Դոնեցկի պատմագավառագիտական թանգարան

Դոնեցկի պատմագավառագիտական թանգարան
Տեսակ	թանգարան
Երկիր	Ռուսաստան
Տեղագրություն	Դոնեցկ
Վայր	Ռոստովի մարզ
Հիմնադրվել է	2005
Կայք	museum-donetck.rnd.muzkult.ru/about/

Դոնեցկի պատմագավառագիտական թանգարան (ռուս.՝ Донецкий историко-краеведческий музей), թանգարան ՌԴ Ռոստովի մարզի Դոնեցկ քաղաքում։ Ամբողջական անվանումը` «Դոնեցկի պատմագավառագիտական թանգարան» մշակույթի համայնքային բյուջետային հաստատություն^[1]։

Պատմություն և նկարագրություն

Դոնեցկի պատմագավառագիտական թանգարանը բացվել է 2005 թվականի օգոստոսին Դոնեցկ քաղաքի 50-ամյակի առթիվ։ Քաղաքը հիմնադրվել է Դոնի կազակների կողմից 1681 թվականին՝ որպես Գունդորովսկայա ստանիցա։ 1955 թվականին ստացել է ժամանակակից անվանումը Սևերսկի Դոնեց գետի ափին գտնվելու պատճառով^[2]։

Դոնեցկի պատմագավառագիտական թանգարան
Մակագրությամբ ցուցանակը
Թանգարանում
Սևերսկի Դոնեց
Սևերսկի Դոնեցի ափերին

Դոնեցկ քաղաքի ամբողջ պատմությունն արտացոլվում է թանգարանում։

Դոնեցկի պատմագավառագիտական թանգարանը բաղկացած է 9 ցուցասրահներից, որոնցում հավաքված են Դոնի կազակներին պատկանած հինավուրց իրեր, լուսանկարներ, փաստաթղթեր, գրքեր, կենցաղային առարկաներ^[3]։

«Մարտական փառք» ցուցասրահը ծանոթացնում է Հայրենական մեծ պատերազմի ճակատներում կռված տեղացիներին, Աֆղանստանում զոհված զինծառայողներին։ Ցուցափեղկերում ներկայացված են լուսանկարներ, պարգևներ, փաստաթղթեր, անձնական իրեր և այլ առարկաներ^[3]։

«Կազակական կուրեն» և «Կազակական կենցաղ» ցուցասրահներում ներկայացված են XVIII դարի վերջի - XX դարի կեսի կազակական կենցաղի առարկաներ` խոհանոցային պարագաներ, աշխատանքի գործիքներ, ձեռքի ալրաղաց։ Հատուկ հետաքրքրություն է առաջացնում XIX դարի տնային ջուլհակահաստոցը^[3]։

«Տիեզերագնացություն» ցուցասրահը ներկայացնում է Դոնեցկի պատվավոր բնակիչ տիեզերագնաց Յուրի Վլադիմիրովիչ Ուսաչովին։ Դահլիճում ներկայացված են նրա անձնական իրերը` աշխատանքային հագուստը, սկաֆանդրը, սաղավարտը և այլն։ Յուրի Ուսաչովը կատարել է տիեզերական չորս թռիչք։ Նա Ռուսաստանի Դաշնության հերոս է^[3]։

Քաղաքի արդյունաբերությունը, նրա ծագման, զարգացման պատմությունը և ծաղկումը ցուցադրվում են «Մեքենաշինություն», «Թեթև արդյունաբերություն», «Ածխային արդյունաբերություն» ցուցասրահներում^[3]։

«Դոնի երկրամասի բնությունը» ցուցասրահում ցուցադրվում են կենդանիների` աղվեսի, նապաստակների, ջրարջանման շան, ոզնու խրտվիլակներ։ Թռչուններից ներկայացված են բադերը, կտցարները, սպիտակ կարապները և այլն^[3]։

Նոր ցուցանմուշներին, ցուցահանդեսներին, հավաքածուներին Դոնեցկ քաղաքի բնակիչներն ու հյուրերը ծանոթանում են թանգարանի «Ցուցահանդեսային» սրահում^[3]։

«Ցուցահանդեսային» սրահում անցկացվում են թանգարանի զանգվածային միջոցառումները` ճանաչողական ժամերը, դասախոսությունները, թանգարանային դասերը, շնորհանդեսները, թեմատիկ և երաժշտական երեկոները^[3]։