Բուկլից

Բուկլից, բկալից, շարահերկ բույսերի (կարտոֆիլ, ճակնդեղ, եգիպտացորեն և այլն) խնամքի ընթացքում կիրառվող ագրոտեխնիկական միջոցառում, որի ժամանակ փուխր հողը լցվում է շարքի երկարությամբ յուրաքանչյուր բույսի կամ դրա խմբի շուրջ։ Բուկլիցի շնորհիվ հողում ուժեղանում են միկրոկենսընթացները, բարելավվում օդաջերմային ռեժիմները, ինչպես նաև բույսերի համար կուտակվում են անհրաժեշտ սննդանյութեր։ Բուկլից կատարում են ձմեռային սառնամանիքներից (ծնեբեկ, կանգուր) և գարնանային ցրտահարություններից (կարտոֆիլ, լոլիկ, խաղող, վարդենի) բույսերը պաշտպանելու, հիվանդությունների ու վնասատուների դեմ պայքարելու համար։ Խոնավ հողով բուկլիցն իր հերթին նպաստում է լրացուցիչ արմատների և կողմնային ընձյուղների գոյացմանը, ինչի շնորհիվ բերքատվությունն ավելանում է 10-15%-ում։ Խոնավության պակասի դեպքում բուկլից չի կատարվում՝ հողի ուժեղ չորացումից խուսափելու համար։

Բուկլիցը խթանում է բույսերի աճը

Բուկլիցի քանակը և իրականացման ժամկետները կախված են տվյալ բույսերի առանձնահատկություններից և հողակլիմայական պայմաններից։ Բույսերի բուկլիցը կատարվում է անձրևից կամ ջրումից հետո՝ ջրի 15-20 սմ-ից ոչ պակաս ներծծման դեպքում, միաժամանակ հողի փխրեցմամբ տրակտորաքարշ (կախովի կամ կցվող) բուկլիցի բազմաշարի (մինչև 8) գործիքներով, որոնք կարող են լինել միաթև կամ երկթև։

Գրականություն

• Այվազյան, Հովհաննես (2015). «Գյուղատնտեսական հանրագիտարան». Երևան: ՀՀ Գյուղատնտեսության նախարարություն, ՀՀ Գիտությունների ազգային ակադեմիա. էջ 1096. ISBN 9785897000418.. {{cite book}}: Check |isbn= value: invalid character (օգնություն)

Արտաքին հղումներ

• Կարտոֆիլի աճեցում, բուկլից (տեսանյութ)(անգլ.)

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 2, էջ 606)։