Կոբրաներ
Կոբրաներ (Naja), ասպիդների ընտանիքի թունավոր օձերի սեռ։ Հայտնի է 10 տեսակ՝ տարածված Աֆրիկայում, Հարավային Ասիայում։ Վտանգի ժամանակ, գրգռված վիճակում, կոբրաները բարձրացնում են մարմնի առջևի մասը, լայնացնում պարանոցը սկավառակի տեսքով և իրարից հեռացնում առջևի ութ զույգ կողերը։ Վերին ծնոտի առջևի մասում են գտնվում թունավոր մեծ ատամները, ետևի մասում՝ 1-3 փոքր ատամները։ Հնդկական կոբրան կամ ակնոցավոր օձը (N. naja) կոբրաներից ամենահայտնին է, հանդիպում է Հարավային Ասիայում։ Մարմնի երկարությունը 160-180 սմ է, մեջքի կողմում, մարմնի լայնացող մասում ունի ակնոց հիշեցնող կլորավուն բաց գույնի նախշեր (այստեղից էլ՝ «ակնոցավոր օձ» անվանումը)։
![](http://upload.wikimedia.org/wikipedia/commons/thumb/9/97/Naja_naja_juvenile_%28Karnataka%29.jpg/300px-Naja_naja_juvenile_%28Karnataka%29.jpg)
![](http://upload.wikimedia.org/wikipedia/commons/thumb/b/b3/Ophiophagus_hannah_%281%29.jpg/300px-Ophiophagus_hannah_%281%29.jpg)
Ապրում են քարերի, թփերի միջև, կրծողների բներում, լքված շինություններում։ Լավ լողում են, կարող են ծառ բարձրանալ։ Դնում են 8-45 ձու։ Սնվում են երկկենցաղներով, կրծողներով, երբեմն թռչուններով։ Ամենախոշորը և ամենաթունավորը թագավորական կոբրաներն են, որոնց մարմնի երկարությունը 4-5․5 մ է, ապրում են Հնդկաստանի, Բիրմայի, Հնդկաչինի ջունգլիներում։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 5, էջ 501)։ ![]() |