Տատանումների պարբերություն

Տատանումների պարբերություն, այն նվազագույն ժամանակամիջոցը, որից հետո տատանումներ կատարող համակարգը նորից վերադառնում է նույն վիճակին, որում գտնվել է տատանումների սկզբին (ընտրվում է կամայականորեն) համապատասխանող պահին։ Խիստ առումով տատանումների պարբերություն հասկացությունը կիրառելի է միայն այն դեպքում, երբ որևէ մեծության արժեքները ճշգրիտ կրկնվում են հավասար ժամանակահատվածներից հետո, ինչպես օրինակ, ներդաշնակ տատանումների դեպքում։ Իսկ պակաս խիստ, բայց ավելի լայն առումով այն կիրառվում է նաև մոտավոր կրկնվող պրոցեսների համար։

Չափման միավորներ

Սովորաբար տատանումների պարբերությունը նշանակվում է $T$ տառով, երբեմն՝ նաև $\tau$ (տաու) կամ $\Theta$ (թետա)։ Չափման միավորը վայրկյանն է և ժամանակի չափման այլ միավորներ։

Կապը այլ ֆիզիկական մեծությունների հետ

Պարբերությունը հակադարձ համեմատական է հաճախությանը․

$T={\frac {1}{\nu }},\ \ \ \nu ={\frac {1}{T}}$։

Ալիքային պրոցեսների դեպքում պարբերությունը կապված է նաև $\lambda$ ալիքի երկարության հետ՝

$v=\lambda \nu ,\ \ \ T={\frac {\lambda }{v}},$

որտեղ $v$-ն տարածվող ալիքի արագությունն է, ավելի ճիշտ՝ փուլային արագությունը։

Տես նաև

• Հաճախություն

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 11, էջ 601)։