Սալոնիկի կինեմատոգրաֆի թանգարան

Սալոնիկի կինեմատոգրաֆի թանգարան
Տեսակ	թանգարան
Երկիր	Հունաստան
Տեղագրություն	Սալոնիկի մունիցիպալիտետ
Վայր	Սալոնիկ
Հիմնադրվել է	1995
Կայք	cinemuseum.gr

Սալոնիկի կինեմատոգրաֆի թանգարան, կինեմատոգրաֆի առաջին թանգարանը Հունաստանում։ Հիմնադրվել է 1995 թվականին և բացվել է 1997 թվականին, երբ Սալոնիկն ընտրվել է որպես Եվրոպայի մշակութային մայրաքաղաք։ Այս նախաձեռնությունը համընկել է կինեմատոգրաֆի 100-ամյակի համաշխարհային իրադարձության հետ։

Պատմություն Խմբագրել

Թանգարանն աշխատում է Հունաստանի մշակույթի նախարարության ղեկավարությամբ, Սալոնիկի միջազգային կինոփառատոնի մաս է կազմում։ Ըստ կանոնադրության, կինեմատոգրաֆի թանգարանը գոյություն ունի, որպեսզի հավաքի, պահպանի և ներկայացնի Հունաստանի կինեմատոգրաֆիկ տեսարժանությունները։ Դրա համար թանգարանը կազմակերպում է կրթական ու հետազոտական ծրագրեր այլ թանգարանների հետ` ուսումնասիրելու և հավաքագրելու կինոյի հետ ցանկացած ձևով կապված առարկաներ։ Թանգարանը գնել է հին ֆիլմերի հավաքածուներ, ֆոտոխցիկներ, ծրագրեր, լուսանկարներ ու տպագրություններ կինեմատոգրաֆի այնպիսի հայտնի ներկայացուցիչներից, ինչպիսիք են Կինոս Բիլիլիսն ու Վասիլիս Պապադոպուլոսը, ինչպես նաև` հսկա պլակատ-ազդագրեր նկարիչ Կ. Արվանիտիդիսից։ Թանգարանի այցելուները և հետազոտողները կարող են տեղեկություններ գտնել Հունաստանի կինեմատոգրաֆի մասին` սկսած 1985 թվականից մինչև մեր օրերը։ Սա ներառում է տեղեկատվություն ֆիլմերի փառատոնների, հանրային ցուցադրությունների, ռեժիսորների ու դերասանների մասին^[1]^[2]։ Թանգարանը կազմակերպված այցելություններ և ցուցադրություններ է ապահովում կինոգետների համար` հատուկ այս նպատակով ստեղծված սրահում^[1]^[2]։