Արարատ Օհանջանյան
| Ուշադրություն։ Այս հոդվածի ստեղծողը կամ նրանում մեծ ներդրում ունեցող անձը, ըստ երևույթին, հետաքրքրությունների կոնֆլիկտ ունի հոդվածի առարկայի հետ։ Հոդվածը կարող է պահանջել մաքրում Վիքիպեդիայի քաղաքականությանը, հատկապես չեզոք տեսակետի պահանջը բավարարելու համար։ Հետագա քննարկումը քննարկման էջում։ |
Արարատ Արամայիսի Օհանջանյան (մայիսի 29, 1968, Սոս, Մարտունու շրջան, ԼՂԻՄ, Ադրբեջանական ԽՍՀ, ԽՍՀՄ), հայ բժիշկ, նյարդաբան, Արցախի առողջապահության նախարար[1]։
 | |
|---|---|
| Ծնվել է | մայիսի 29, 1968 (55 տարեկան) |
| Ծննդավայր | Սոս, Մարտունու շրջան, ԼՂԻՄ, Ադրբեջանական ԽՍՀ, ԽՍՀՄ |
| Կրթություն | Երևանի Մխիթար Հերացու անվան Պետական Բժշկական Համալսարան (1992) և Երևանի Մխիթար Հերացու անվան Պետական Բժշկական Համալսարան |
| Մասնագիտություն | բժիշկ, ներքին հիվանդությունների բժիշկ և նյարդաբան |
| Կուսակցություն | Ազատ Հայրենիք |
Կենսագրություն և գործունեություն խմբագրել
Ծնվել է 1968 թ. մայիսի 29-ին, Լեռնային Ղարաբաղի Մարտունու շրջանի Սոս գյուղում։ 1985 թ. ավարտել է Սոսի միջնակարգ դպրոցը։ Նույն թվականին ընդունվել է Բաքվի բժշկական ինստիտուտի ատամնաբուժության ֆակուլտետը։
1986-1988 թթ. ծառայել է խորհրդային բանակում։ 1988 թ-ից ուսումը շարունակել է Երևանի բժշկական ինստիտուտի ատամնաբուժության ֆակուլտետում, որն ավարտել է 1992 թ.։
Ինստիտուտն ավարտելուց հետո վերադարձել է Արցախ, մասնակցել ինքնապաշտպանական մարտերին[փա՞ստ]։ 1992-1994 թթ. աշխատել է ԼՂՀ Մարտակերտի շրջանային դաշտային զինվորական հոսպիտալում՝ որպես բժիշկ-անեսթեզիոլոգ։ 1994-1997 թթ. աշխատել է Արցախի հանրապետական ուռուցքաբանական դիսպանսերում, ապա և ԼՂՀ «Հանրապետական հիվանդանոց» ՊՓԲԸ-ում՝ որպես բժիշկ-անեսթեզիոլոգ։ 1997-2007 թթ. համատեղությամբ աշխատել է Արցախի հանրապետական ծննդատանը՝ որպես բժիշկ անեսթեզիոլոգ-ռեանիմատոլոգ։
1997-1998 թթ. աշխատել է ԼՂՀ «Հանրապետական հիվանդանոց» ՊՓԲԸ վերակենդանացման բաժնի վարիչ։
1998-2003 թթ. ԼՂՀ «Հանրապետական հիվանդանոց» ՊՓԲԸ գլխավոր բժշկի տեղակալն էր՝ բուժական գծով։
2003 թ. սովորել է Մոսկվայի տրանսպլանտոլոգիայի ինստիտուտում՝ վերապատրաստվելով որպես բժիշկ-նեֆրոլոգ՝ հեմոդիալիզի մասնագետ։
2004 թ. նրա անմիջական մասնակցությամբ ԼՂՀ «Հանրապետական հիվանդանոց» ՊՓԲԸ-ում բացվել է հեմոդիալիզի բաժանմունք։
2007 թ. նշանակվել է ԼՂՀ «Հանրապետական հիվանդանոց» ՊՓԲԸ գործադիր տնօրեն՝ շարունակելով աշխատել որպես բժիշկ անեսթեզիոլոգ-ռեանիմատոլոգ։
2010 թ. մայիսի 23-ի խորհրդարանական ընտրություններում ընտրվել է ԼՂՀ հինգերորդ գումարման Ազգային Ժողովի պատգամավոր՝ համամասնական ընտրակարգով, «Ազատ Հայրենիք» կուսակցության ընտրացուցակով։ Ազգային Ժողովի սոցիալական ոլորտի հարցերի (2012 թվականից՝ սոցիալական և առողջապահության հարցերի) մշտական հանձնաժողովի անդամ։
2015 թ. մայիսի 3-ին խորհրդարանական ընտրություններում ընտրվել է ԱՀ վեցերորդ գումարման Ազգային Ժողովի պատգամավոր` համամասնական ընտրակարգով, «Ազատ Հայրենիք» կուսակցության ընտրացուցակով։ «Հայրենիք» խմբակցության անդամ։ ԱԺ սոցիալական և առողջապահության հարցերի մշտական հանձնաժողովի նախագահ։
2020 թվականի հուլիսի 18-ին Արցախի նախագահի հրամանագրով նշանակվել է Արցախի առողջապահության նախարար։
«Ազատ Հայրենիք» կուսակցության անդամ է, կուսակցության նախագահության անդամ։
Ազգային Ժողովի «Հայրենիք» խմբակցության անդամ է։
Ընտանիք խմբագրել
Ամուսնացած է, ունի չորս զավակ։