Մոսկվիչ, իմ սեր

«Մոսկվիչ, իմ սեր» (ֆր.՝ Moskvich, Mon Amour, ռուս.՝ Москвич, Моя Любовь), հայ-ռուս-ֆրանսիական համատեղ արտադրության ֆիլմ փոքր մարդու մեծ ողբերգության մասին, նկարահանված 2012 թվականին։ Ֆիլմի նկարահանումները տեղի են ունեցել Հայաստանում, հիմնականում՝ Վարդենիսում։

«Մոսկվիչ, իմ սեր»
Երկիր	Հայաստան Ֆրանսիա Ռուսաստան
Ժանր	Տրագիկոմեդիա
Թվական	2012
Ռեժիսոր	Արամ Շահբազյան
Պրոդյուսեր	Թերեզա Վարժապետյան Գորիուն Ափրիկյան Մարի-Կլոդ Արբոնի Սևադա Աղաբեկյան
Սցենարի հեղինակ	Լևոն Մինասյանն Էսթեր Մանն
Դերակատարներ	Մարտուն Ղևոնդյան Հիլդա Օհանի
Օպերատոր	Արթուր Ղարայան
Կինոընկերություն	NFDF ARAPROD KINOSTUDIA 55 AREMAC

Սյուժե

Գյուղում ապրող Համոն ու նրա կինը Հայաստան են գաղթել Ադրբեջանի Լենինավան գյուղից։ Նրանք շատ սուղ պայմաններում են ապրում։ Ամիսը մեկ անգամ Համոն մեկնում է շրջկենտրոն՝ ստանալու Ռուսաստանում աշխատող որդու ուղարկած փոքրիկ գումարը։ Կյանքն անցնում է առանց արտասովոր բեկումների՝ միապաղաղ, անաղմուկ։ Ու հանկարծ Համոյի ականջով է ընկնում, թե հարևան Սոթք գյուղում ինչ-որ մեկը «Մոսկվիչ» է վաճառում։ Համոն շտապում է Սոթք՝ տեսնելու վաճառվող մեքենան։ Տերը համաձայնում է սպասել այնքան, մինչև որ Համոն բերի 800 դոլարը։ Երազանքն իրականություն դառնալու շեմին է։ Ծերունին համակվում է «Մոսկվիչ» ունենալու ցանկությամբ և 800 դոլարը ձեռք բերելը գերխնդիր դարձնում։ Հեռավոր գյուղում ապրող մարդու դրաման սկսվում է։ Բայց մի օր Համոն արթնանում է ու հասկանում, որ ժամանակն անցել է, իր ապրելու ժամանակը՝ նույնպես։
Իր փոքր երազանքի հետևից գնացող մարդու կերպարը ֆիլմում առանցքային է, իսկ մյուս հերոսները ձևավորում ու կառուցում են տրագիկոմիկ այն միջավայրը, կյանքը, մթնոլորտը, որտեղ հասունանում է երազանքն իրականություն դարձնելու գաղափարը։

Գլխավոր դերերում

• Համո-Մարտուն Ղևոնդյան
• Հիլդա Օհանի

Արտաքին հղումներ

• «Մոսկվիչ, իմ սեր». ֆիլմի պրեմիերա