Սուրեն Մալյան
Սուրեն Գրիգորի Մալյան (փետրվարի 22, 1918, Բաքու, Բաքվի նահանգ - ապրիլի 10, 2005), խորհրդային հայ քանդակագործ, նկարիչ-խեցեգործ։ ԽՍՀՄ նկարիչների միության անդամ (1962)։ Ռուսաստանի վաստակավոր նկարիչ (2003)։
| Սուրեն Մալյան | |
|---|---|
| Ծնվել է | փետրվարի 22, 1918 |
| Ծննդավայր | Բաքու, Բաքվի նահանգ |
| Մահացել է | ապրիլի 10, 2005 (87 տարեկան) |
| Քաղաքացիություն |  ԽՍՀՄ և  Ռուսաստան |
| Կրթություն | Մոսկվայի կիրառական և դեկորատիվ արվեստի ինստիտուտ (1949) |
| Մասնագիտություն | քանդակագործ, խեցեգործ և նկարիչ |
| Պարգևներ և մրցանակներ |  և  |
| Անդամություն | ԽՍՀՄ նկարիչների միություն |
Կենսագրություն խմբագրել
Ծնվել է 1918 թվականին Բաքվում։ Մանկությունն ու պատանեկությունն անցել է Թիֆլիսում, որտեղ ավարտել է միջնակարգ դպրոցը և երաժշտական տեխնիկումը։ Պատերազմի ավարտից հետո ընդունվել է Մոսկվայի կիրառական և դեկորատիվ արվեստի ինստիտուտ (ՄԿԴԱԻ), որն ավարտել է 1949 թվականին գերազանցությամբ։ Մալյանի դիպլոմային աշխատանքը՝ «Հավերժ փառք» քանդակը, նվիրված է Հայրենական մեծ պատերազմի հերոս նավաստիների հիշատակին։ Այն ցուցադրվել է երկրի գեղարվեստի բուհերի լավագույն ավարտական աշխատանքների ցուցահանդեսում և արժանացել ԽՍՀՄ գեղարվեստական հիմնադրամի մրցանակին[1]։
Եղել է համամիութենական, համառուսական, մոսկովյան և արտասահմանյան գեղարվեստական ցուցահանդեսների մշտական մասնակից, մասնավորապես մասնակցել է Ֆաենցա քաղաքում (Իտալիա) կազմակերպված կերամիկայի միջազգային բիենալեին։ Մալյանի տարբեր հետաքրքրություններն ու աշխույժ էությունը դրսևորվել են գեղանկարչության, գրաֆիկայի, քանդակագործության մեջ, սակայն ժամանակի ընթացքում նա հոգով «կապվել է» խեցեգործական կերտարվեստին, որը դարձել է նրա աշխատանքի հիմնական ուղղությունը[1]։
2003 թվականին նշվել է նրա ծննդյան 85-ամյակը և ստեղծագործական գործունեության 55-ամյակը[1][2]։
Աշխատանքները գտնվում են բազմաթիվ արվեստի թանգարաններում։ Աշխատանքների ամենանշանակալի հավաքածուն պահվում է Կուսկովոյի խեցեգործության պետական թանգարանում[1]։
Մահացել է 2005 թվականի ապրիլի 10-ին[1]։
Ձեռքբերումներ խմբագրել
- Ռուսաստանի Դաշնության վաստակավոր նկարիչ (2003),
- «Հայրենական մեծ պատերազմում անձնվեր աշխատանքի համար» մեդալ,
- Ռուսաստանի գեղարվեստի ակադեմիայի դիպլոմ և արծաթե մեդալ (ռուսական դեկորատիվ արվեստի զարգացման գործում ունեցած ավանդի համար)։
Ծանոթագրություններ խմբագրել
- ↑ 1,0 1,1 1,2 1,3 1,4 Սուրեն Մալյանի մասին ru.hayazg.info կայքում
- ↑ «Славный юбилей». old.noev-kovcheg.ru. Վերցված է 2023 թ․ օգոստոսի 25-ին.
Արտաքին հղումներ խմբագրել
Աղբյուրներ խմբագրել
- Сурен Мальян. Металл. Каталог выставки. 1991
- Ноев Ковчег. Информационно-аналитическая газета армянской диаспоры стран СНГ. 2006. № 06 (99). Апрель (16-30)․