Ուիմբլդոնի մրցաշարի տղամարդկանց մենախաղ 2015, թենիսի տղամարդկանց մենախաղի մրցաշար, թենիսի հիմնական՝ Մեծ Սաղավարտի, մրցաշարերից մեկը։ Անց է կացվել 2015 թվականի հունիսի 19-ից մինչև հուլիսի 12-ը, Լոնդոնի «All England Lawn Tennis and Croquet Club» («Համանգլիական լաուն-թենիսի և կրոկետի ակումբ») ակումբի կորտերում, Մեծ Բրիտանիա։
Նովակ Ջոկովիչը մրցաշարի գործող չեմպիոններ էր և հաջողությամբ պաշտպանել է տիտղոսը, նախորդ տարվա մրցաշարի եզրափակիչի կրկնությունը հանդիսացող եզրափակիչում հաղթանակ տանելով Ռոջեր Ֆեդերերի նկատմամբ՝ 7-6(1), 6-7(10), 6-4, 6-3։
Տիտղոսը Ջոկովիչի համար երրորդն էր Ուիմբլդոնի և իններորդը Մեծ Սաղավարտի մենախաղի մրցաշարերում, ինչպես նաև նրա երկրորդ խոշոր հաղթանակը մրցաշրջանի ընթացքում։ Ֆեդերերը հնարավորություն ուներ դառնալու առաջին թենիսիստը, ով Ուիմբլդոնի մրցաշարում կհաղթեր ութերորդ անգամ[1]։ Ֆեդերերը դարձել է առաջին թենիսիստը, ով Մեծ Սաղավարտի մեկ մրցաշարում 10 անգամ հասել է եզրափակիչ։
2002 թվականի մրցաշարի հաղթող Լեյթոն Հյուիթը մասնակցել է իր վերջին Ուիմբլդոնին և առաջին շրջանում հինգ սեթում պարտվել է Յարկո Նիեմինենին (ով նույնպես մասնակցում էր իր վերջին Ուիմբլդոնին)[2]։
Երկրորդ շրջանում 102-րդ վարկանիշ ունեցող գերմանացի Դաստին Բրաունը պարտության է մատնել աշխարհի թիվ 10 ռակետ Ռաֆայել Նադալին, ով Ուիմբլդոնում հաղթանակ էր տարել 2008 և 2010 թվականներին։ Բրաունը Նադալին նախկինում պարտության էր մատնել 2014 թվականի Հալլեի «Gerry Weber Open» մրցաշարում, նախկինում նրանց միջև կայացած միակ հանդիպումում։ Դա անընդմեջ յորրորդ տարին է, երբ Նադալը մրցաշարից դուրս է մնացել վաղ շրջանում, պարտվելով վարկանիշային աղյուսակում 100-րդ և ցածր դիրք զբաղեցնող թենիսիստին։ Մինչ այդ նա 2012 թվականին պարտվել էր Լուկաշ Ռոսոլին (այդ պահին 100-րդ ռակետ), 2013 թվականին Սթիվ Դարսիին (135-րդ) և 2014 թվականին Նիկ Կիրգիոսին (144-րդ)[3]։
Դա եղել է առաջին խոշոր մրցաշարը 2002 թվականի ԱՄՆ բաց առաջնությունից հետո, երբ իսպանացի Դավիդ Ֆերերը (աշխարհի թիվ 8 ռակետ) չի մասնակցել մրցաշարին, դաստակի վնասվածքի պատճառով, որը նա ստացել էր մրցաշարին նախորդող «Queen's Club Championships» մրցաշարում։ Դրանով ավարտվել է Ֆերերի 52 անընդմեջ Մեծ Սաղավարտի մրցաշերին մասնակցությունը։