Ոզնասունկ բուստանման

Ոզնասունկ բուստանման
Ոզնասունկ բուստանման
Դասակարգում
Թագավորություն	Սնկեր (Fungi)
Ենթատիպ	Agaricomycotina
Դաս	Ագարիկոմիցետներ (Agaricomycetes)
Ենթադաս	Agaricomycetidae
Կարգ	Russulales
Ընտանիք	Hericiaceae
Ցեղ	Hericium
Տեսակ	Ոզնասունկ բուստանման (H. coralloides)
Միջազգային անվանում
Hericium coralloides Pers., 1794

Ոզնասունկ բուստանման, մարջանանման (լատին․՝ Hericium coralloides), Hericiaceae ընտանիքին պատկանող սունկ, որը գրանցված է Հայաստանի Հանրապետության Կարմիր գրքում։

Նկարագրություն

Քսիլոտրոֆ, դեկորատիվ սունկ է։ 4-15 սմ բարձրությամբ պտղամարմինները երիտասարդ վիճակում սպիտակ են, հասունանալուց հետո՝ վարդագույն, դեղնավուն մարջանանման ճյուղավորված հաստ ոտիկանման հիմքով, թարմ վիճակում մսալի են, չորացած վիճակում՝ փխրուն։ Հաճելի սնկային հոտով, թելիկանման պտղամիսը սպիտակ է։ Հիմենոֆորը փշաձև է։ 5-10 մմ երկարությամբ սպիտակ, դեղնավուն կամ բաց շագանակագույն փշերը կոնաձև են։ Հարթ, լայն էլիպսաձև կամ գնդաձև ամիլոիդ սպորները 5–6,5 x 4,5–6 մկմ են։

Տարածվածություն

Հայաստանում հայտնաբերվել է Իջևանի («Դիլիջան» ազգային պարկ, Շամշադին,) և Սևանի («Սևան» ազգային պարկ) ֆլորիստիկական շրջաններում։ Ընդհանուր արեալը ընդգրկում է Եվրոպան, Ասիան, Հյուսիսային Ամերիկան, Ավստրալիան, Հարավային Կովկասը (Վրաստան, Հայաստան)։

Էկոլոգիա

Աճում է ծովի մակարդակից 1800-2200 մետր բարձրությունների վրա, լայնատերև ծառատեսակների մահացած բների և կոճղերի վրա, լեռնային գոտիներում։

Պահպանություն

Խոցելի տեսակ է, որը Հայաստանում պահպանվում է «Դիլիջան» և «Սևան» ազգային պարկերի համապատասխան էկոհամակարգերի կազմում։ Որոշ երկրներում պահպանվում է միցելիալ կուլտուրաների հավաքածուներում։

Ծանոթագրություններ

Վիքիցեղերն ունի նյութեր, որոնք վերաբերում են «Ոզնասունկ բուստանման» հոդվածին։

Վիքիպահեստն ունի նյութեր, որոնք վերաբերում են «Ոզնասունկ բուստանման» հոդվածին։