Սիմոն Շահրիկյան
Սիմոն Շահրիկյան (1911, Կահիրե, Եգիպտոս - դեկտեմբերի 30, 1989, Կահիրե, Եգիպտոս), եգիպտահայ նկարիչ, դիմանկարիչ։
Սիմոն Շահրիկյան | |
---|---|
Ծնվել է | 1911 |
Ծննդավայր | Կահիրե, Եգիպտոս |
Վախճանվել է | դեկտեմբերի 30, 1989 |
Մահվան վայր | Կահիրե, Եգիպտոս |
Կրթություն | Գալուստյան ազգային վարժարան |
Մասնագիտություն | նկարիչ |
Կենսագրություն խմբագրել
Սիմոն Շահրիկյանը ծնվել է Կահիրեում 1911 թվականին։ Նախնիները Թամզարայից են, ովքեր տեղափոխվել են Ստամբուլ` ավելի բարեկեցիկ կյանք որոնելու և զավակներին ավելի լավ կրթություն տալու նպատակով։
Սովորել է Եգիպտոսի Գալուստյան ազգային վարժարանում, աշակերտել է Ալեքսանդր Սարուխանին, Մարտիրոս Պալայանին (1891-1957): Արվեստի պատմությունն ուսումնասիրել է ինքնուրույն։
1938 թվականի սեպտեմբերին Եգիպտոսում բրիտանական զորքերի գլխավոր շտաբում աշխատել է որպես նախագծող ճարտարապետ։ 1931-1941 թվականներին Կահիրեի Նուբարյան ազգային վարժարանում դասավանդել է նկարչություն և գեղագիտություն։ 1935 թվականին միաժամանակ հաճախել է հարավսլավացի նկարիչ Յարո Հիլբերտի մասնավոր դպրոցի դասընթացներին։ Չորս տարիների ընթացքում ձեռք բերած լուրջ ակադեմիական կրթությունը հնարավորություն է ընձեռում նրան դառնալու կայացած դիմանկարիչ։
Որպես նախագծող-ճարտարապետ է աշխատել «Մոքաթթամ» քաղաքաշինության ընկերությունում։ 1979 թվականից մինչև կյանքի վերջը Շահրիկյանը մասնավոր դասեր է տվել մի քանի ուսանողների, այդ թվում Նաիրի Համբիկյանին ու Արմեն Կրպոյանին։
Կյանքի մի ընթացք Շահրիկյանը տառապել է առողջական լուրջ խնդիրներով (տասներկումատնյա աղիքի խոց, շագանակագեղձի քաղցկեղ, երիկամի անհանգստություններ և այլն), և դա որոշակիորեն խոչնդոտել է նրա ստեղծագործական կյանքը։ Նա երբեք չի ընկճվել, բայց լարված տրամադրություններն արձագանք են գտել նրա կտավներում[1][2],։
Ստեղծագործություններ խմբագրել
- «Գլխափաթթոցով ծերունին»
- «Չալմայով նուբիացի կինը»
- «Դռնապան Ֆարշալին»
- «Տեղացին` երկրի զավակը»
- «Եգիպտացին»
- «Աշխատավորը»
- «Ամբոխը»
- «Խորհրդածություն»
- «Բարկացած երեխան»
- «Դերասանը»
- «Մուշտակով տիկինը»
- «Սիրվարդ»
- «Երիտասարդ աղջիկը գլխարկով»
- «Երեխան»
- «Երկու կին»
- «Էքստազ»
- «Ծերունին»
- «Ճաղատ ծերուկը»
- «Անտառը»
Ցուցահանդեսներ խմբագրել
Ունեցել է 20 խմբակային («Սալոն դյու Կեր») և երկու անհատական ցուցահանդես (առաջինը 1970 թվականի հուլիսին՝ Կահիրեում, երկրորդը՝ 1982 թվականին, Ալեքսանդրիայում)։