Մասրիկ (գետ)
Մասրիկ, Մազրա, Մազրի, Մեզրե, Մյազրաչայ, Սոդ, Սոդից գետ, գետ Հայաստանի Գեղարքունիքի մարզում։ Սկիզբ է առնում Արևելյան Սևանի լեռների հարավարևմտյան լանջերից և Ծովակ գյուղից հյուսիսում թափվում Սևանա լիճ։ Երկարությունը՝ 45 կմ[1]։ Ակունքները աղբյուրներից սնվող մանր ու արագահոս առվակներ են, որ միանում և գետ են դառնում լճամերձ հարթավայր հասնելուց միայն։ Միջին և ստորին հոսանքում դանդաղահոս է և գալարուն։ Նախկինում Մասրիկ դեպի Սևան էր հոսում Գիլլի ծանծաղ ու ճահճապատ լճի միջով։ Այժմ՝ Սևանի մակարդակի իջեցման հետևանքով, Գիլլի փոքրիկ լիճն ու նրա ճահճուտները չորացել են և գետը դանդաղ հոսքով թափվում է ուղղակի Սևանա լիճը, ջրհավաք ավազանը՝ 682 կմ², տարեկան հոսքը՝ 131 մլն մ³։ Հորդանում է գարնանը, ջրերն օգտագործվում են ոռոգման համար, Ղ. Ալիիշանը Մասրիկ կազմված Է համարում Քեթի (Քեյթի), Երիշատ կամ Արաշատ և Սոդից (Սոդ) գետերի միացումից։ Որոնցից Երիշատը Մասրիկի կենտրոնական ճյուղն է, Քեթին՝ միջին և վերին հոսանքը, իսկ Սոդ կամ Սոդից գետը՝ աջ օժանդակը։ Սակայն Սոդ կամ Սոդից գետ հին անունով երբեմն անվանել են նաև ամբողջ գետը[2]։
| Մասրիկ | |
|---|---|
| Բնութագիր | |
| Երկարություն | 45 կմ |
| Ավազանի մակերես | 682 կմ² |
| Ջրահոսք | |
| Ակունքի տեղակայում | Արևելյան Սևանի լեռներ |
| Գետաբերանի տեղակայում | Սևանա լիճ |
| Կոորդինատներ | |
| Տեղակայում | |
| Հոսող հոսքեր | Ակնաջուր, Գետիկ, Դաշքենիջուր, Դարինդերեսի, Լուսնաձոր, Կաթնաղբյուր, Սոթք, Սոնայի աղբյուր, Սևաջուր, Գըրքբուլաղ և Երիշատ |
| Երկիր |  Հայաստան |
| Երկրամաս | Գեղարքունիքի մարզ |
Ծանոթագրություններ
խմբագրել- ↑ Հայաստանի Հանրապետության Ֆիզիկաաշխարհագրական օբյեկտների համառոտ տեղեկատու-բառարան, Երևան, «Գեոդեզիայի և քարտեզագրության կենտրոն ՊՈԱԿ», 2007, էջ 80 — 150 էջ։
- ↑ Հակոբյան Թ. Խ., Մելիք-Բախշյան Ստ. Տ., Բարսեղյան Հ. Խ., Հայաստանի և հարակից շրջանների տեղանունների բառարան, հ. 3 [-] (խմբ. Մանուկյան Լ. Գ.), Երևան, «Երևանի Համալսարանի Հրատարակչություն», 2001, էջ 709 — 992 էջ։