Միհրան Սերայտարյան
Միհրան Սերայտարյան (Սարատարյան) (Կիրասոն- 1915), հայ բժիշկ։
 | |
|---|---|
| Ծննդավայր | Գիրեսուն |
| Մահացել է | 1915 |
| Մահվան պատճառ | Հայոց ցեղասպանություն |
| Ազգություն | հայ |
| Մասնագիտություն | բժիշկ |
Կենսագրություն խմբագրել
Ծնվել է Տրապիզոնի վիլայեթի Գիրեսուն քաղաքում՝ ունևոր ու բարեկիրթ գերդաստանում։
Սկզբնական կրթությունն ստացել է ծննդվայրի ազգային վարժարանում, միջնակարգը՝ Մարզվանի ամերիկացի միսիոներների Անատոլիա կոլեջում։ Բժշկական կրթությունն ստացել է ԱՄՆ-ում։ Մի քանի տարի աշխատել և կատարելագործվել է ԱՄՆ- ում։ Վերադարձել է Կիրասոն և զբաղվել բժշկությամբ։ Եղել է անվանի բժիշկ, հասարակական եռանդուն գործիչ, հարգված՝ հայերի և օտարների կողմից։ 1915 թվականին ձերբակալվել է և սպանվել։
Ընտանիք խմբագրել
Կինը՝ Պայծառը, իր ձեռքերով փորած փոսերում իր մեռած երեխաներին թաղելուց հետո նետվել է Եփրատ գետը, սակայն նրան փրկել են։ Հետագայում Պայծառը երկար ժամանակ փնտրել է կորած ավագ որդուն, որը սովորում էր Կ. Պոլսի Պերպերյան վարժարանում։ 1918 թվականին Պայծառը իր որդի Սուրենին գտել է Եգիպտոսի Զակազիկ քաղաքում, որտեղ օսմանյան բանակի զինվոր էր ծառայում։ Սուրենը Եգիպտոսում գերի է ընկել անգլիացիներին։ Ազատվելուց հետո Կահիրեում աշխատել է Կամսարականների ծխախոտի գործարանում։ Ամուսնացել է բանասեր և ուսուցիչ Հմայակ Շեմսի (Սափրիչյան) քրոջ՝ Հայկուհու հետ և ունեցել որդի։ Մահացել է ամուսնությունից 4 տարի հետո։
Նրանց Վահե որդին 1960 թվականին ԱՄՆ Կենտուկկի նահանգի համալսարանի դասախոս (պրոֆեսոր) է աշխատել։
Գրականություն խմբագրել
- Սեւյօնքեան Թովմաս (բուն մականունով՝ Գարագաշեան), «Կիրասոն (Իմ Ծննդավայրը)», տպարան «Աահակ-Մեսրոպ», Գահիրէ, 1947, 108 էջ
- Յովակիմեան (Արշակունի) Յովակիմ, Պատմութիւն Հայկական Պոնտոսի, Պէյրութ, 1967։
- Իսկահատեան Հ., Վկայարան հայկական ցեղասպանութեան, Գիրք Գ, Պէյրութ, 2011, 395 էջ
Աղբյուր խմբագրել
Հարություն Մինասյան, Օսմանյան կայսրությունում և Թուրքիայի Հանրապետությունում բռնաճնշումների և ցեղասպանության ենթարկված հայ բժիշկներ, Երևան, «Լուսաբաց», 2014 — 520 էջ։