Տրաֆարետային տպագրություն

Տրաֆարետային տպագրություն, տեքստի և գրաֆիկական պատկերների վերարտադրման եղանակ, երբ ներկը տպագրական նյութի վրա է թափանցում տրաֆարետի միջով։ Առավել տարածված է, այսպես կոչված, ցանցատրաֆաբետային տպագրությունը, որի դեպքում որպես տպաձև է ծառայում շրջանակի վրա ձգված մետաքսե կամ պոլիմերային ցանցը։ Պատկերի բացատատեղերին համապատասխանող մասերը ծածկում են ներկի համար անթափանցելի նյութով։ Տպագրության ժամանակ ցանցի անցքերի միջով մածուցիկ ներկը ռետինե ձողիկով ներճնշվում է ընդունող մակերևույթի վրա։ Տպվածքի վրայի ներկող շերտի հաստությունը 10-30 անգամ գերազանցում է օֆսեթ տպագրության կամ բարձր տպագրության եղանակով ստացված շերտի հաստությանը, որն էլ պահանջում է արհեստական չորացում և սահմանափակում տպագրող մեքենաների արտադրողականությունը (ժամում մինչև 1000 տպվածք)։ Տրաֆարետային տպագրությունը կիրառում են թերթային և փաթթոցային նյութերի կամ պատրաստի շինվածքների վրա տպագրելու համար։ Տրաֆարետային տպագրության օգնությամբ բազմացնում են փաստաթղթեր, պատրաստում գովազդային պլակատներ, տպատախտակներ, սարքերի սանդղակներ, կույրերի համար գրքեր։

Տրաֆարետային տպագրության ցանց

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։