Ելենա Մկրտչյան
Ելենա (Լինա) Վարդանի (Վլադիմիրի) Մկրտչյան (1955, Օդեսա, Ուկրաինական ԽՍՀ, ԽՍՀՄ), հայկական ծագմամբ ուկրաինացի երգչուհի (կոնտրալտո)[1]։
| Ելենա Մկրտչյան | |
|---|---|
| Ծնվել է | 1955 Օդեսա, Ուկրաինական ԽՍՀ, ԽՍՀՄ |
| Երկիր |  ԽՍՀՄ և  Ուկրաինա |
| Ժանրեր | կրոնական երաժշտություն |
| Մասնագիտություն | երգչուհի |
| Երգչաձայն | կոնտրալտո |
| Գործիքներ | վոկալ |
| Կրթություն | Ռուսաստանի Գնեսինների անվան երաժշտության ակադեմիա և Մոսկվայի կոնսերվատորիա |
| Կայք | mkrtchyan-lina.narod.ru/index.htm |
Կենսագրություն խմբագրել
Ելենա Մկրտչյանը ծնվել է 1955 թվականին Օդեսայում։ 1977 թվականին ավարտել է Մոսկվայի Գնեսինների անվան երաժշտամանկավարժական ինստիտուտը, 1979 թվականին՝ Մոսկվայի պետական կոնսերվատորիայի մեներգեցողության բաժինը, իսկ 1982 թվականին՝ Մոսկվայի թատերարվեստի պետական ինստիտուտը։
Ձայնի եզակի դիապազոնն ընդգրկում է ամենացածր կոնտրալտոյից մինչև ամենաբարձր սոպրանոյի նոտաները։ Երգացանկում ընդգրկված են 13-րդ դարի իտալական և հոգևոր երգերից մինչև ժամանակակից կոմպոզիտորների 800-ից ավելի գործեր։
Ելենա Մկրտչյանը ռուսական հոգևոր երգեցողությունը ներկայացրել է Վատիկանում։ Ֆրանց Շուբերտի իր յուրահատուկ մեկնաբանության համար նա դարձել է միակ օտարազգի երգչուհին, որը հրավիրվել է մասնակցելու գերմանական «Շուբերտիանա» ազգային փառատոնին։
Բարեգործական համերգներով հանդես է եկել Գերմանիայում, Շվեյցարիայում, Լեհաստանում, Իտալիայում, Իսպանիայում, Պորտուգալիայում, Հոլանդիայում։ 1996 թվականին Մոսկվայի «Նոր օպերա» թատրոնի նվագախմբի հետ, «Ընդհատված սրինգ» բարեգործական ակցիայի շրջանակում, հանդես է եկել Նյու Յորքի «Քառնեգի Հոլլ» համերգասրահում (ի նպաստ Սպիտակի 1988 թվականի երկրաշարժից տուժածների)։ Նրա համերգները Փարիզում (1998) բարձր են գնահատել ֆրանսիացի երաժշտաքննադատները և համեմատել ռուս ճանաչված երգիչ Ֆ. Ի. Շալյապինի փարիզյան առաջին ելույթի հետ։
Մասնակցել է Ա. Տերտերյանի հիշատակին նվիրված վոկալ երաժշտության երեկոներին։ Վարում է «Վերադարձ հայրենիք» հոգևոր-լուսավորչական հեղինակային հաղորդաշարը («Սուրբ Սերաֆիմ Սարովսկու հանրագիտարան» հիմադրամի մեդալ)։
1996 թվականին «Պետրոպոլ» հրատարակչությունը և Ցարսկոե Սելոյի լիցեյը երգչուհուն շնորհել է պետերբուրգյան բանաստեղծների «Պուշկինյան մրցանակ» «Հայրենական մշակույթին անշահախնդիր և անձնուրաց ծառայության համար»։
Ծանոթագրություններ խմբագրել
- ↑ Мария Мономенова, "Русская народная линия" (2013 թ․ հունվարի 8). «Лина Мкртчян. Убитая живая». Русские новости. Արխիվացված օրիգինալից 2017 թ․ ապրիլի 3-ին. Վերցված է 2017 թ․ ապրիլի 2-ին.
Արտաքին հղումներ խմբագրել
- «Лина Мкртчян». last.fm. Վերցված է 2017 թ․ ապրիլի 2-ին.
- «Лина Мкртчян слушать онлайн». mail.ru. Վերցված է 2017 թ․ ապրիլի 2-ին.
- Ելենա Մկրտչյանի ելույթները
- Ելենա Մկրտչյանի կենսագրությունը և ստեղծագործական ուղին
Այս հոդվածի կամ նրա բաժնի որոշակի հատված վերցված է «Հայ երաժշտության հանրագիտարանից», որի նյութերը թողարկված են՝ Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։ 
|