Կաուլիֆլորիա
Կաուլիֆլորիա (հուն․՝ καυλός և լատին․՝ floris բառերից), երևույթ, որի դեպքում բույսերի ծաղիկները ծաղկում են անմիջապես հաստ բնի վրա՝ առանց ծաղկակոթունի։
Նկարագիր խմբագրել
Կաուլիֆլորիայի ժամանակ ծաղիկները բացվում են ոչ թե ընձյուղների և շիվերի, այլ բազմամյա ճյուղերի և ծառի բնի վրա` անմիջապես հաստ կեղևի տակից։ Գոյություն ունի նաև հատուկ տերմին, երբ պտուղները զարգանում են հաստ ճյուղերի վրա՝ ռամիֆլորիա, որը թարգմանաբար նշանակում է լատներենից՝ ramus - ճյուղ։
Բնագետ Ալֆրեդ Ուոլլեսի ենթադրությամբ ծաղիկները տեղադրված են սաղարթից ներքև, որը հեշտացնում է փոշոտողների գործը։ Այդպիսի ծառերի պտուղները հասանելի են թռչունների և չղջիկների համար, որոնք ուտելով պտուղը՝ տարածում են դրանց սերմերը[1]։
Եթե որոշ բույսերի մոտ դժվար է բացատրել կաուլիֆլորիայի երևույթը, ապա դա միանգամայն հասկանալի է այնպիսի ծառերի մոտ, որոնց պտուղները մեծ չափեր ունեն և պետք է պաշտպանեն բարակ ճյուղերը։
Կաուլիֆլորիան հատկապես բնորոշ է արևադարձային ֆիթեցելլոբիում ցեղին, տրոպիկական բույսերին, որոնց ներկայացուցիչների բնի կեղևը զարդարվում է բազմերանգ ու խոշոր ծաղիկներով, որը զարմանք և հիացմունք է պատճառում դիտողին։
Տեսակներ, որոնք ծաղկում են կաուլիֆլորիայով խմբագրել
- Հացի ծառ ֊ Artocarpus heterophylla
Հացի ծառի պտուղները շատ խոշոր են և ունենում են մինչև 20 կիլոգրամ կշիռ։ Հասկանալի է, որ այդպիսի չափերի պտուղները դժվար կպահվեն բարակ ճյուղերի վրա և ավելի «նպատակահարմար է» դրանք «տեղավորել» բազմամյա հաստ ճյուղերի և բնի վրա։
- Շոկոլադի կամ կակաոյի ծառ ֊ Theobroma cacao
Կակաոյի ծառի պտուղները կարճ պտղակոթուններով կախված են ծառի բնից, որոնք բավականին գեղեցիկ և խոշոր են։ Պտուղները ոսկեգույն են, երբեմն հասնում են սեխի մեծության։ Քանի որ կակաոն շատ է օգտագործվում հրուշակեղենի արտադրության մեջ, ապա այն հաճախ անվանում են նաև «հրուշակեղենի ծառ»։
- Կուրուպիտա ֊ Curupita
Բրազիլական ընկույզին ազգակից կուրուպիտան ծաղկման շրջանում պատվում է բազմագույն ծաղիկներով, որի պտուղները անսովոր խոշոր են։
- Լեոնիա կամ առյուծածառ ֊ Leonia
Առյուծածառի կրեմագույն ծաղկիներն ամբողջությամբ պատում են ծառի սաղարթը և բունը բոլորովին չի երևում։
- Մարմելադի ծառ ֊ Lacuma mamosa
Մարմելադ ծառին նույնպես բնորոշ է կաուլիֆլորիայի երևույթը։
- Հուդայածառ ֊ Cersis siliquastrum (ցերսիս սիլիքուաստրում)
Կաուլիֆլորիայի երևույթը կարելի է հանդիպել ոչ միայն արևադարձային երկրներում, այլ նաև Հայաստանում։ Երևան է ներմուծվել միջերկրածովյան հուդայածառը, որը ծաղկում է ապրիլի 20-ից։ Լոբու ունդեր հիշեցնող նրա պտուղները նույնիսկ ձմռանն են առատորեն ծածկում բունն ու հաստ ճյուղերը։ Հուդայածառ կա Ազգային ժողովի շենքի, Օպերային թատրոնի այգու, Գյուղատնտեսական ակադեմիայի առջևի այգում՝ Աբովյան փողոցի կողմից։
Պատկերասրահ խմբագրել
-
Cynometra cauliflora
-
Հացի ծառ
Ծանոթագրություններ խմբագրել
- ↑ Jeremy M.B. Smith. «Tropical forest: Population and community development and structure: Relationships between the flora and fauna -- Encyclopædia Britannica». Վերցված է 2008 թ․ մարտի 7-ին.
Արտաքին հղումներ խմբագրել
Վիքիպահեստն ունի նյութեր, որոնք վերաբերում են «Կաուլիֆլորիա» հոդվածին։ |