Սուրբ Աստվածածին եկեղեցի (Աղքյորփի)
Սուրբ Աստվածածին եկեղեցի[1], Հայ Առաքելական Սուրբ Եկեղեցի, գտնվում է Վրաստանի Քվեմո Քարթլիի մարզի Մառնեուլի շրջանում, Վիրահայոց լեռների հյուսիսային լանջին, Լալվարից սկիզբ առնող Աղքյորփի գետակի ափին, վարչական կենտրոն Մառնեուլ քաղաքից 60 կմ հեռավորության և ծովի մակարդակից 1019 մետր բարձրության վրա, հայաբնակ Աղքյորփի գյուղում, կառուցվել է 19-րդ դարում։
| Սուրբ Աստվածածին եկեղեցի | |
|---|---|
| Հիմնական տվյալներ | |
| Տեսակ | եկեղեցի |
| Երկիր |  Վրաստան |
| Տեղագրություն | Աղքյորփի |
| Դավանանք | Հայ Առաքելական Եկեղեցի |
| Ճարտարապետական ոճ | հայկական ճարտարապետություն |
 | |
 | |
Անվան այլ կիրառումների համար տե՛ս՝ Սուրբ Աստվածածին եկեղեցի (այլ կիրառումներ)
Ըստ արխիվային և մամուլի պահպանված տեղեկությունների՝ գյուղում եղել է հայկական 2 եկեղեցի։ Եկեղեցու արխիվներից մեկի համաձայն 1845-1846 թվականներին Սուրբ Աստվածածին եկեղեցի եղել է փայտաշեն կառուց, ունեցել է 1 հոգևորական, տարածքում եղել է նաև գերեզմանոց, իսկ եկեղեցու ծխականները եղել են 135 մարդ։ 1866-1867 թվականների մեկ այլ տեղեկարգի տվյալներով, հիշատակվում է գյուղի 2 եկեղեցու գոյության մասին՝ «Սուրբ Աստվածածին» և «Սուրբ Գևորգ» անվամբ։ Իսկ 1857-1860 և 1911-1913 թվականների պահպանված տվյալներից պարզ է դառնում որ գյուղի ծխական եկեղեցին եղել է Սուրբ Գևորգ եկեղեցին։ 1912 թվականին Սուրբ Գևորգ եկեղեցին գտնվել է կիսավեր վիճակում, սակայն տեղի հայ բնակչության նախաձեռնությամբ եկեղեցին վերականգնվել է և 1913 թվականին վերաօծվել է որպես Սուրբ Գրիգոր Լուսավորիչ։
Սուրբ Աստվածածին եկեղեցին կառուցված է խճաքարերով և աղյուսով, որի չափերն են՝ (9,0 x 5,5) մետր։ Եկեղեցու անկյունները, հարավային պատուհանը, արևմտյան ճակատը և ճակատամասի վերին շարքերը կառուցված է աղյուսից։ Ունի մեկ մուտք արևմտյան կողմից։ Եկեղեցու հյուսիսաին կողմում կա մկրտության ավազանը, որի վերևի մասում կա առձանագրություն․
|
ԱՇԽԱՏԱՍԻՐՈՒԹԵԱՄԲ ՇԻՆՎԷՑԱՒ ԶԱՅՍ ԽՈՐԱՆՍ ՄՕՍԷՍ ԱԹԱԲԷԳԵԱՆՑՍ | 
|
Կա արձանագրություն նաև եկեղեցու մուտքի մոտ եղած տապանաքարերի վրա․
|
|
Մոսես Աթաբեգյանցի և նրա տիկնոջ՝ Մարիամ Սիմոնյան-Աթաբեգյանցի |
|
Եկեղեցու հոգևոր կազմը եղել է՝ Մկրտիչ քհն. Տեր-Վարդանյանը և Գրիգոր քհն. Միսկարյանցը։
Խորհրդային տարիներին եկեղեցին արդեն իսկ չէր գործում, և վերածվել էր պահեստի, սակայն հետխորհրդային տարիներին համագյուղացիները և բարերարների ֆինանսական աջակցությամբ եկեղեցին մասնակի վերանորոգվել է, որից հետո 2005 թվականին օրհնվում է։
Ծանոթագրություններ
խմբագրել- ↑ Aleks_El_Dia. «ԱՂՔՅՈՐՓԻ – ՍԲ. ԱՍՏՎԱԾԱԾԻՆ ՄԱՏՈՒՌ». armenianchurch.ge. Վերցված է 2021 թ․ հուլիսի 25-ին.
{{cite web}}: Missing|author1=(օգնություն)