Սասուն Գրիգորյան (վիրաբույժ)
Անվան այլ կիրառումների համար տե՛ս՝ Սասուն Գրիգորյան (այլ կիրառումներ)
Սասուն Խաչիկի Գրիգորյան (հունվարի 6, 1946, Վերին Սասնաշեն, Թալինի շրջան, Հայկական ԽՍՀ, ԽՍՀՄ), հայ բժիշկ, վիրաբույժ։ Բժշկական գիտությունների դոկտոր (1991), պրոֆեսոր (1993)։
 | |
|---|---|
| Ծնվել է | հունվարի 6, 1946 (75 տարեկան) |
| Ծննդավայր | Վերին Սասնաշեն, Թալինի շրջան, Հայկական ԽՍՀ, ԽՍՀՄ |
| Քաղաքացիություն |  Հայաստան |
| Ազգություն | հայ |
| Կրթություն | Երևանի Մխիթար Հերացու անվան Պետական Բժշկական Համալսարան (1969) և Մոսկվայի Ա.Վ. Վիշնևսկու անվան վիրաբուժության ինստիտուտ (1991) |
| Մասնագիտություն | վիրաբույժ |
| Գիտական աստիճան | բժշկական գիտությունների դոկտոր և պրոֆեսոր |
| Աշխատավայր | Ռուբեն Յոլյանի անվան արյունաբանական կենտրոն |
ԿենսագրությունԽմբագրել
1969 թվականին ավարտել է Երևանի բժշկական ինստիտուտը։ 1989-1991 թվականներին սովորել է Մոսկվայի ԲԳԱ Ա.Վ. Վիշնևսկու անվան վիրաբուժության ինստիտուտի դոկտորանտուրայում[1]։
1991-1993 թվականներին եղել է Երևանի պետական բժշկական համալսարանի բուժական ֆակուլտետի դեկանի տեղակալ, 1993-2001 թվականներին՝ բուժական ֆակուլտետի դեկան, 1997 թվականից ՀՀ առողջապահության նախարարության պրոֆեսոր Յոլյանի անվան արյունաբանության կենտրոնի վիրաբուժության գծով կոնսուլտանտ, 2000-2008 թվականից՝ ԵՊԲՀ ընդհանուր վիրաբուժության ամբիոնի վարիչ և վիրաբուժական կլինիկայի ղեկավար, 2008 թվականից՝ Կրթության միջազգային Ակադեմիայի և «Հայբուսակ» համալսարանի գիտական քարտուղար։
1998 թվականից ՌԴ Բնական գիտությունների ակադեմիայի, 2005 թվականից՝ ՌԴ Բժշկատեխնիկական գիտությունների, 2011 թվականից՝ Բնական գիտությունների Եվրոպական ակադեմիայի իսկական անդամ[2][3]։
Գիտական գործունեությունԽմբագրել
Հայաստանի Հանրապետությունում առաջինն է կիրառել որովայնադիտման (լապարոսկոպիա) եղանակը, մշակել պարբերական հիվանդության վիրաբուժական հիմնախնդիրները, ինչպես նաև վիրաբուժական թարախային վարակի կանխարգելման և բուժման եղանակներրը, առաջինն է կատարել փայծաղի հեռացումը (սպլենէկտոմիա) ոչ սովորական վիրահատական մուտքով՝ կրծքավանդակի միջով (կրծքաստոծանիական մուտքով) արյան համակարգի որոշ հիվանդությունների ժամանակ։
Գիտական աշխատանքները նվիրված են ստամոքսի և 12 մ.ա. խոցային հիվանդությանը և ուռուցքներին, լեղաքարային հիվանդությանը, լյարդի էխինոկոկոզին, մեխանիկական դեղնությանը, ստամոքս-աղիքային արյունահոսություններին, հեմատոլոգիական հիվանդություններին, աղիքային անանցանելիությանը, ենթաստամոքսագեղձի հիվանդություններին, որովայնի օրգանների ուռուցքներին և տրավմատիկ վնասվածքներին, ճողվածքներին, պերիտոնիտներին, լապարոսկոպիային, թարախային վիրաբուժական վարակներին, պարբերական հիվանդությանը, խպիպին, կրծքագեղձի բորբոքային և ուռուցքային հիվանդություններին, երակների վիրաբուժությանը։
Հեղինակ է շուրջ 240 հրապարակված գիտական աշխատանքների, 6 ուսումնական ձեռնարկների, 18 մեթոդական ցուցումների, 16 գյուտարարական առաջարկությունների։
Գիտական զեկուցումներով հանդես է եկել հանրապետական, ԱՊՀ երկրների և միջազգային գիտաժողովներում։
Պարգևներ, մրցանակներԽմբագրել
- ԵՊԲՀ Ոսկե մեդալ, 2000
- Բնական գիտությունների Եվրոպական Ակադեմիայի հուշամեդալ (Գերմանիա), 2004
- Բնական գիտությունների Եվրոպական հանձնաժողովի Պաուլ Էռլիխի անվան դիպլոմ և ոսկե մեդալ, 2005
ԾանոթագրություններԽմբագրել
- ↑ Ով ով է. Հայեր. Կենսագրական հանրագիտարան, հատոր առաջին, Երևան, 2005
- ↑ Սասուն Գրիգորյանի մասին doctors.am կայքում
- ↑ Григорян Сасун Хачикович