Մինաս Շորշորով
Մինաս Խաչատուրի Շորշորով (ռուս.՝ Минас Хачатурович Шоршоров, հոկտեմբերի 25, 1922, Մոսկվա, Խորհրդային Ռուսաստան - մարտի 25, 2005), մետաղագիտության և մետաղների ֆիզիկայի բնագավառի հայ խորհրդային գիտնական, Երկրորդ համաշխարհային պատերազմի (1941-1945) մասնակից, տեխնիկական գիտությունների դոկտոր (1964), պրոֆեսոր (1968)։
Մինաս Շորշորով | |
---|---|
Ծնվել է | հոկտեմբերի 25, 1922 |
Ծննդավայր | Մոսկվա, Խորհրդային Ռուսաստան |
Մահացել է | մարտի 25, 2005 (82 տարեկան) |
Կրթություն | Մոսկվայի Ն. Բաումանի անվան պետական տեխնիկական համալսարան |
Գիտական աստիճան | տեխնիկական գիտությունների դոկտոր (1964) և պրոֆեսոր (1968) |
Մասնագիտություն | ֆիզիկոս |
Կուսակցություն | ԽՄԿԿ |
Պարգևներ և մրցանակներ |
Կենսագրություն խմբագրել
Ավարտել է Մոսկվայի Բաումանի անվան բարձրագույն տեխնիկական ուսումնարանը (1949)։ 1951-1953 թվականները՝ ԽՍՀՄ Գիտությունների ակադեմիայի էլեկտրաթերմիայի և էլեկտրաեռակցման բաժանմունքի գիտնական քարտուղար։ 1953 թվականից աշխատում է ԽՍՀՄ Գիտությունների ազգային ակադեմիայի Բայկովի անվան մետալուրգիայի ինստիտուտում, 1959 թվականից կոմպոզիցիոն նյութերի և պաշտպանական պատվածքների փոշեմետալուրգիայի բաժնի վարիչ։ 1979 թվականից՝ ԽՍՀՄ Գիտության և տեխնիկայի պետական կոմիտեին կից փոշեմետալուրգիայի գիտական խորհրդի պաշտպանական պատվածքների բաժանմունքի և ԽՍՀՄ Գիտությունների Ակադեմիայի մետալուրգիական պրոցեսների ֆիզիկաքիմիական հիմունքների գիտական խորհրդի կոմպոզիցիոն նյութերի ու պաշտպանական պատվածքների փոշեմետալուրգիայի բաժանմունքի նախագահ։ Շորշորովը կոմպոզիցիոն նյութագիտության հիմնադիրն է ԽՍՀՄ-ում։ Շորշորովի բազմաթիվ գյուտերն արմատավորվել են մետալուրգիայում, մեքենաշինության մեջ, էլեկտրոնային տեխնիկայում։ 1968 թվականին Մոսկվայի մետալուրգիական երեկոյան ինստիտուտում հիմնադրել է «կոմպոզիցիոն նյութերի եռակցում և ստացում» մասնագիտությամբ եռակցման պրոցեսների մետալուրգիայի ամբիոն (մինչև 1978 թվականը՝ ամբիոնի վարիչ)։ Աշխատությունները վերաբերում են տարասեռ նյութերի կոնտակտային փոխազդեցությանը, մետաղական համաձուլվածքներում ֆազային փոխակերպումներին և ջերմամեխանիկական ամրացմանը, պաշտպանական պատվածքների փոշեմետալուրգիային։ Պ․ Պ․ Անոսովի (1966) և Ա․ Ա․ Բայկովի (1981) անվան մրցանակներ։ Լոնդոնի թագավորական ընկերության արտասահմանյան անդամ (1980)։ Պարգևատրվել է աշխատանքային կարմիր դրոշի շքանշանով։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 8, էջ 549)։ |