Murder Ballads
Murder Ballads, Nick Cave and the Bad Seeds խմբի իններորդ ստուդիական ալբոմը, որը թողարկվել է 1996 թվականին։ Ներառում է ինչպես ժողովրդական, այնպես էլ հեղինակային «բալլադներ սպանությունների մասին»՝ հանցագործությունների և սպանությունների մասին երգեր, որոնք առավել հաճախ կատարվել են կրքի հողի վրա։ Առավել մեծ ճանաչում է ստացել «Where the Wild Roses Grow» երգը՝ Նիկ Քեյվի և Քայլի Մինոուգի դուետը, որը ARIA Music Awards-ի երկու մրցանակ է ստացել 1996 թվականին։ Ինքը Նիկը առաջադրվել է MTV մրցանակի որպես տարվա լավագույն կատարող, բայց ալիքին ուղղված բաց նամակում հրաժարվել է դրանից։ Նա իր որոշումը բացատրել է նրանով, որ Nick Cave-ի և Bad Seeds-ի երաժշտությունը յուրահատուկ է, հետևաբար փաստացիորեն ոչ ոք չկա, որի հետ ինքը կմրցակցի[1]։ Ալբոմի ձայնագրմանը մասնակցած մյուս հայտնի երաժիշտներից են Քեյվի ընկեր Շեյն Մաքգոունը և Պի Ջեյ Հարվին, որի հետ երաժիշտը կարճատև ռոմանտիկ հարաբերություններ է ունեցել։ Ընդհանուր առմամբ, Murder Ballads-ի երգերի տեքստերում նկարագրվում են 65 մարդու մահ։
| Murder Ballads | |
|---|---|
| Nick Cave and the Bad Seeds-ի | |
| Թողարկված | փետրվարի 20, 1996 |
| Ժանր | Պոստ փանկ |
| Տևողություն | 3523 s |
| Լեզու | անգլերեն |
| Լեյբլ | Mute Records |
| Պրոդյուսեր | Victor Van Vugt? |
Ալբոմի մասին
խմբագրելMurder Ballads-ը միահամուռ կերպով գովասանքի է արժանացել բազմաթիվ երաժշտական հրապարակումների, ներառյալ Rolling Stone-ի և Entertainment Weekly-ի կողմից։ New York Times–ն ալբոմի մասին ասել է. «Murder Ballads–ն ավելին է, քան պատմությունները։ Յուրաքանչյուր երգում պարոն Քեյվը խնամքով ստեղծում է սարսափելի սյուժե, այնուհետև այն տեղավորում մահվան մեկ կերպարի մեջ»[2]։ Murder Ballads-ը, ըստ Melody Maker-ի, 1996 թվականի 50 լավագույն ալբոմների շարքում գրավել է 16-րդ տեղը, իսկ New Musical Express-ի նույն ցանկում՝ 7-րդ տեղը[3]։
Տեղեկություն երգերի մասին
խմբագրել- «Song of Joy», պատմություն մի տղամարդու մասին, որն ամուսնացած է Ջոյ անունով մի կնոջ հետ («Ուրախություն»)։ Նրանք ունեն երեք դուստր՝ Հիլդան, Հեյթին և Հոլլին։ Թե՛ Ջոյը, և թե՛ երեխաները դաժանորեն սպանվել են, և նրանց հայրն ու ամուսինը դարձել է թափառաշրջիկ և խնդրում է իրեն թույլ տալ գիշերել։ Սակայն ունկնդիրը կասկածում է, որ պատմողը հենց մարդասպանն է. մարդասպանը պատին թողնում է «Նրա կարմիր աջ ձեռքը» մակագրությունը (անգլ.՝ His red right hand)` մեջբերում Միլթոնի «Կորուսյալ դրախտ» ստեղծագործությունից, իսկ երգի վերջում թափառաշրջիկն ասում է. «Արևն ինձ համար մութ ու լուռ է լուսնի պես» (անգլ.՝ The Sun to me is dark And silent as the Moon), որը նույնպես մեջբերում է Միլթոնի ստեղծագործությունից («Մարտիկ Սամսոն» պոեմ)։ «Կարմիր աջ ձեռքին» նվիրված է Քեյվի մեկ այլ երգ` Let Love In-ից «Red Right Hand»։
- «Stagger Lee», ժողովրդական երգի վերամշակում իրական մարդասպանի՝ աֆրոամերիկացի Շելթոն Լիի մասին, որը «Ստագեր» մականունով կավատ էր և սպանել է իր մրցակցին 1895 թվականին։ Նրա մասին բալլադ ստեղծվել է դեռ 1920-ականներին։
- «Henry Lee», մի քանի ժողովրդական բալլադների թեմայով վերամշակում մի կնոջ մասին, որն սպանում է իր սիրելիին, քանի որ նա պատրաստվում է լքել իրեն կամ հեռանալ։ Երգը ձայնագրվել է Պի Ջեյ Հարվիի հետ զուգերգով, և դրա հիման վրա նկարահանվել է տեսահոլովակ։
- «Lovely Creature», ներկայացնում է սիրո որոնման և այն կորցնելու վերացական պատմություն։ Երգի հերոսը հանդիպում է «կանաչ ձեռնոցներով և մազերի մեջ ժապավեններով» աղջկա, նրան տանում տարօրինակ անապատ՝ դեպի «բուրգեր ու սֆինքս» և այնտեղ սպանում։
- «Where the Wild Roses Grow», ըստ Նիք Քեյվի, ոգեշնչված է ժողովրդական «Ուռենիների այգի» («The Willow Garden») բալլադից։ Սա դասական «բալլադ է սպանության մասին», որտեղ փեսան սպանում է իր սիրելիին «այնտեղ, որտեղ աճում են վայրի վարդերը»։ Այս երգի ևս մեկ տարբերակ կա, որը թողարկվել է B-Sides & Rarities հավաքածուում։ Այդ տարբերակում Մինոուգ հատվածները կատարում է Bad Seeds–ի կիթառահար Բլիքսա Բարգելդը։ Այս երգը համերգների ժամանակ կատարելիս Բլիքսան երգի տեքստը կարդացել է թղթից՝ դրանով իսկ ընդգծելով, որ ինքը «Էլայզա Դեյը» չէ։ 2012 թվականին ստեղծվել է երրորդ տարբերակը՝ «Where the Wild Roses Grow», որը Քեյվը և Մինոուգը ձայնագրել են վերջինիս Abbey Road Sessions ալբոմի համար։ Նվագախմբային տարբերակը շատ ավելի տխուր է, քան ռոմանտիկ բնօրինակը։
- «The Curse of Millhaven», պատմություն Միլհեյվեն փոքր քաղաքը ցնցած մի շարք տարօրինակ և դաժան հանցագործությունների մասին, որը պատմում է 14-ամյա մի աղջիկ՝ Լորետան, որն ունի «կանաչ աչքեր և դեղին մազեր»։ Կենդանի մնացած տիկին Կոլգեյթի շնորհիվ պարզվում է, որ բոլոր սպանությունները կատարել է հենց ինքը՝ Լորետան։ Միլհեյվեն քաղաքը հեղինակը վերցրել է Փիթեր Սթրաուբի «Կապույտ վարդ» վիպակից։
- «The Kindness of Strangers», պատմություն մի երիտասարդ աղջկա՝ Մերի Բելոուզի մասին, որը հեռանում է իր հայրենի քաղաքից՝ Արկանզասից և հանդիպում մի հմայիչ, բայց կասկածելի երիտասարդի՝ Ռիչարդ Սլեյդին։ Ռիչարդն սպանում է Մերիին, բայց ինքն է մեղավոր դրա համար, որովհետև հուսահատությունից և միայնությունից նա բաց է թողնում դուռը և նրան թույլ տալիս ներս մտնել։
- «Crow Jane», բլյուզ ոճով հայտնի երգի անուն, բայց Քեյվի տարբերակն ամբողջությամբ օրիգինալ է։ Այն պատմում է մի աղջկա մասին, որը ենթարկվում է խմբային բռնաբարության, որից հետո զենք է գնում և սպանում իրեն անպատվածներին։
- «O’Malley’s Bar», պատմություն մի մարդու մասին, որը գնում է բար և սպանում իր հարևաններին, ինչպես նաև բարի սեփականատիրոջը, նրա կնոջը և դստերը։ Իրադարձությունները ներկայացվում են մարդասպանի տեսանկյունից, որը բացահայտորեն հիանում է իրենով և իրեն երևակայում է որպես դև ու գերմարդ։ Երբ բարը շրջապատվում է ոստիկանության կողմից, հերոսը որոշում է ինքնասպան լինել, բայց արդյունքում դուրս է գալիս վեր բարձրացած ձեռքերով։ Երգի իրադարձություններին դժվար է հետևել, քանի որ այն տևում է ավելի քան 14 րոպե։
Կոմպոզիցիաների ցուցակ
խմբագրել| # | Անվանում | Տևողություն | Հեղինակ |
|---|---|---|---|
| 1. | Song of Joy | 6:47 | Քեյվ |
| 2. | Stagger Lee | 5:15 | Ժողովրդական ստեղծագործություն Nick Cave-ի և Bad Seeds-ի մշակմամբ |
| 3. | Henry Lee | 3:58 | Ժողովրդական ստեղծագործություն Քեյվի մշակմամբ |
| 4. | Lovely Creature | 4:13 | Բարգելդ, Քեյսի, Քեյվ, Հարվի, Ուայդլեր |
| 5. | Where the Wild Roses Grow | 3:57 | Քեյվ |
| 6. | The Curse of Millhaven | 6:55 | Քեյվ |
| 7. | The Kindness of Strangers | 4:39 | Քեյվ |
| 8. | Crow Jane | 4:14 | Քեյսի, Քեյվ |
| 9. | O’Malley’s Bar | 14:28 | Քեյվ |
| 10. | Death Is Not the End | 4:26 | Բոբ Դիլան |
Ծանոթագրություններ
խմբագրել- ↑ «NICK CAVE LETTER TO MTV». Արխիվացված է օրիգինալից 2012 թ․ ապրիլի 14-ին. Վերցված է 2019 թ․ հոկտեմբերի 30-ին.
- ↑ New York Times, 2.11.1996, стр. 30
- ↑ «Melody Maker End Of Year Critic Lists — 1996». Արխիվացված է օրիգինալից 2019-07-25-ին. Վերցված է 2019-10-30-ին.
{{cite web}}: no-break space character in|title=at position 38 (օգնություն)
Գրականություն
խմբագրել- Dennis Wepman, Ronald B. Newman, Murray B. Binderman The Life: The Lore and Folk Poetry of the Black Hustler. — University of Pennsylvania Press, 1976. — 205 p. — ISBN 087067367X
Արտաքին հղումներ
խմբագրել- Ալբոմը Nick Cave and the Bad Seeds խմբի պաշտոնական կայքում Արխիվացված 2012-10-16 Wayback Machine (անգլ.)
- BBC գրախոսական (անգլ.)