Միխայիլ Լոմոնոսովի հուշարձան (Մոսկվա, Մոխովայա փողոց)

Անվան այլ կիրառումների համար տե՛ս՝ Միխայիլ Լոմոնոսովի հուշարձան (այլ կիրառումներ)

Միխայիլ Լոմոնոսովի հուշարձան (ռուս.՝ Памятник Михаилу Ломоносову), հուշարձան Ռուսաստանի Դաշնության մայրաքաղաք Մոսկվայում, որը նվիրված է ռուս գիտնական, բնախույզ, Մոսկվայի պետական համալսարանի հիմնադիր Միխայիլ Վասիլևիչ Լոմոնոսովին։ Տեղադրվել է Մոխովայա փողոցում (Արբատ շրջան)՝ Մոսկվայի համալսարանի ժուռնալիստիկայի ֆակուլտետի շենքի հարևանությամբ։ Միխայիլ Լոմոնոսովի ներկայիս հուշարձանը այս տեղում երբևէ կանգնածներից երրորդն է։

Միխայիլ Լոմոնոսովի հուշարձան
Միխայիլ Լոմոնոսովի հուշարձանը
Տեսակ	հուշարձան
Ստեղծում	1957
Երկիր	Ռուսաստան
Բնակավայր	Արբաթ շրջան
Շինության ձև	Քանդակ
Մասն է	Buildings of Moscow State University (Mokhovaya Street)?
Ներկա վիճակ	Կանգուն
պատկերված են Միխայիլ Լոմոնոսով
Monument to Mikhail Lomonosov (Mokhovaya) Վիքիպահեստում

Պատմություն

Առաջին հուշարձան

Միխայիլ Լոմոնոսովի հուշարձանը տեղադրելու մասին որոշումն ընդունել է Մոսկվայի համալսարանը՝ գիտնականի 120-ամյա հոբելյանի առթիվ կայանալիք տոնակատարությունների պատվին։ Արձանը ստեղծելու համար կազմակերպվել է դրամահավաք, բայց գումարը բավականացրել է միայն բրոնզե կիսանդրի տեղադրելու համար։ Այդ կիսանդրին, որի հեղինակը Ս. Ի. Իվանովն էր, քանդակվել է ըստ Ֆեդոտ Շուբինի ստեղծած մարմարե կիսանդրու նմուշի, որը գիտնականի առավել հավաստի պատկերն է։

Լոմոնոսովի բրոնզե կիսանդրին տեղադրվել էր գրանիտե բարձր պատվանդանին՝ Մոսկվայի համալսարանի Աուդիտորական մասնաշենքի առջև և հանդիսավորությամբ բացվել է Տատյանայի օրը՝ 1877 թվականի հունվարի 24-ին (հին տոմարով՝ հունվարի 12-ին)։ Բացման արարողությանը ելույթով հանդես է եկել համալսարանի ռեկտոր, պատմաբան Սերգեյ Միխայլովիչ Սոլովյովը։

Այդ տեսքով հուշարձանը կանգնած է եղել մինչև Հայրենական մեծ պատերազմը։ Պատերազմի սկզբում Մոսկվայի հերթական ռմբակոծության ժամանակ հուշարձանի մոտ ավիառումբ է ընկել։ Հուշարձանը զգալիորեն տուժել է ռումբի բեկորներից։ 1944 թվականին կիսանդրու պատվանդանը քանդվեց, իսկ կիսանդրին տեղափոխվեց Մոսկվայի համալսարանի ակումբի շքասանդուղք։

Երկրորդ հուշարձան

Դրանով այս հուշարձանի պատմությունը չի ավարտվել։ Որոշվել է համեստ կիսանդրին չվերականգնել, այլ նրա փոխարեն տեղադրել ավելի կոթողային քանդակ։ Ուստի 1945 թվականին տեղադրվեց նոր հուշարձան, որի հեղինակը հայտնի քանդակագործ Սերգեյ Մերկուրովն էր։ Հուշարձանը պատկերում էր երիտասարդ Լոմոնոսովին և քանդակված էր անհարատև գիպսից, որը երանգավորված էր բրոնզագույն։ Այդ պատճառով այն շուտով դարձավ ոչ պիտանի։

Երրորդ հուշարձան

1957 թվականին գիպսե հուշարձանը հանվեց և փոխարինվեց ժամանակակից, բրոնզե հուշարձանով, որի հեղինակն է քանդակագործ Իոսիֆ Կոզլովսկին։ Սա Լոմոնոսովի արդեն երրորդ հուշարձանն է այս վայրում։

Հուշարձանը պատկերում նստած և աջ ձեռքը նստարանին հենած Լոմոնոսովին, իսկ նրա ձախ ձեռքում ձեռագիր է։ Բարձր պատվանդանին արված է պարզ մակագրություն.

ԼՈՄՈՆՈՍՈՎ Միխայիլ Վասիլևիչ 1711-1765

Պատկերասրահ

• 
  Լոմոնոսովի կիսանդրին (հեղինակ՝ Ֆ. Շուբին), որը դարձել է առաջին հուշարձանի նախատիպը
• 
  ՄՊՀ-ի ուսանողների և դասախոսների խումբը Լոմոնոսովի կիսանդրու մոտ, 1913 թվական
• 
  Լոմոնոսովի հուշարձանը հեռվից

Արտաքին հղումներ

• Иван Крылов (2011 թ․ հոկտեմբերի 19). «ПАМЯТНИК «ПЕРВОМУ РУССКОМУ УНИВЕРСИТЕТУ» НА МОХОВОЙ». Фонд Русский мир. Արխիվացված է օրիգինալից 2014 թ․ ապրիլի 27-ին. Վերցված է 2014 թ․ ապրիլի 27-ին.
• «Забытый исторический памятник М. В. Ломоносову». Узнай Москву. Արխիվացված է օրիգինալից 2014 թ․ ապրիլի 27-ին. Վերցված է 2014 թ․ ապրիլի 27-ին.
• «Памятник М. В. Ломоносову». Москва-Гид. 2010 թ․ հոկտեմբերի 21. Վերցված է 2014 թ․ ապրիլի 27-ին.