Կորյուն Նիկողոսյան

Կորյուն Նիկողոսյան (հունիսի 22, 1939(1939-06-22), Ձորաղբյուր, Աբովյանի շրջան, Հայկական ԽՍՀ, ԽՍՀՄ - 1976, Երևան, Հայկական ԽՍՀ, ԽՍՀՄ), հայ գեղանկարիչ։

Կորյուն Նիկողոսյան
Ծնվել է	հունիսի 22, 1939(1939-06-22)
Ծննդավայր	Ձորաղբյուր, Աբովյանի շրջան, Հայկական ԽՍՀ, ԽՍՀՄ
Վախճանվել է	1976
Մահվան վայր	Երևան, Հայկական ԽՍՀ, ԽՍՀՄ
Քաղաքացիություն	Հայկական ԽՍՀ
Մասնագիտություն	նկարիչ

Կենսագրություն

Կորյուն Նիկողոսյանը ծնվել է Կոտայքի շրջանի Ձորաղբյուր գյուղում, 1939 թվականին։ Հիվանդության պատճառով դպրոց հաճախել է մինչև 6-րդ դասարան։ Եղել է ինքնուս նկարիչ։ Աշխատել է դիմանկարաների, թեմատիկ կոմպոզիցիաների ժանրերում։ Նիկողոսյանի կտավներին բնորոշ են ներամփոփ ու թախծոտ, խորհելու և կենսափիլիսոփայությանը դիմելու կարողունակ այլաբանական բանաստեղծական կերպարները, որոնցից յուրաքանչյուրի մեջ կա նկարչի անձը, ապրելակերպի և անկաշկանդ մտածողության արտացոլումը։ Չտրվելով գեղանկարչության հայտնի ուղղություններին՝ Նիկողոսյանը ստեղծել է ինքնատիպն ու յուրահատուկը՝ այն զարգացնելով ազգային գեղարվեստական ոգու և ավանդույթների հենքի վրա։ Իր ապրած 37 տարիների ընթացքում նկարիչն ստեղծել է մոտ 100 աշխատանք։

Կորյուն Նիկողոսյանի ստեղծագործությունների գերակշռող մասը պահպանվում է նրա հարազատների կողմից՝ նկարչի տուն-արվեստանոցում, որը վերածվել է տուն-թանգարանի (մասնավոր)։

Անհատական ցուցահանդեսներ

• Մոսկվա, 1971
• Կրասնոդար, 1975
• Հայաստանի նկարչի տուն, 1975
• Հայաստանի ժուռնալիստների տուն, 1983
• Նարեկացի արվեստի միություն, Երևան, 2009

Կորյուն Նիկողոսյանի աշխատանքները 1967 թվականին ցուցադրվել են Դանիայում։

Կորյուն Նիկողոսյանի տուն-թանգարան

Մեջբերումներ Կորյուն Նիկողոսյանի մասին

...Ինձ զարմացրեց այն, որ Կորյունն այդ ամեն ինչին հասել է ինքնուրույն կերպով` առանց ուսումի, առանց մասնագետ նկարիչների խորհրդի և օգնության։ Ամենաարժանավոր գծերից է նրա ճաշակը և արտահայտչական ձևերի անմիջականությունը։ Կորյունի կտավները հետաքրքրություն են առաջ բերում իրենց անկեղծությամբ։ Կորյունն, անկասկած, մեծապես օժտված նկարիչ է։ Այն ամենը, ինչ նրան հուզում է, պատկերված է անկեղծ, հետաքրքիր և ժամանակակից և գեղարվեստական լեզվով։ - Մարտիրոս Սարյան։

Մատենագիտություն

• Կորյուն Նիկողոսյան, Կատալոգ, 1974
• Կորյուն Նիկողոսյան, Կատալոգ, 2008

Արտաքին հղումներ

• Տեսաֆիլմ Կորյուն Նիկողոսյանի մասին