Վարդան Ղազանչյան

Վիքիպեդիայում կան հոդվածներ Ղազանչյան ազգանունով այլ մարդկանց մասին։

Վարդան Վահանի Ղազանչյան (հոկտեմբերի 22, 1907(1907-10-22), Վան - հունվար 1990), հայ գրականագետ, բանասիրական գիտությունների թեկնածու, ՀԽՍՀ մշակույթի վաստակավոր գործիչ (1970), ԽՍՀՄ գրողների միության անդամ 1938 թվականից։

Վարդան Ղազանչյան
Ծնվել է	հոկտեմբերի 22, 1907(1907-10-22)
Ծննդավայր	Վան
Վախճանվել է	հունվար 1990 (82 տարեկան)
Մասնագիտություն	գրականագետ
Քաղաքացիություն	Օսմանյան կայսրություն և  ԽՍՀՄ
Կրթություն	Երևանի պետական համալսարան (1932) և ՌԳԱ Մաքսիմ Գորկու անվան համաշխարհային գրականության ինստիտուտ (1941)
Գիտական աստիճան	բանասիրական գիտությունների թեկնածու (1952)
Անդամակցություն	ԽՍՀՄ Գրողների միություն
Կուսակցություն	ԽՄԿԿ
Աշխատավայր	Երևանի պետական համալսարան, ՀԿԿ, Հայկական պետական մանկավարժական համալսարան, Սովետական Հայաստան և Փիլիսոփայության, սոցիոլոգիայի և իրավունքի ինստիտուտ
Պարգևներ
Վարդան Ղազանչյան Վիքիդարանում

Կենսագրություն

Վարդան Ղազանչյանը ծնվել է 1907 թվականի հոկտեմբերի 22-ին, Արևմտյան Հայաստանի Վան քաղաքում։ 1925 թվականին ավարտել է Թիֆլիսի 72-րդ աշխատանքային դպրոցը, 1930 թվականին՝ Երևանի պետական համալսարանի սոցիալ-տնտեսագիտական ֆակուլտետը։ 1930-1932 թվականներին սովորել է նույն համալսարանի ասպիրանտուրայում։ 1929-1931 թվականներին աշխատել է Երևանի ռադիոհաղորդումների խմբագրությունում՝ որպես գաղափարական բաժնի վարիչ և գլխավոր խմբագիր։ 1933-1935 թվականներին խմբագրել է Երևանում լույս տեսնող «Տեխնիկան մասսաներին» և «Մոոպրի դրոշով» պարբերականները։ 1933-1934 թվականներին աշխատել է Հայաստանի ԿԿ Կենտկոմում որպես հրահանգիչ, ապա մամուլի սեկտորի վարիչի պաշտոնակատար, 1934-1935 թվականներին՝ Երևանի մանկավարժական ինստիտուտի ուսմասվար, 1935-1938 թվականներին՝ «Խորհրդային Հայաստան» թերթում՝ որպես արվեստի և գրականության բաժնի ցարիչ, ապա պատասխանատու քարտուղար։ 1938-1939 թվականներին եղել է ՀԽՍՀ Նախարարների խորհրդի արվեստի վարչության կերպարվեստի բաժնի վարիչ։ 1939-1941 թվականներին սովորել է ԽՍՀՄ ԳԱ համաշխարհային գրականության ինստիտուտի (Մոսկվա) ասպիրանտուրայում։ 1941-1945 թվականներին ծառայել է խորհրդային բանակում։ 1931 թվականից փիլիսոփայություն է դասախոսել Երևանի բարձրագույն ուսումնական հաստատություններում։ 1952 թվականին «Սովետահայ գրականության հայրենասիրական գաղափարը» թեմայով դիսերտացիա է պաշտպանել և ստացել բանասիրական գիտությունների թեկնածուի աստիճան։ 1951-1952 թվականներին եղել է ՀԽՍՀ ԳԱ փիլիսոփայության սեկտորի վարիչը։ 1957 թվականից ՀԿԿ Կենտկոմին կից մարքսիզմ-լենինիզմի ինստիտուտի մարքսիզմի դասականների երկերի հայերեն թարգմանության բաժնի վարիչն է եղել։ ԽՄԿԿ անդամ 1938 թվականից։

Երկեր

• Հասարակագիտության դասագիրք, Երևան, Պետհրատ, 1932, 203 էջ։
• Կարմիր բանակը պաշտպանում է մեր հայրենիքի պատիվը, ազատությունն ու անկախությունը գերմանական զավթիչներից, Երևան, Հայպետհրատ, 1942, 17 էջ։
• Սովետական հայրենասիրության մեծ ուժը, Երևան, Հայպետհրատ, 1955, 56 էջ։
• Լենինը գրականության պարտիականության մասին, Երևան, 1956, 33 էջ։
• Կոմունիզմը և հումանիզմը, Երևան, 1960, 36 էջ։
• Սոցիալիստական ինտերնացիոնալիզմի մեծ ուժը, Երևան, «Հայաստան», 1973, 124 էջ։

Ծանոթագրություններ

Վիքիդարանն ունի նյութեր, որոնք վերաբերում են «Վարդան Ղազանչյան» հոդվածին։