Անդրանիկ Սարգսյան
Անդրանիկ Վանիկի Սարգսյան (դեկտեմբերի 17, 1972, Ստեփանակերտ, Ադրբեջանական ԽՍՀ, ԽՍՀՄ), արցախցի քաղաքական գործիչ, Արցախի Հանրապետության 5-րդ գումարման Ազգային ժողովի պատգամավոր[1]։
| Անդրանիկ Սարգսյան | |
|---|---|
| Ծնվել է | դեկտեմբերի 17, 1972 (51 տարեկան) |
| Ծննդավայր | Ստեփանակերտ, Ադրբեջանական ԽՍՀ, ԽՍՀՄ |
| Կրթություն | Արցախի պետական համալսարան |
| Մասնագիտություն | քաղաքական գործիչ |
Կենսագրություն խմբագրել
Անդրանիկ Սարգսյանը ծնվել է 1972 թվականի դեկտեմբերի 17-ին Ստեփանակերտ քաղաքում։ 1989 թվականին ավարտել է Հրազդան քաղաքի թիվ 11 միջնակարգ դպրոցը։ 2008 թվականին ավարտել է Արցախի պետական համալսարանի տնտեսաիրավագիտական ֆակուլտետը։
Ղարաբաղյան շարժման ակտիվ մասնակից է, կամավորագրվել է Արցախի ինքնապաշտպանությանը՝ շարքային, դասակի հրամանատար, վաշտի հրամանատար։
1992-1997 թվականներին ծառայել է Արցախի Հանրապետության Պաշտպանության բանակում, եղել է Արցախի Հանրապետության Պաշտպանության բանակի Կենտրոնական պաշտպանական շրջանի հետախուզության պետ։ Ազատամարտի երկրորդ կարգի հաշմանդամ է։
1998-2003 թվականներին եղել է թանկարժեք քարերի մշակման արտադրության տնօրեն։
2007 թվականին ընտրվել է «Արցախի ազատամարտիկների միություն» հասարակական կազմակերպության Ստեփանակերտի տարածքային միավորման խորհրդի նախագահ[2]։ Միության վարչության անդամ է։
2005 թվականի հունիսի 19-ի խորհրդարանական ընտրություններում ընտրվել է Արցախի Հանրապետության չորրորդ գումարման Ազգային ժողովի պատգամավոր՝ համամասնական ընտրակարգով, Արցախի ժողովրդավարական կուսակցության ընտրացուցակով[3]։ Եղել է Արցախի Հանրապետության Ազգային ժողովի պաշտպանության, անվտանգության և օրինապահպանության հարցերի մշտական հանձնաժողովի նախագահի տեղակալ[4]։
2010 թվականի մայիսի 23-ի խորհրդարանական ընտրություններում թիվ 3 ընտրատարածքից ընտրվել է Արցախի Հանրապետության հինգերորդ գումարման Ազգային ժողովի պատգամավոր[5]։
2010 թվականի հունիսի 10-ին ընտրվել է Արցախի Հանրապետության Ազգային ժողովի պաշտպանության, անվտանգության և օրինապահպանության հարցերի մշտական հանձնաժողովի նախագահի տեղակալ։ Եղել է Արցախի Հանրապետության Ազգային ժողովի «Ժողովրդավարություն» խմբակցության անդամ։
Սպորտի վարպետի թեկնածու է։
Անկուսակցական է։
Ամուսնացած է, ունի երեք զավակ։
Պարգևներ խմբագրել
- «Մարտական Խաչ» 1-ին աստիճանի շքանշան (ԼՂՀ նախագահի թիվ 0375-1 հրամանագիր 25.07.1994 թվական)
- «Շուշիի ազատագրման համար» մեդալ (ԼՂՀ նախագահի թիվ 304 հրամանագիր 08.05.2002 թվական)
Տես նաև խմբագրել
Ծանոթագրություններ խմբագրել
- ↑ «Սարգսյան Անդրանիկ Վանիկի». www.nankr.am. Վերցված է 2023 թ․ օգոստոսի 23-ին.
- ↑ «Լեռնային Ղարաբաղի Հանրապետության Նախագահի պաշտոնական կայք». president.nkr.am. Արխիվացված է օրիգինալից 2023 թ․ օգոստոսի 23-ին. Վերցված է 2023 թ․ օգոստոսի 23-ին.
- ↑ «19 հունիսի 2005թ. | ԼՂՀ Կենտրոնական ընտրական հանձնաժողով» (ռուսերեն). Վերցված է 2023 թ․ օգոստոսի 23-ին.
- ↑ «Լեռնային Ղարաբաղում մեկնարկել են խորհրդարանական ընտրությունները». news.am. 2023 թ․ օգոստոսի 23. Վերցված է 2023 թ․ օգոստոսի 23-ին.
- ↑ «23 մայիսի 2010թ. | ԼՂՀ Կենտրոնական ընտրական հանձնաժողով» (ռուսերեն). Վերցված է 2023 թ․ օգոստոսի 23-ին.