

Զմեինի (Օձերի կղզի) (ուկր.՝ Острів Зміїний, ռում.՝ Insula Şerpilor, հին հուն․՝ Λευκός, հուն․՝ Φίδονισι, թուրք.՝ Yilan Adası), կղզի Սև ծովում, պատկանում է Ուկրաինային։ Կղզին մտնում է Օդեսայի մարզ Կիլիի շրջանի կազմի մեջ։

Զմեինի (Օձերի կղզի) ուկր.՝ Острів Зміїний
Կոորդինատներ	45°15′18″ հս․ լ. 30°12′15″ ավ. ե.
Տեղագրություն	Սև ծով
Երկիր	Ուկրաինա
Վարչատարածքային բաժանում	Օդեսայի մարզ
Մակերես	0,205 կմ2
Բնակչություն	100 մարդ

Կղզու վրա գտնվող բնակավայրը ունի ավանի պաշտոնական կարգավիճակ (Բելոե ավան)։ Ավանում գործում են փոստ, թանգարան, բանկի բաժանմունք։ Ապագայում նախատեսվում է ուղղափառ վանքի կառուցում։

Զմեինի կղզու կարգավիճակը ուներ կարևորագույն նշանակություն ՄԱԿ-ի Միջազգային Դատարանում Ուկրաինայի և Ռումինիայի միջև տարածքային վեճի, մայրցամաքային շելֆի տարանջատման և նավթով ու բնական գազով հարուստ առանձին տնտեսական գոտու խնդիրների դիտարկման ժամանակ։ 2009 թվականի փետրվարի 3-ին կայացվեց որոշում, ըստ որի Զմեինին ճանաչվեց կղզի, այլ որ ժայռ, ինչը փորձում էր ապացուցել Ռումինիան։

Զմեինի կղզին տեղաբաշխված է մոտ 35 կիլոմետր արևելք Դանուբի դելտայի լայնության վրա գտնվող ափեզրից։ Կղզին ունի խաչաձև ձև, մակերեսը կազմում է 20,5 հեկտար, իսկ ծայրագույն կետերի հեռավորությունը կազմում է 615 և 560 մետր։ Ամենամոտ բնակավայրը ռումինական ափեզրին գտնվող Սուլինա քաղաքն է։ Ամենամոտ ուկրաինական բնակավայրն է Վիլկովո քաղաքը։

Կղզու կլիման չափավոր է, տափաստանային։ Հաճախակի քամիներով, եղանակի փոփոխություններով և բարձր խոնավությամբ։ Միջին ջերմաստիճանը ձմռանը տատանվում է 0 - 2 ° С, ամռանը՝ 19 - 24 ° С։ Ջերմաստիճանի բացարձակ մաքսիմումը գրանցվել է +40 ° С, մինիմումը՝ −30 ° С։ Միջին տարեկան տեղումների քանակը կազմում է մոտ 300 մմ։

Համեմատաբար փոքր հողի շերտի վրա աճում են տափաստանային բույսեր, ծառերը բացակայում են, չնայած տարվում են աշխատանքներ դրանց աճեցման ուղղությամբ։

Չվող թռչյունները օգտագործում են կղզին սեզոնային միգրացիաների ժամանակ որպես հանգստի վայր։ Գարնանային ժամանակ Զմեինիի վրա հանդիպում են մինչև 234 տեսակի թռչյուններ։ Դանուբի հոսանքով, որի գետաբերանի դիմաց գտնվում է կղզին, երբեմն այստեղ են քշվում լորտու օձեր, այստեղից էլ տրվել է կղզու անունը։ Կղզուն հարող ջրերում բնակվում են 49 տեսակի ձկներ և 6 տեսակի ծովախեցգետիններ, որոնցից համապատասխանաբար 3 և 4 տեսակները ներառված են Ուկրաինայի կարմիր գրքում։ 1998 թվականի դեկտեմբերի 9-ից Ուկրաինայի Նախագահի հրամանով կղզու տարածքում ստեղծվել է «Զմեինի կղզի» համապետական նշանակության որսարգելոց, որի կազմի մեջ է մտնում կզղու բնապահպանական թանկարժեք նշանակություն ունեցող մասը և 500 մ նրան հարող Սև ծովի ջրային տարածքը։ Որսարգելոցի ընդհանուր տարածքը կազմում է 232 հա։

Պատկերասրահ

• 

  Զմեինի կղզին 1896 թվականին

• 

  Ափամերձ ժայռերը

• 

  Կղզու ափը

• 

  Տեսարան դեպի կղզին

Տես նաև

• Օձերի կղզի (Բրազիլիա)
• Հաջողության զինվորները (ֆիլմ)

Արտաքին հղումներ

• Զմեինի կղզին
• Ս. Օխոտնիկով Աքիլեսի սրբավայրը Լևկե կղզու վրա (Զմեինի) // Կիև, Նաուկով դումկա - 1993.- 140 էջ.
• Սերգեյ Աստախով (11 ապրիլի 2008)։ «Պոսեյդոնի ընծան. ուկրաինական Զմեինի կղզին թևակոխում է նոր դարաշրջան»։ 2000 (թերթ)։ Արխիվացված օրիգինալից 2011-08-27-ին։ Վերցված է 2013-03-17 
• ՄԱԿ-ի ՄԴ-ում Ռումինիան ընդդեմ Ուկրաինայի գործի նյութերը(անգլ.)

Մեդիա ֆայլեր

Վիքիպահեստ նախագծում կարող եք այս նյութի վերաբերյալ հավելյալ պատկերազարդում գտնել Զմեինի կղզի կատեգորիայում։