Պողոս Ա Սսեցի
Պողոս Ա Սսեցի (1374 - 1382[1], Սիս[1]), Ամենայն Հայոց կաթողիկոս 1374 թ.-ից։ Հաջորդել է Կոստանդին Ե Սսեցուն։ Ծննդյան թիվն ու վայրն անհայտ են։ Մահացել է 1382 թ.-ին Սիս քաղաքում։
| Պողոս Ա Սսեցի | |
|---|---|
| Ծնվել է | 1374 |
| Մահացել է | 1382[1] |
| Մահվան վայր | Սիս[1] |
| Կրոն | Հայ Առաքելական Եկեղեցի[1] |
| Մասնագիտություն | քահանա |
| Զբաղեցրած պաշտոններ | Ամենայն Հայոց Կաթողիկոս |
Եղել է Սսի կաթողիկոսարանի միաբաններից, աչքի է ընկել իր հեղինակությամբ ու ազդեցությամբ։ Կաթողիկոս է ընտրվել Հայոց թագավորության չորս խնամակալների և բարձրաստիճան հոգևորականության հավանությամբ։
1375 թ.–ին Պողոս Ա Սսեցին բարձրաստիճան բոլոր հոգևորականների և մայրաքաղաքի ամբողջ բնակչության հետ դիմավորել է Լևոն Զ Լուսինյանին և մեծ հանդեսով քաղաք առաջնորդել։ Վերջինիս՝ լատինական ծեսով թագավոր օծվելու ցանկությունը առաջ է բերել ոչ միայն Հայոց կաթողիկոսի, այլ նաև հասարակ ժողովրդի զայրույթն ու հակակրանքը։
Պողոս Ա Սսեցին ջանք չի խնայել՝ պաշտպանելու Հայոց եկեղեցու իրավունքներն ու սկզբունքները թագավորի և նրան շրջապատող լատինների ոտնձգություններից։ Հայ իշխանների հետ մասնակցել է Սսի հերոսական պաշտպանությանը և իր ներկայությամբ ոգեշնչել է մարտնչողներին։ Կաթողիկոսն անձամբ է բանակցություններ վարել արաբական միացյալ հրամանատար Աբուբաքրի հետ և, ելնելով ստեղծված ծանր դրությունից՝ որոշել է քաղաքը հանձնել։
1375 թ.-ի ապրիլին Պողոս Ա Սսեցին Լևոն Զ թագավորի և այլ մեծամեծ իշխանների հետ գերեվարվել է Հալեպ, ապա՝ Կահիրե։ 1375 թ.-ի վերջերին ազատվել է գերությունից, վերադարձել Սիս և, համակերպվելով օտարերկրյա նոր տիրակալի հետ, շարունակել իր գահակալությունը։
Կաթողիկոսական գահին Պողոս Ա Սսեցուն հաջորդել է Թեոդորոս Բ Կիլիկեցին։
Գրականություն
խմբագրել- Հովհան Դարդել, Ժամանակագրութիւն Հայոց, Ս. Պետերբուրգ, 1891
- Օրմանյան Մ., Ազգապատում, հատ. Բ, Ս. Էջմիածին, 2001
Ծանոթագրություններ
խմբագրել| Նախորդող՝ Կոնստանդին Ե Սսեցի |
Կաթողիկոս 1374–1382 |
Հաջորդող՝ Թեոդորոս Բ Կիլիկեցի |