Մանվել Ասատրյան

Վիքիպեդիայում կան հոդվածներ Ասատրյան ազգանունով այլ մարդկանց մասին։

Մանվել Եգորի Ասատրյան (26 ապրիլի, 1926, Արագած - 25 հունվարի, 2000, Երևան), հայ լեզվաբան, հայերենագետ, բանասիրական գիտությունների դոկտոր (1970), պրոֆեսոր (1973)։

Կենսագրություն

Մանվել Ասատրյանը ծնվել է 1926 թվականի ապրիլի 26-ին Էջմիածնի շրջանի Արագած գյուղում։ 1939 թվականին ավարտել է ծննդավայրի յոթնամյա դպրոցը, 1942 թվականին՝ Էջմիածնի մանկավարժական ուսումնարանը, 1951 թվականին՝ ԵՊՀ բանասիրության ֆակուլտետի հայոց լեզվի և գրականության բաժինը։ 1942-1944 թվականներին աշխատել է որպես ուսուցիչ, 1954 թվականից՝ ԵՊՀ բանասիրության ֆակուլտետի հայոց լեզվի ամբիոնում որպես դասախոս, դասավանդել է հայոց լեզվի ձևաբանություն և բարբառագիտություն։

1954 թվականին Մանվել Ասատրյանը պաշտպանել է թեկնածուական, 1970 թվականին՝ դոկտորական ատենախոսություն։ 1973 թվականին նրան շնորհվել է պրոֆեսորի կոչում։ 1990-1995 թվականներին եղել է ԵՊՀ հայոց լեզվի պատմության ամբիոնի վարիչ։

Մ. Ասատրյանը մահացել է 2000 թվականի հունվարի 25-ին Երևանում։

Մանվել Ասատրյանի որդին է ֆիզիկոս-տեսաբան Հրաչյա Ասատրյանը։

Երկեր

• Խոսքի կուլտուրայի մասին, Երևան, 1958,
• Ժամանակակից հայերենի ձևաբանության հարցեր, 3 հատորով, Երևան, 1970-77,
• Բայի սեռերը ժամանակակից հայերենում, Երևան, 1959,
• Ուրմիայի (Խոյի) բարբառը, Երևան, 1968,
• Լոռու խոսվածքը, Երևան, 1968,
• Ժամանակակից հայոց լեզու, Երևան, 1983,
• Ժամանակակից հայոց լեզու. շարահյուսություն. պարզ նախադասություն, բուհական դասագիրք, Երևան, 1987։

Աղբյուրներ

• Հ. Պետրոսյան, Հայերենագիտական բառարան, Երևան, 1987, էջ 58։
• Մանվել Ասատրյան
• Մանվել Ասատրյան Արխիվացված 2017-04-18 Wayback Machine