Մանուելա Ֆեռեյրա Լեյտի
Մարիա Մանուելա Դիաշ Ֆեռեյրա Լեյտի (արտասանվում է [ mɐnuˈɛlɐ fɨˈʁɐjɾɐ ˈlɐjtɨ․ դեկտեմբերի 3, 1940[1], Լիսաբոն, Պորտուգալիա), պորտուգալացի կին քաղաքական գործիչ և տնտեսագետ, կրթության նախարար՝ 1993-1995 թվականներին, ֆինանսների նախարար՝ 2002-ից 2004 թվականներին, սոցիալ-դեմոկրատական կուսակցության (PSD) նախագահ՝ 2008–2010 թթ.։ Մանուելայի հորական պապի հայրը՝ Խոսե Դիաշ Ֆեռեյրան, եղել է պորտուգալացի բարձրաստիճան դիվանագետ։
| Մանուելա Ֆեռեյրա Լեյտի | |
| |
| Կուսակցություն՝ | Սոցիալ-դեմոկրատական կուսակցություն |
|---|---|
| Կրթություն՝ | Technical University of Lisbon? և Բարձրագույն տեխնիկական ինստիտուտ |
| Մասնագիտություն՝ | տնտեսագետ և քաղաքական գործիչ |
| Ծննդյան օր | դեկտեմբերի 3, 1940[1] (83 տարեկան) |
| Ծննդավայր | Լիսաբոն, Պորտուգալիա |
| Քաղաքացիություն |  Պորտուգալիա
|
| Պարգևներ | |
Կենսագրություն
խմբագրելՄանուելա Ֆեռեյրա Լեյտին ծնվել ու հասակ է առել ավանդապահ ընտանիքում։ 1963 թվականին ավարտել է Լիսաբոնում գործող տնտեսական և ֆինանսական գիտությունների բարձրագույն ինստիտուտը (Instituto Superior de Ciências Económicas e Financeiras)՝ մասնագիտանալով տնտեսագիտության մեջ։ Աշխատել է Պորտուգալիայի Օեյրաշ քաղաքում գործող Գյուլբենկյան գիտահետազոտական ինստիտուտի՝ Instituto Gulbenkian de Ciência-ի տնտեսական և ֆինանսական կենտրոնում, ապա դարձել Պորտուգալիայի կենտրոնական բանկի՝ Banco de Portugal- ի աշխատակից։ 1986-1990 թվականներին եղել է ֆինանսների նախարարության գլխավոր տնօրեններից մեկը։
1985 թվականին անդամագրվել է սոցիալ-դեմոկրատական կուսակցությանը։ 1990-1991 թվականներին եղել է պատասխանատու ղեկավար պետական բյուջեի գծով, 1993 թվականին նշանակվել պետքարտուղարի տեղակալ։ 1991 թվականին առաջին անգամ ընտրվել է հանրապետության Ազգային ժողովի պատգամավոր, 1995, 1999 և 2002 թվականներին վերընտրվել։ 1996–2001 թվականներին եղել է խորհրդարանի փոխնախագահ, 2001–2002 թվականներին՝ սոցիալ-դեմոկրատական կուսակցության՝ PSD-ի պատգամավորական խմբի ղեկավար։
1993 թվականի դեկտեմբերից մինչև 1995 թվականի հոկտեմբերը զբաղեցրել է կրթության նախարարի պաշտոնը վարչապետ Անիբալ Կավակո Սիլվայի կառավարությունում։ 2002 թվականի ապրիլի 6-ին վերադարձել է կառավարություն՝ որպես ֆինանսների նախարար Ժոզե Մանուել Բառոզուի կաբինետում։ Այդ պաշտոնն զբաղեցրել է մինչև 2004 թվականի հուլիսի 16-ը, որից հետո դարձել է Banco de Portugal-ի խորհրդատու, իսկ 2006 թվականին՝ Banco Santander-ի կառավարիչ։
2008 թվականի մայիսի 31-ին Մանուելա Ֆեռեյրա Լեյտին կուսակցական համագումարում ընտրվել է սոցիալ-դեմոկրատական կուսակցության նոր նախագահ՝ փոխարինելով Լուիս Ֆիլիպե Մենեժեշին[3]։ Նա այդ պաշտոնը զբաղեցրել է մինչև 2010 թվականի մարտի 26-ը, երբ Պեդրո Պասոս Կոելյոն է ստանձնել PSD-ի ղեկավարությունը։ 2009-2011 թվականներին Մանուելան կրկին աշխատել է Պորտուգալիայի խորհրդարանում։
2016 թվականին նա նշանակվել է Պորտուգալիայի քաղաքացիական օրդերների կանցլեր[4]։
Մանուելա Ֆեռեյրա Լեյտին արժանացել է բազմաթիվ կառավարական պարգևների, այդ թվում՝ Քրիստոսի շքանշանի մեծ խաչի[5] և Ինֆանտ Հենրիի շքանշանի մեծ խաչի։
Ծանոթագրություններ
խմբագրել- ↑ 1,0 1,1 Munzinger Personen (գերմ.)
- ↑ 2,0 2,1 http://www.ordens.presidencia.pt/?idc=153
- ↑ «Manuela Ferreira Leite vence directas no PSD». publico.pt (պորտուգալերեն). 31 maja 2008.
- ↑ «Presidente da República deu posse aos Chanceleres das Ordens Honoríficas». presidencia.pt (պորտուգալերեն). 23 marca 2006.
- ↑ «Cavaco condecora Manuela Ferreira Leite no Dia de Portugal». publico.pt (պորտուգալերեն). 8 czerwca 2011.
Արտաքին հղումներ
խմբագրել- «PSD: Manuela Ferreira Leite, a primeira mulher a dirigir o partido de Sá Carneiro – Perfil». sapo.pt (պորտուգալերեն). 31 maja 2008.
- «Maria Manuela Dias Ferreira Leite». min-edu.pt (պորտուգալերեն).
- «Profil na stronie Zgromadzenia Republiki» (պորտուգալերեն).
 | Վիքիպահեստն ունի նյութեր, որոնք վերաբերում են «Մանուելա Ֆեռեյրա Լեյտի» հոդվածին։ |